18
Elia na Ahaba dekena ela
Dina hoho vada ela, bena laḡani ihatoina ai Iehova ena hereva na Elia enai e kau, eto, Aola, Ahaba enai ba hedinarai, bena medu na tanobada ai baina hadihoa. Taunabunai Elia na ela, Ahaba enai baine hedinarai totona. Una negana ai doe na bada herea Samaria ai. Bena Ahaba ese Obadia e boiria; ia na ruma biaguna tauna. (Hari Obadia ese Iehova e matauraia bada; bona Iesebel ese Iehova ena peroveta taudia e aladiava negana ai na Obadia ese peroveta taudia sinahu-ta e abidia, imahui imahui amo kohua ai e hunidia, bona aniani bona ranu e henidia.) Ahaba ese Obadia e hamaoroa, eto, Tano ba rakaia hanai, ranu gabudia iboudiai bona koura iboudiai ba itadia; readia rei taina baita davaria, bena hosi bona doniki baita hamauridia, bona mauri ḡaudia haida na basie mase. Taunabunai raruosi na tano e hapararaia, bae rakaia hanai totona; Ahaba sibona kaha ta ela, ma Obadia sibona kaha ta ela.
Obadia na dala ai e rakava ai na Elia ese e davaria. Bena Obadia na dibana ia, bena e goru diho, eto, Elia e, egu lohia, ena oi a? Ia ese e haere henia, eto, Lau binai. Aola, biagumu ba hamaoroa, baoto “A itaia, Elia na iniseni ai”. Obadia eto, Egu dika be dahaka, bena emu hesiai tauna na Ahaba imana ai bavatogu, baine alagu totona a? 10 Iehova, emu Dirava, e maurimu heḡereḡerena, egu lohia ese bese ta eiava basileia ta enai oi itahumu ai se hakwabua; bona idia bema toma “Ia na dia iniseni ai” negana ai, ia na una basileia eiava una bese edia amo hereva aukadia bema abi, idia ese asie davarimu. 11 Harihari, oi na o tomu “Aola, biagumu ba hamaoroa, baoto: Elia na iniseni ai”. 12 Matona, emu amo baina raka oho, Iehova ena Lauma na maoromaoro baine abimu, asi dibagu gabuna baine laohaimu; bena Ahaba baina hamaoroa bona ia basine davarimu negana ai, ia ese lau baine alagu mase; ena be lau na oiemu hesiai tauna bona merogu negana amo Iehova vada na matauraia. 13 Ta ese egu lohia vada e hamaoromu a, lau ede na kara toma, Iesebel ese Iehova ena peroveta taudia e aladia mase negana ai? Iehova ena peroveta taudia sinahu-ta na abidia, imahui imahui amo kohua ai na hunidia, bona aniani bona ranu na henidia. 14 A harihari oi na o tomu “Aola, biagumu ba hamaoroa, baoto ‘Elia na iniseni ai’ ”; bena ia ese baine alagu mase. 15 Elia eto, Iehova Sabaota, vairanai na ginimu Diravana, e maurimu heḡereḡerena, lau na momokani ia vairanai baina hedinarai, hari ina dina ai. 16 Taunabunai, Obadia na Ahaba ihedavari-henina ela, e hamaoroa; bena Ahaba na Elia ihedavari-henina ela.
17 Ahaba ese Elia e itaia. Bena Ahaba ese e hereva henia, eto, Israel iharaivana taumu, ena oi a? 18 Ia ese e haere, eto, Lau ese Israel asina haraivaia; a oi hari, oi bona tamamu ena iduhu ese. Badina be Iehova ena haheḡani vada o rakatanidia, bona Baal muridiai vada o raka. 19 Taunabunai, harihari a hesiai, Israel taudia iboudiai lau dekegu ai ba haboudia, Karamele ororona ai, bona Baal ena peroveta taudia sinahu-hani imahui bona Asera ena peroveta taudia sinahu hani, Iesebel ena pata ai e anianimu taudia.
Karamele ororona ai
20 Taunabunai, Ahaba ese Israel taudia iboudiai e boiridia, bona peroveta taudia e haboudia, Karamele ororona ai. 21 Bena Elia ese taunimanima iboudiai e raka henidia kahi, e hereva henidia, eto, Lalo rua ai ba raka ege raka ege ela bona edena nega? Bema Iehova na Dirava, ia murina ai ba raka; a bema Baal, ia murina amo ba raka. Bena taunimanima na hereva ta ai asie haere henia.
22 Bena Elia ese taunimanima na e hamaorodia, eto, Lau na Iehova ena peroveta tauna, lau mo sibogu noho, a Baal ena peroveta taudia na sinahuhani imahui. 23 Boromakau mamaruanedia rua ba henimai; bena idia ese ta bae abia hidi, bae ivaia sisi, au rakuraku latanai bae atoa kau, a lahi basie karaia. A lau be boromakau maruanena iharuana do baina heḡaeḡaelaia, au rakuraku latanai baina atoa, a lahi basina karaia. 24 Bena umui ese emui dirava ladana ba hahanea, a lau ese Iehova ladana baina hahanea; bena edena dirava na lahi amo baine haere, ia hari Dirava. Taunimanima iboudiai na e haere, eto, Hereva namona bunai.
25 Bena Elia ese Baal ena peroveta taudia e hamaorodia, eto, Umui ba guna. Boromakau maruanena ta bavabia hidi, ba heḡaeḡaelaia; badina be umui na hutuma. Bena emui dirava ladana ba hahanea; a lahi basio karaia.
26 Bena e henidia boromakauna maruanena na idia ese e abia, e heḡaeḡaelaia; bena Baal ladana e hahanea, daba amo ela bona dina tubua eto, Baal e, a haere henimai. A asi gado ta, bona ta se haere. Bena ihaboulaina patana e raka ege raka egea heḡeḡe. 27 Dina tubua ai Elia ese e hevaseha henidia, eto, A lolo badabada, badina be ia na dirava ta; reana e helalomu, eiava vada e hamurimuri, eiava vada eha laolao; eiava reana e mahutamu bena vada ba haoa. 28 Bena idia na e lolo badabada, bona vaia edia kara dare bona io amo sibodia e heivava, ela bona raradia e aru lohilohiva. 29 Dina tubua amo ma e lolo, ela bona boubou ḡaudia ihahelaḡadia negana e kau; a asi gado ta; ta se haere, bona ta se kamonai.
30 Bena Elia ese taunimanima iboudiai e hereva henidia, eto, Dekegu a raka kahi mai. Bena taunimanima iboudiai ese e raka henia kahi. Bena ia ese Iehova ena ihaboulaina patana, vada e hegiḡi dobi ḡauna, ma e larebaia lou. 31 Elia ese nadi gwauta-rua e abidia, Iakob natuna edia iduhu ihaheḡereḡeredia. (Una na Iehova ena hereva ienai e kau, eto. “Oi ladamu bae hatoa Israel”, tauna.) 32 Unu nadi amo ia ese ihaboulaina patana e larebaia, Iehova ladana ai; bena dadaira ta e ḡeia heḡeḡe, ena bada na hadohado nadinadidia bosea rua bema hahonua na heto. 33 Au rakuraku e lae heḡaeḡae, bena boromakau maruanena na e ivaia sisi, au latadiai e atoa kau. Bena eto, Hodu auhani ranu amo ba hahonudia, gole-oho boubouna ḡauna latanai ba seia, bona au latadiai danu. 34 Ma eto, A haruaia; bena nega iharuana e karaia. Ma eto, Ma a hatoia; bena nega ihatoina ma e karaia. 35 Bena ranu ese ihaboulaina patana e arua heḡeḡe, bona dadaira na e utua dae.
36 Boubou ḡaudia ihahelaḡadia negana e kau. Bena peroveta tauna Elia na e raka kahira, eto, Iehova e, Abraham bona Isaak bona Israel edia Dirava, hari dirla ai baine hedinarai oi na Israel Diravana, bona lau na emu hesiai tauna, bona ini ḡau iboudiai na oiemu hereva dainai vada na kara. 37 A haere henigu, Iehova e, a haere henigu; bena ina bese taudia na bae diba oi Iehova na Dirava, bona oi ese lalodia vada o haloudia. 38 Bena Iehova ena lahi e moru dobi, hari ḡole-oho boubouna ḡauna e haḡolea oho, bona au, bona nadi, bona ḡahu; bona dadaira ranuna danu e hakaukaua.
39 Taunimanima iboudiai ese e itaia, bena idia na e goru goru diho, eto, Iehova, ia na Dirava; Iehova, ia na Dirava. 40 Bena Elia ese e hamaorodia, eto, Baal ena peroveta taudia a dabaidia tao, ta basine roho mauri. E dabaidia tao; bena Elia ese e laohaidia, sinavai maraḡina ladana Kison badibadinai e aladia mase.
41 Bena Elia ese Ahaba e hamaoroa, eto, Aola, bavaniani, ba inuinu; badina be medu guruna na e maimu. 42 Taunabunai Ahaba na ela, baine aniani bona baine inuinu totona. A Elia na Karamele dorina e dae ela; bena tano ai e igo diho, vairana na tuina padadiai e atoa. 43 Bena ia ese ena hesiai tauna e hamaoroa, eto, Aola, davara kahana ba raraia. Ia na ela, e roha lao, eto, Ḡau ta lasi. Ma eto, A lou lao nega hitu. 44 Nega ihahituna ai, ia na eto, A itaia, ori maraḡina ta, tau ta imana na heto, davara amo e daemu. Bena Elia eto, Aola, Ahaba ba hamaoroa, baoto “Emu kariota bavabia heḡaegae, ba diho baola, medu ese baine laomu ahu na garina”. 45 Nega sisina taina ela, bena guba e dubaia ahu, mai orina mai laina ida, bona medu na bada herea. A Ahaba na e gui, Iesrele ela. 46 Bena Iehova imana na Elia latanai; bena ena rami e hekasilaia bona Ahaba vairanai e heau, ela bona Iesrele ikoukouna.