15
Iehova ena badu se dokomu Iuda latanai
1 Bena Iehova ese e hamaorogu, eto, Ena be Mose bona Samuel na vairagu ai bema gini, to lalogu basinema heḡereḡere ina bese taudia bama hageredia. Vairagu amo ba siaidia oho, ba kahudia nege!
2 Bena bae nanadaimu, baeto “Ede baiala?”, negana ai, ba hamaorodia, baoto, Iehova na ini e gwau tomamu:
Dai-hanai gorerena ena, dai-hanai gorerena ese baine abidia,
bona dare ena, dare ese baine abidia;
doe ena, doe ese baine abidia,
bona abi-mauri ena, vada bae abidia mauri.
3 Iehova ma e tomu: Lau ese hahebua-tari ḡaudia hani baina duanaidia, bae biagudia: dare, iala-masedia totona; sisia, idaredia totona; bona atai manudia bona uda boromadia, iani-oredia bona ihabua-taridia totona.
4 Lau ese hahegari ḡauna ai baina halaodia, tanobada basileiadia iboudiai ediai, Manase Hesekia, Iuda pavapavana, ese Ierusalem ai e karaia ḡauna dainai.
5 Ierusalem e, daika ese baine bogamu hisi?
Daika ese oi taimu baine tai?
Daika baine raka siri,
oiemu noho dalana inanadailaina totona?
6 Iehova na e tomu: Vada o dadaraigu,
bona murimu kahana o lao henia louloumu;
taunabunai, lau imagu vada na toia roro, oi ihadikamu totona,
bona vada na habuamu tari;
hebogahisi ai na hesikumu.
7 Itapo amo vada na tapodia hidi,
tano ikoukoudia ai;
egu hahemase ese natudia na edia amo vada e abidia oho,
egu bese taudia vada na habuadia tari;
idia na edia dala amo asie raka siri.
8 Edia vabu vada na hahutumadia,
kone mirina na heto;
dina tubua ai hahebua-tari tauna vada na siaia,
eregabe taudia sinadia ihadikadia totona;
hisihisi-bada bona gari-bada na
latadiai vada na hadiho taku.
9 Natuna hahitu e havaradia hahinena na tauna vada e manori,
vada e mase rea;
do dina ai iena dina vada e diho,
vada e hahemaraia bona vada na dadaraia.
Idia taudia oredia na dare baina henia, inaidia vairadiai.
Iehova na e herevamu.
10 Sinagu e, madi ihabaigu! O havaragu, heai bona hepapahuahu taugu, tano idoinai enai. Asina heni torehai bona asina abi torehai, to idia iboudiai ese e uduguiraigumu.
11 Iehova e, bema asina noimu, idia ihanamodia totona, bona inai taudia daidiai asina noi henimu, hekwakwanai bona hisi-ani negadia lalodiai, unu bema vara toma.
12 Auri, mirigini kahana aurina, bona auri labora-laborana, na ta ese baine hakwaidua diba, a?
13 Emu taḡa bona emu kohu namodia na dadidadi ḡaudia ai baina halaodia, asi davadia, emu kara dika iboudiai daidiai, emu tano hetoadia iboudiai lalodiai.
14 Oi inaimu edia hesiai tauna ai baina halaomu, asi dibamu tanona ai, badina be egu badu ese lahi ta vada e ha-araia, bena baine ara hanaihanai.
Iehova ena gwauhamata Ieremia enai
15 Iehova e, oi dibamu;
ba lalogu tao, ba vadivadigu;
bona e hahisihisigumu taudia na davadia ba henidia,
lau daigu ai.
Emu haheauka ai basio abigu oho;
ba diba, oi daimu ai hereva metaudia na huamu.
16 Emu hereva na davaridia, bena na anidia,
emu hereva ese e hamoalegu,
lau lalogu ihamoalena ḡaudia ai ela;
badina be Dirava, Iehova Sabaota e,
lau be oi ladamu vada na henemailaia.
17 E moale hebouva taudia bogaragidiai asina helai,
bona asina moale.
Sibogu na helai, badina be oi imamu na latagu ai;
badina be oi ese badu ai o hahonugu.
18 Dahaka dainai egu hisihisi na asi dokona,
bona berogu na asi ihanamona,
se uramu baine namo lou?
Oi na sinavai-sinavai koikoina heḡereḡerena ai baola egu ai,
e kororomu ranudia heḡereḡeredia ai a?
19 Taunabunai Iehova ini e gvau tomamu:
Boma lou mai, bama haginimu lou,
bena vairagu ai boma gini.
Bema hereva namo-hereadia ba gwaurai, dia hereva asi anidia,
oi na lau udugu heḡereḡerena ai baola.
Idia ese bae haḡeregu,
a oi ese basio haḡeredia.
20 Bena ina bese taudia ediai
lau ese auri-laboralabora maguna aukana ai baina halaomu;
idia ese bae tuari henimu,
to basie hadareremu;
badina be lau na oi ida,
oi ihamaurimu bona irauamu totona.
Iehova na e herevamu.
21 Kara dika tauna imana amo baina rauamu,
bona asi ena hebogahisi tauna imana amo baina hamaurimu.