2
Iehova ese Israel e gwau henia
1 Iehova ena hereva na egu ai e kau, eto,
2 Aola, Ierusalem taudia vairatuhutuhudia ai ba hereva, baoto, Iehova ini e gwau tomamu:
Emu lalokau eregabemu negana ai
bona emu uraheni emu headava matamata negana ai
na lalo taomu;
tano ḡaḡaena ai, ḡau ta asie hadoa tanona ai,
oi ese lau murigu ai o rakava.
3 Una negana ai Israel na helaḡa Iehova ena,
ena taboro anidia roboadia.
E ani taudia iboudiai e kerere,
bena dika na latadiai e kau.
Iehova na e herevamu.
4 Iakob besena e, bona Israel besena iduhudia iboudiai, Iehova ena hereva a kamonai.
5 Iehova ini e gwau tomamu:
Senemui ese dahaka kerere egu ai e davaria,
bena e rakatanigu, dauha ela?
Idia ese ḡau asi namodia e ḡavadia,
bena taunimanima asi namodia ai e hahelao.
6 Idia asieto, Iehova be edeseni ai?
Aigupto amo e hakauda lasi
bona tano ḡaḡaena ai e hakauda,
tano kaukauna, tano mai guridia,
ranu-mase bona dibura-masemase tanona,
ta ese se rakaia hanaimu bona ta ese se noholaiamu tanona,
Diravana be edeseni ai?
7 Lau ese aniani momo tanona lalonai na hakaumui vareai,
ena au-huahua bona ena ḡau namodia ba moalelai totona.
A umui o raka vareai negana ai egu lano o hamiroa,
bona lau ahugu emui ai na ḡau dika-rohorohona ai o halaoa.
8 Hahelaḡa taudia asieto, Iehova be edeseni ai?
Taravatu e ḡaukaralaimu taudia na asi dibadia lau;
lohia taudia na egu ai e kerereva;
peroveta taudia na Baal ladana ai e perovetava,
bona ḡau asi anidia e gavadiava.
9 Taunabunai, Iehova na e tomu:
Lau na doini na habadelaimuimu,
bona garamui danu do baina habadelaidia.
10 Badina be ba hanai, Kupro kone-tanodia ai ba itaia,
eiava ba hesiai lao Kedara, ba tahua namonamo;
ba itaia, kara inihetomana nega ta ai e vara eiava.
11 Bese ta, ena be edia dirava na dia momomokakani,
to bema bolodia a?
A lauegu orea taudia ese hairaidia vada e boloa,
ḡau asi anina vada e bololaia.
12 Guba e, ina na ba dara-dokolaia,
ba lalaḡalaia, lalomui bae ḡaḡae.
Iehova na e herevamu.
13 Badina be egu orea taudia ese dika rua vada e kara:
lau, mauri ranuna helohilohina, vada e rakatanigu,
bona sibodia edia ranu guridia vada e tara,
e parara guridia, ranu na idia lalodiai basine mia.
14 Israel na hesiai tauna a? Ia na hesiai iḡuidia ai e vara a?
Matona, dahaka dainai damuga ai vada ela?
15 Ieona ese vada e ḡou henia,
vada e ḡou badabada.
Ena tano vada e havahua;
ena hanua vada e heḡiḡi dobi, asi inoholaidia ta.
16 Ina danu, Memefisi bona Tapanese taudia ese
oi kwaramu tubuana vada e hapararaia.
17 Iehova, emu Dirava, ese dala ai e hakaumu negana ai o rakatania,
una dainai ina na oi sibomu latamu ai vada o hadihoa, ani?
18 Harihari Nilo sinavaina ranuna i'inuna totona Aigupto o laomu
be dahaka namona ba davaria?
Eiava Eufrate sinavaina ranuna i'inuna totona Asuna o laomu
be dahaka namona ba davaria?
19 Emu kara dika ese matamu baine hakania,
bona emu raka-muri ese baine sisiba henimu.
Ba diba bona ba itaia, Iehova, emu Dirava, irakatanina na
ḡau dikana bona iditana.
Ḡaubada Iehova Sabaota e tomu,
Lau igari-henigu na oi lalomu ai se miamu.
20 Badina be idau nega ai emu maduna o hakwaidua,
bona emu iḡui o hamotu,
oto “Hesiai karadia basina kara”.
Oibe, ororo badadia iboudiai doridia ai,
bona au mauridia iboudiai henudiai,
oi o toma dihova, ariara hahinena na heto.
21 Ḡau tamona lau ese na hadomu, abi-hidi vinena,
vine korikorina uhena.
Edeheto oi na vada o vara dika,
uda vinena ai vada ola?
22 Ena be muramura amo bona sopu momo amo ba hehuri,
to emu kerere mirona na doini vairagu ai mia.
Ḡaubada Iehova na e herevamu.
23 Ba hereva diba a, baoto “Lau na asina miro,
Baal muridiai asinala” a?
Emu dala koura ai ba itaia;
ba diba ede vada o kara toma.
Oi na kamelo natuna e tau maurimu na heto,
24 eiava uda donikina hahinena, tano ḡaḡaena ai e noho manadamu ḡauna, na heto;
ena heḡaima ai lai e ha-iruamu,
bona ena heḡahusi ai daika ese baine rua?
Itahuna ai ta basine hekwarahi,
ena nega ai idia ese bae davaria.
25 Aemu ba nari, asi tamakamu basio raka;
gadomu ba naria, basio ranu mase.
A oi oto: Asi dalana,
badina be dirava idaudia vada na ura henidia,
bona idia baina ḡavadia.
26 Henao tauna e davariamu negana ai e hemaraimu na heto,
Israel taudia na unu bae hemarai toma,
idia bona edia pavapava bona edia lohia,
edia hahelaḡa taudia bona edia peroveta taudia danu.
27 Badina be idia ese au ta e hereva heniamu, e tomu
“Oi na tamagu”,
bona nadi ta e hamaoroamu, e tomu
“Oi ese o havaragu”.
Badina be vada e gini muri henigu,
asie vaira henigu;
to edia hekwakwanai negana ai e tomamu
“A tore isi ba hamaurimai”.
28 A emu dirava sibomu o kara ḡaudia,
be edeseni ai?
Bema ihamaurimu mai dibadia emu hekwakwanai negana ai,
idia hari bae tore isi;
badina be, Iuda e, emu hanua na momo heḡereḡerena,
emu dlrava danu unu e hoho tomamu.
29 Iehova na e tomu:
Dahaka dainai o maumauraigumu?
Iboumui ai ese vada o daḡedaḡe henigu.
30 Natumui vada na hahisidia na asi anina,
idia na matadia asie kani;
umui sibomui emui dare ese emui peroveta taudia vada e aladia,
e gadoamu leonana na heto.
31 Ina uru taumui e, Iehova ena hereva ba kamonai;
Israel enai lau na tano ḡaḡaena
eiava dibura-masemase tanona a?
Benaini, dahaka dainai egu orea taudia na e tomu
“Ai sibomai; ai na basia vasi lou” a?
32 Hane-ulato ta ese ena herahera ḡaudia baine lalodia boio diba, a?
Eiava headava matamata hahinena ese ena dabua basine laloa a?
A lauegu orea taudia ese
nega momo herea vada e lalogu boio.
33 Nahuamu o tohoa namonamomu emu mata-bodaga karadia ai,
taunabunai hahine dikadia danu emu dala vada o hadibalaidia.
34 Bona emu dabua ai danu
ogoḡami taudia, asi edia kerere taudia, raradia vada e miamu,
a ruma idarena ai asio davaridia.
Ini ḡau iboudiai na latamu ai,
35 to o tomu “Lau na asi egu kerere;
ena badu na egu amo vada eme heabi oho ani?”
A itaia, lau ese baina hahemaoro henimu,
oto “Asi egu kerere” dainai.
36 O loa kava loa kavamu,
emu dala o ha-idaua louloumu;
Aigupto ese baine hahemaraimu,
Asuria ese e hahemaraimu na heto.
37 Ina danu, imamu na kwaramu ai heatona ai ba raka oho,
badina be o abidadama henidiamu taudia na
Iehova ese vada e dadaraidia,
bona idia ese namomu basie habadaia.