16
1 Iehova ena hereva na Iehu Hanani enai e kau, Baasa latanai.
2 Eto, Ḡahu amo na abimu isi, egu bese Israel ihakauna tauna ai na halaomu; a oi na Ieroboam ena dala ai vada o raka, egu bese Israel vada o hakaraia dika, bona edia kara dika amo vada o habadugu.
3 Una dainai, lau ese Baasa bona ena iduhu baina negedia daure; emu iduhu na Ieroboam Nebata ena iduhu heḡereḡerena ai baina halaoa.
4 Baasa ena iduhu tauna ta hanua ai bema mase, sisia ese bae ania; eiava ta ma tano paka ai bema mase, atai manudia ese bae ania.
5 Baasa ena kara oredia, ede ede e kara tomava, bona ena siahu herevadia, na Israel Pavapavadia Sisigadia Bukana ai vada e hetore, ani?
6 Bena Baasa na tubu tama dekediai e mahuta; Tirisa ai e guria. Ia gabuna ai, ia natuna Elaha e lohia.
7 Iehova ena hereva na peroveta tauna lehu Hanani ena amo ma e kau, Baasa mai ena iduhu taudia ida latadiai, ena kara dika iboudiai Iehova vairanai e karava ḡaudia ai, ia imana gaukaradia amo e habadua, Ieroboam ena iduhu ida vada e heḡereḡere bona e habuaia tari dainai.
King Elaha
8 Asa, Iuda pavapavana, ena laḡani iharuahui-tauratoina ai, Elaha Baasa ese Israel e lohiaia matama, Tirisa ai; laḡani rua hona e lohiaia.
9 A ena hesiai tauna Simiri, ena kariota oreana kahana biaguna, ese ia ihadikana dalana e tahua. Elaha na Tirisa ai, Arasa ena ruma ai e inuinu ela bona e kekero. Hari Arasa na pavapava ena ruma igimana tauna, Tirisa ai.
10 Una negana ai Simiri e raka vareai, e rahua mase, e alaia; bena gabuna ai e lohia. Unu na Asa, Iuda pavapavana, ena laḡani iharuahui-hituna lalonai.
11 Ia e lohia matama negana ai, ena terono ai e helai kau dinana ai, ia ese Baasa ena iduhu taudia iboudiai e aladia ore; varavarana maruanena ta eiava turana maruanena ta se roho mauri.
12 Taunabunai, Simiri ese Baasa ena iduhu idoinai e habuaia tari, Iehova ese ena peroveta tauna Iehu uduna amo Baasa latanai e gwauraia herevana heḡereḡerena;
13 Baasa bona natuna Elaha edia kara dika daidiai, bona idia raruosi ese Israel besena e hakaraia dika dainai, bona edia kaivakuku amo Iehova, Israel Diravana, e habadua dainai.
14 Elaha ena kara orena, ede ede e kara tomava, sivaraidia na Israel Pavapavadia Sisigadia Bukana ai vada e hetore, ani?
King Simiri
15 Asa, Iuda pavapavana, ena laḡani iharuahui-hituna ai, Simiri na dina hitu Tirisa ai e lohia. Una negana ai tuari taudia na Gibeton, Filistia taudia edia hanua ta, ituari-henina ela, e koua heḡeḡe.
16 Tuari oreana na edia taruha ai harina e kamonai, Simiri ese hanua pavapavana ihadikana dalana e tahua, bona vada e alaia mase. Taunabunai, una dina ai Israel idoinai ese Omri, tuari oreana biaguna, e abia, Israel pavapavana ai e halaoa, taruha ai.
17 Taunabunai, hari Omri na Gibeton amo e dae ela, bona Israel idoinai ia ida; bena Tirisa e koua heḡeḡe.
18 Simiri ese e itaia, idia ese hanua vada e abia, bena ia ese hanua pavapavana ena ruma laloma daiutuna e haginia tutuka ḡauna lalonai e raka vareai, bena ia sibona daenai e doua, bena e mase.
19 Una na ena kara dika daidiai, Iehova vairanai e kara havara bona Ieroboam ena dala ai e raka, kara dika e karava bona Israel danu e hakaraia dikava, daidiai.
20 Simiri ena kara orena, bona ena hahedika karana, sivaraidia na Israel Pavapavadia Sisigadia Bukana ai vada e hetore, ani?
King Omri
21 Bena Israel taudia na haheparara; kahana na Tibni Ginata murinai e raka, hanua pavapavana ai bae halaoa eto; ma kahana na Omri murina amo e raka.
22 A Omri murinai e raka taudia ese Tibni murinai e raka taudia na e hadareredia. Taunabunai, Tibni e mase, bona Omri na pavapava ai ela.
23 Asa, Iuda pavapavana, ena laḡani ihatoiahui-tana ai, Omri ese Israel e lohiaia matama; ena lohia laḡanidia na gwauta-rua. Laḡani tauratoi ia ese Tirisa ai e nohova.
24 Bena ia ese Samaria ororona na Semere ena amo e hoia; davana na silver talent rua. Bena ia ese maḡuna e karaia, bona hanua e hadaia, ladana e hatoa Samaria, ororo biaguna Semere inemaina.
25 Omri na Iehova vairanai e kara havara, e gunalaia taudia iboudiai edia kara havara ia ese e hereadia.
26 Badina be ia ese Ieroboam Nebata ena dala ai e rakava, bona kara dika ai, ia ese Israel taudia e hakaradia dikava, Iehova, Israel Diravana, e habadua, edia kaivakuku daidiai.
27 Omri ena kara orena, bona ena siahu e hahedinaraia, sivaraidia na Israel Pavapavadia Sisigadia Bukana ai e hetore ani?
28 Bena Omri na tubu tama dekediai e mahuta, Samaria ai e guria; bona natuna Ahaba ese ia gabuna ai e lohia.
King Ahaba
29 Asa, Iuda pavapavana, ena laḡani ihatoiahui-taurahanina ai, Ahaba Omri ese Israel e lohiaia matama. Ahaba Omri ese laḡani ruahui-rua Israel e lohiaia, Samaria ai.
30 Ahaba Omri na Iehova vairanai e kara havara; e gunalaia taudia iboudiai na ia ese e hereadia.
31 Ia na e laloa Ieroboam Nebata ena kara dika daladia ai baine raka na ḡau pipikina; una dainai ia ese lesebel, Etebaal, Sidono pavapavana, natuna hahinena, e adavaia; bona ela, Baal isiaina e lao heniava bona e toma henia dihova danu.
32 Ia ese Baal ena dubu auta e haginia, Samaria ai; lalonai Baal ena ihaboulaina patana ta danu e larebaia.
33 Ahaba danu au-tubua helaḡana ta e haginia. Ahaba ese Iehova, Israel Diravana, e habadua herea, e gunalaia taudia Israel pavapavadia iboudiai na ia ese e hereadia.
34 Iena nega ai Hiele, tau Betele, ese Ieriko e hadaia; ruma badidia e haginidia davana na natuna roboana Abiram, bona ikoukou e haginidia davana na natuna tau-muritai Segubu, Iehova ena hereva Iosua Nunu uduna amo e gwauraia heḡereḡerena.