1 Tau ta Efraim ororodia ai e nohova, ladana na Mika. 2 Ia ese sinana e hamaoroa, eto, Hari silver monidia daha-ta sinahu-ta oiemu amo e heabi-oho, bona daidiai oi ese heuduguirai herevana o gwauraia, bena lau danu na kamonai, ḡaudia na lau dekegu ai; lau ese na abidia. Bena sinana eto, Iehova ena hahenamo na natugu latanai baine mia. 3 Bena Mika ese hari silver monidia daha-ta sinahu-ta na sinana e henia lou. Bena sinana eto, Ina silver na hahelaḡaiamu Iehova ena, natugu bagunai: e koroamu laulauna ta bona e haveveamu laulauna ta bae kara; taunabunai na henimu loumu. 4 Taunabunai, Mika ese silver e abia, sinana e heni lou, negana ai, hahine ese silver monidia sinahu-rua e abi, silver iḡaukaralaiana tauna e henia; bena ia ese kahana e koroa, laulau ta e karaia, ma kahana e havevea, laulau ta e karaia; bena laulau na Mika ena ruma ai e miava. 5 Hari tau, Mika, na mai ena dubu; bena ia ese dabua helaḡana bona kaivakuku e kara; bena natuna maruanena ta e duanaia, ena hahelaḡa tauna ai bainela. 6 Unu dinadia ai Israel na asi pavapavana; Israel taudia na ta ta ena lalo-hadai ena lalo-hadai heḡereḡeredia e kara.

7 Tauhau ta Betelehem ai e nohova, Iuda tanona ai. Ia na Iuda iduhuna tauna; ia danu Levi tauna. 8 Una tau na Betelehem-luda amo e tore isi, eha laolao, ena noho gabuna ta baine tahua eto; bena ena laolao ai na Efraim ororodia ai e kau, bona Mika ena ruma ai e gini dae. 9 Mika ese e nanadaia, eto, Ede amo oma? Ia e haere henia, eto, Lau na Levi taugu, Betelehem-luda amo vada nama; egu noho gabuna ta na tahuamu. 10 Bena Mika ese e hamaoroa, eto, Lau dekegu ai ba noho, tamagu ai bona egu hahelaḡa tauna ai baola; bena laḡani ta ta amo silver monidia gwauta gwauta amo baina henimu; emu dabua bona amu danu baina henimu. 11 Bena Levi tauna lalona vada e heḡereḡere Mika dekenai baine noho; bena una tauhau na ia natuna heḡereḡeredia ai ela. 12 Bena Mika ese una Levi tauna na e haginia: tauhau na Mika ena hahelaḡa tauna ai ela, bona ena ruma ai e nohova. 13 Bena Mika eto, Harihari lau na dibagu Iehova ese baine hanamogu, badina be Levi tauna vada na abia, egu hahelaḡa tauna.