7
Gideon ena tuari oreana
1 Bena Ierubu-baal (una be Gideon) bona ia e bamoava taudia iboudiai na daba ai e tore isi, Harod ranu gabuna badinai e taruha. Midian taudia edia taruha na mirigini kahana ai, More ororona badina kourana ai.
2 Iehova ese Gideon e hereva henia, eto, E bamomumu taudia na hutuma herea. Midian taudia na idia imadia ai bama atodia, Israel na lau vairagu ai bema hekokoroku, bema toma “Ai sibomai imamai amo vada a hahemauri”.
3 Taunabunai, taunimanima ba hamaorodia, baoto “Gari bona kudou-hetaha tauna ese ena ruma baine lou henia”. Gideon na unu e tohodia toma; bena gerebu-rua daha-rua e lou, a gerebu ta e noho.
4 Bena Iehova ese Gideon ma e hamaoroa, eto, Taunumanima na doene hutuma. Ranu gabuna ba hakaudia lao, unuseni ai lau ese baina dibadia; bena ta baina herevalaia, bainato “Ina tau ese baine bamomu”, una tau na oi ida bainela, a ta baina herevalaia, bainato “Ina tau ese basine bamomu”, una tau na basinela.
5 Taunabunai, ia ese taunimanima na ranu gabuna e hakaudia lao. Bena Iehova ese Gideon e hamaoroa, eto, Maladia an-o ranu bae peta dae, sisia na heheto, taudia iboudiai na gabu ta ai bavatodia; a bae tui diho, ranu bae dodo, taudia ma gabu ta ai bavatodia.
6 Bena imadia amo ranu e kado bona maladia amo e peta dae taudia na sinahu toi; a oredia iboudiai na e tui diho, ranu e dodo.
7 Bena Iehova ese Gideon e hamaoroa, eto, Ranu e peta dae taudia sinahu-toiosi edia amo lau ese baina hamaurimui, bona Midian taudia na oi imamu ai baina atodia. Oredia iboudiai ba kahudia nege, ta ta ena ruma ena ruma baela.
8 Taunabunai, hodu na taunimanima imadia amo e abi, bona edia kibi danu; bena Gideon ese Israel oredia iboudiai e siaidia lou, ta ta ena kalaga ena kalaga ela; a sinahu-toiosi mo e dogodia tao. Midian taudia edia taruha na ia henunai, koura ai.
Gideon e hasinadoa
9 Una hanuaboi Iehova ese ma e hamaoroa, eto, A tore isi, a hekei lao, edia taruha ai ba tuari henidia.
10 A boma gari, emu hesiai tauna Pura ida ba hekei lao, taruha badibadinai;
11 edia hereva ba kamonai, gabeamo imamu bae goada ba hekei lao, edia taruha ai ba tuari henidia. Bena ena hesiai tauna Pura ida e hekei lao, ela bona tuari taudia taruha isena ai e hegima gabuna ai.
12 Midian taudia bona Amalek taudia bona mairiveina kahana taudia iboudiai na koura ai e taruha. Idia na hutuma herea, kwadi na heheto; edia kamelo danu asi iduahidia, kone mirina na heto.
13 Gideon e kau negana ai, tau ta ese ena nihi sivaraina na bamona ta e hamaorolaia, eto: A kamonai, lau na na nihi; egu nihi ai bali dikeana ta e hekei mai Midian taruhana ai, kalaga auta ai e tata kau, bena kalaga na e kohu, e heḡiḡi dobi tano ai.
14 Bena bamoma na e haere, eto, Ina na Gideon Ioasa, Israel tauna, ena dare; Dirava ese Midian mai ena orea idoinai ida ia imana ai vada e atodia.
Gideon e heḡaeḡae
15 Gideon ese una nihi igwauraina bona anina ihahedinaraina e kamonai, bena ia na e toma diho. Bena Israel taruhana e lou henia, eto, A tore tore isi, badina be Iehova ese Midian ena orea idoinai na umui imamui ai vada e atodia.
16 Bena ia ese hari tatau sinahu-toiosi e haridia, orea toi, iboudiai kibi bona hodu e henidia, hodu lalodiai na kede.
17 Bena e hamaorodia, eto, Lau ba itagu, ba tohotohogu; taruha isena ai baina kau ai, lau baina karaia heḡeregerena na umui danu ba karaia.
18 Lau mai bamogu iboudiai ida emai kibi baia hiriri negana ai na umui danu emui kibi ba hiriri, edia taruha hegeḡemadai; bena ba lolo, baoto “Iehova bagunai bona Gideon bagunai”.
Gideon e tuari
19 Malokihi ai, Gideon, e bamoa taudia sinahu-ta ida, taruha isena ai e kau, hegima negana iharuana ai hegini-dava taudia e atodia negana ai. Bena edia kibi e hiriri bona edia hodu e hamakohi.
20 Bena orea toiosi taudia ese edia kibi e hiriri bona edia hodu e hamakohi; bena kede na imadia lauridia ai e dudui isi, a kibi be imadia idibadia ai e abi, e hiriri. Bena e lolo, eto, Iehova ena dare bona Gideon ena.
21 Ta ta ena gabu ena gabu ai e gini, taruha e ginia heḡege. Bena tuari oreana idoinai e heau; e lolo dagu bona e heau karoho.
22 Kibi sinahu-toiosi e hiriri negana ai, Iehova ese tuari taudia e hadaradaradia, bena ta ta ena dare ena dare e abi, e heatu heheni. Tuari oreana e heau, ela bona Bete-sita, Serera kahana ai, ela bona Abele-mehola hetoana, Tabata badinai.
23 Bena Israel taudia na Napatali amo bona Asere amo bona Manase idoinai amo e boiridia; bena idia ese Midian taudia e hahavadia.
Efraim taudia e heduru
24 Bena Gideon ese gwaukau taudia e siaidia, Efraim ororodia idoidiai ela, eto, A hekei mai, Midian taudia ba tuari henidia, bona ranu gabudia ela bona Bete-bara, bona Ioridane sinavaina danu, ba gimadia. Taunabunai, Efraim taudia iboudiai e boiridia, bena ranu gabudia e gimadia ela bona Bete-bara, bona Ioridane sinavaina danu.
25 Midian lohiadia raruosi danu e abidia: Oreb na Oreb haga-nadina ai e alaia mase; bona Sebe na Sebe ena vine-ranuna itaolaina gabuna ai e alaia mase, Midian taudia e hahavadia negana ai. Bena Oreb bona Sebe kwaradia na Gideon dekena e laohaidia. Ioridane sinavaina unukahana ai.