2
1 Siona ai kibi ba hiriria;
egu ororo helaḡana ai ba hone!
Tano inoholaina taudia bae heude-heude,
badina be Iehova ena dina vada e maimu,
vada eme kahira-kahira,
2 dibura bona gabola dinana,
dagadaga bona dibura masemase dinana!
Bese badana mai siahuna ida
ororo ai e da'ania, dagadaga na heto;
nega gunadia amo idia heḡereḡeredia haida asie hedinarai,
bona idia muridiai danu heḡereḡeredia haida basie hedinarai,
uru iboudiai lalodiai.
3 Idia vairadiai lahi na e heara oremu,
bona muridiai lahi hururu-hururuna na e hearamu.
Vairadiai tano ita-itana na Eden imeana na heto,
a muridiai tano na e gagaemu, e vahu vaitanimu,
ḡau ta idia imadia amo se roho maurimu.
4 Oromadia na hosi oromadia heḡereḡeredia,
bona e heaumu, tuari hosidia na heheto.
5 Mai reḡedia, kariota reḡedia na heheto,
ororo doridia ai e rohomu;
lahi hururu-hururuna ese rei e araiamu na heto,
tuari oreana mai goadana tuari totona e gini heḡaeḡaemu na heto.
6 Idia vairadiai taunimanima na hisihisi ese e gugubadiamu,
vaira iboudiai e laboradia gugurumu.
7 Tuari taudia na heheto e heaumu,
tuari taudia na heheto maḡu e dada daemu.
Ta ta ena dala ena dala ai e rakamu,
edia dala amo asie raka sirimu.
8 Asie raka hesede-hesedemu,
ta ta ena dala ena dala ai e rakamu;
tuari lalonai e tata vareaimu,
ta ese se ginidia ahumu.
9 Hanua latanai e roho kaumu,
hanua maḡuna e heau heniamu;
ruma lalodiai e dada daemu,
gaba mauru amo e rau vareaimu, henao tauna na heto.
10 Idia vairadiai tano e lagamu,
bona guba e heude-heudemu.
Dina bona hua e diburamu,
hisiu na asie nakamu.
11 Iehova gadona e hadaeamu,
ena tuari oreana vairanai,
badina be ena tuari oreana na bada herea;
ena hereva anina e havaraiamu tauna na mai siahuna.
Badina be Iehova ena dina na dina badana mai garina;
ia lalonai daika baine haheauka diba?
Iehova ena hebogahisi
12 Iehova na e tomu: ina harihari
lau dekegu ai a lou mai, mai lalomui idoidiai ida,
bona mai anivagamui, mai taimui, mai ganaganamui ida;
13 Ialomui hari ba daredia, dia dabuamui.
Iehova, emui Dirava, ba lou henia,
badina be ia na mai ena harihari-bada bona mai ena hebogahisi.
ia na badu ai e halahemu, bona ena lalokau na bada herea,
bona kara dika amo e helalo kerehaimu.
14 Daika dibana, reana ia na baine helalo kerehai lou,
bona hahenamo na ia murina kahana ai baine rakatania,
flaoa boubouna bona inuinu boubou ḡaudia,
Iehova, emui Dirava, ena.
15 Siona ai kibi ba hiriria,
anivaga ta ba hahelaḡaia;
hebou helaḡana ta ba boilaia,
16 taunimanima ba haboudia.
Hebou taudia ba hahelagadia,
hanua tau-badadia ba haboudia;
memero kekeni ba gogodia,
rata e inumu memerodia danu.
Headava matamata tauna ese ena daiutu baine rakatania,
headava matamata hahinena danu ena daiutu amo baine raka lasi.
17 Iduara dehena bona ihaboulaina patana padadiai
hahelaḡa taudia, Iehova ena hesiai taudia, na bae tai,
baeto: Iehova e, emu orea taudia ba bogadia hisi,
dihimu basio hahemaraia,
gwaurai-gwaurai herevana ai basio halaoa,
bese idau-idau bogaragidiai.
Dahaka dainai bese idau-idau bogaragidiai baeto
“Edia Dirava be edeseni ai?”
18 Bena Iehova na e vageḡe, ena tano dainai,
ia ese ena orea taudia e bogadia hisi.
19 Iehova na e haere, ena orea taudia e hamaorodia, eto:
A itaia, uit bona vine ranuna bona dehoro na siaidia vasimu,
bena bogamui do bae kunu;
bona basina hahemaraimui lou,
bese idau-idau bogaragidiai.
20 Mirigini kahana tauna na emui amo baina abia oho dauhai,
tano kaukauna, tano deḡedeḡena-rahu ai baina lulua lao;
ena vaira oreana na laurabada kahana davarana ai,
bona ena muri oreana na lahara kahana davarana ai,
baina luludia lao.
Ia bonana dikana bona bodagana na baine dae,
badina be ia ese kara badadia vada e kara.
21 Tano e, basio gari;
ba moale, ba hisi dae;
badina be Iehova ese kara badadia vada o kara.
22 Uda boromadia e, basio gari;
badina be tano ḡaḡaena ena rei gabudia ai
rei matamata e tubumu;
au huahuadia e dobimu,
suke auna bona vine auna anidia e vara badabadamu.
23 Siona natuna verina e, ba moale!
Iehova, emui Dirava, ba moalelaia!
Badina be ia ese medu gunadia vada e heni,
umui ihamomokanimui totona;
medu barokodia na latamui ai vada e hadiho,
medu gunana bona medu gabena, nega gunadaia heḡereḡeredia.
24 Uit ikwadilaina gabudia ai na uit ai bae honu,
vine ranuna bona dehoro na hodu amo bae hepurai dobi.
25 Kwadi tabatabadia, roho kwadidia,
hahevahu kwadidia, rau-ani kwadidia,
egu tuari oreana badana,
bogaragimui ai na siaia vasi oreana,
ese e ani ore laḡanidia na
lau ese ma baina henimui lou.
26 Bavani lava dae, bogamui bae kunu,
Iehova, emui Dirava, ladana ba imodaia;
ia ese hoa karadia vada e karalai henimui.
Egu orea taudia na nega ta ai
ma basie hahemaraidia lou.
27 Ba diba, lau na Israel bogaraginai,
lau, Iehova, na emui Dirava,
idauna ta na lasi.
Egu orea taudia na nega ta ai
ma basie hahemaraidia lou.
28 Nega gabena ai ina na baine vara:
lau laumagu baina seia dobi taunimanima iboudiai latadiai;
bena natumui mamaruanedia bona hahinedia do bae peroveta;
emui iahu bae nihi,
bona emui eregabe bae mata hanai.
29 Unu dinadia ai hesiai taudia bona hesiai hahinedia latadiai danu laumagu do baina seia dobi.
30 Toa ḡaudia danu baina hahedinaraidia, guba ai bona tanobada ai, rara bona lahi bona kwalahu tubu-daena.
31 Dina do baine dibura, hua na rara ai bainela, Iehova ena dina badana mai garina ida do basine kau ai.
32 Bena Iehova ladana bae hahanea taudia iboudiai na bae mauri, badina be Siona ororona ai bona Ierusalem ai haida na bae roho mauri, Iehova ena hereva heḡereḡerena; bona unu roho-mauri taudia bogaragidiai Iehova ese e vavedia taudia danu bae noho.