8
Ai
1 Iehova ese Iosua e hereva henia, eto, Basio gari; kudoumu basine hetaha. Tuari taudia iboudiai avabidia; a tore isi, Ai hanuana baola. A itaia, lau ese Ai pavapavana bona ena orea taudia bona ena hanua bona ena tano vada na henimu; idia na oi imamu ai.
2 Ieriko bona Ieriko pavapavana o kara henidia heḡereḡerena, Ai hanuana bona Ai pavapavana unu ba kara henidia toma; ḡau tamona, ena kohu bona ena ubu-ubu ḡaudia bavabi emui. Emu orea ta ba siaidia hehuni, hanua murina kahana amo bae hahoadia.
3 Taunabunai Iosua e tore isi, tuari taudia iboudiai ida; e heḡaeḡae, Ai hanuana baela. Iosua ese goada taudia gerebu toi e abidia hidi, hanuaboi ai e siaidia, bae guna.
4 E haḡanidia, eto, A kamonai: hanua murina kahana ai ba bani henidia; basio raka oho, ba noho heḡaeḡae.
5 A lau be egu orea taudia ida hanua baia raka henia kahi. Bena hanua taudia bae raka lasi, vanegai heḡereḡerena, bae tuari henimai totona; a ai be idia vairadiai baia heau.
6 Bena bae havamai; una dala ai hanua amo baia veridia oho dauhai: badina be idia na baeto “Vairada ai e heaumu, vanegai e heau heḡereḡerena”. Taunabunai ai na idia vairadiai baia heau;
7 bena umui na ba tore isi, emui komu gabuna ba rakatania, hanua na bavabia; badina be Iehova, emui Dirava, ese imamui ai baine atoa kau.
8 Hanua na bavabia negana ai, vada ba doua, Iehova ena hahedua heḡereḡerena. Vadaeni, vada name haḡanimui.
9 Taunabunai, Iosua ese e siaidia, bena edia komu gabuna ela, Betele bona Ai padadiai, Ai lahara kahana ai. A Iosua na ena orea taudia ida e nohova una hanuaboi ai.
10 Iosua na daba maraḡi ela, taunimanima e haboudia, bena idia bona Israel tau-badadia ida e dae ela, taunimanima vairadiai Ai ela.
11 Bena tuari taudia iboudiai, ia ida ela taudia, na e dae ela, hanua e raka henia kahi, Ai mirigini kahana ai e taruha. Edia taruha bona Ai hanuana padadia ai na koura dobudobuna ta.
12 A taunimanima daha ima sisivana e abidia, Betele bona Ai padadiai bae bani henidia, Ai lahara kahana ai.
13 Taunabunai iboudiai na edia gabu e abi, orea badana na hanua mirigini kahana ai, a e komu oreana na lahara kahana ai. A Iosua na koura ai e noho rani.
14 Ai pavapavana ese una kara e itaia, bena ia mai ena tuari taudia bona ena hanua taudia iboudiai na hanua amo e didi lasi, bena ia mai ena orea taudia, Ai hanuana taudia, e tore isi haraḡa, e didi lasi, Araba hekeidihona ela, Israel taudia bae tuari henidia totona; asi dibana orea ta be hanua murina kahana ai vada e komu.
15 Bena Iosua bona Israel taudia iboudiai ese e koidia, e kara vada e darere na heto, bena e heau, tano ḡaḡaena e heau lao.
16 Bena Ai taudia iboudiai e heau hebou, bae hahavadia totona; bena idia ese Iosua e havaia, hanua na e rakatania.
17 Ai bona Betele lalodiai tau ta dia noho; asi tauna ta Israel se havadia. I lanua na hekehona ai e rakatania, idia e havadia lao.
18 Bena Iehova ese Iosua e hamaoroa, eto, Io na imamu ai ba toia roro, Ai ba dudui henia; badina be oi imamu ai baina atoa kau. Taunabunai Iosua ese ena io na imana ai e toia roro, hanua e dudui henia.
19 Bena imana e toia roro negana ai, hari e komu oreana na edia komu gabuna amo e tore isi haraḡa, e heau lao, hanua lalonai e heau vareai, vada e abia; bena maoromaoro e doua.
20 Taunabunai, Ai taudia na e roha kerehai, hanua e doua kwalahuna guba ai e dae e itaia. Bena asi edia heau dalana ta; badina be tano ḡaḡaena e heau lao taudia na ma e lou, e havadia taudia ma e lou henidia.
21 Iosua bona Israel taudia iboudiai ese e itaia, e komu oreana ese hanua vada e abia, bona hanua e doua kwalahuna na e daeva, bena idia na e lou, Ai taudia e hadareredia.
22 Bena hari orea ta ma hanua amo e raka lasi, e tuan henidia; taunabunai Israel taudia na kahana kahana ai, idia na ihua-pada ai. Bena Israel ese e hadareredia, ta se mauri bona ta se heau.
23 A Ai pavapavana na e abia mauri, Iosua dekena e hakaua lao.
24 Israel taudia na Ai taudia iboudiai, hari tano ḡaḡaena ai e havadia taudia, na e aladia ore, iboudiai na dare amo e aladia mase. Una murinai idia na Ai e lou ela, noho taudia ma dare amo e aladia ore.
25 Una dina ai e aladia mase taudia iboudiai na gerebu-ta daha-rua, tatau bona hahine; Ai taudia iboudiai bunu.
26 Badina be Iosua ese io imana ai se veria lou ela bona Ai taudia iboudiai vada e aladia ore.
27 A Israel taudia ese ubu-ubu ḡaudia bona kohu una hanua lalona amo e abidia edia, Iehova ese Iosua e haḡania heḡereḡerena.
28 Taunabunai Iosua na Ai hanuana e doua bona e haseriseria; unu e mia tomamu ema bona hilrihari.
29 Bena ia ese Ai pavapavana e alaia mase, au ta ai e taua dae ela bona adorahi. Dina e diho, bena Iosua ese e haḡanidia dainai haida ese mase tauna na au amo e abia dobi, hanua ikoukouna ai e atoa diho; bena nadi e senu senu kau ia latanai. Una senusenu badana na doini mia, ema bona harihari.
30 Bena Iosua ese ihaboulaina patana ta e larebaia, Iehova, Israel Diravana, ena, Ebal ororona ai,
31 Mose, Iehova ena hesiai tauna, ena haheḡani heḡereḡerena, Mose ena taravatu bukana ai e torea, eto: Ihabiulaina patana na nadi kavakava, asie utu ḡaudia, amo ba karaia. Bena ia latanai ḡole-oho bouboudia bona herohemaino bouboudia e hahelaḡadia, Iehova ena.
32 Unuseni ai Mose ese ena taravatu ma e torea lou una nadi ai; Israel taudia vairadiai e torea.
33 Bena Israel idoinai, Israel taudia korikori bona bogaradiai e noho hedoava taudia, Israel tau-badadia bona heitatao taudia bona hahemaoro taudia ida, taravatu mauana kahana kahana ai e gini, hahelaḡa taudia Levi iduhuna amo, Iehova ena taravatu mauana e huaia taudia, vairadiai. Kahana na Gerisim ororona vairanai e gini, ma kahana Ebal ororona vairanai, Mose, Iehova ena hesiai tauna, ena haheḡani gunaguna e henidia heḡereḡerena, Israel taudia ihanamodia totona.
34 Una murinai ia ese taravatu herevadia iboudiai e duahi, hahenamo herevadia bona heuduguirai herevadia, taravatu bukana ai e tore herevadia iboudiai heḡereḡeredia.
35 Mose ena haheḡani herevana ta Iosua ese se hamorua; iboudiai e duahidia hedinarai, Israel taudia edia hebou ai, tatau bona hahine, memero bona kekeni, bona noho-hedoa taudia danu, vairadiai.