☰ LUKA 22
22
Iuda ese Iesu taoma e torea
1 Asie-hatubua-flaoana ariana, ladana Lagau-hanai, vada e kahira-kahira. 2 Bena hahelaḡa taudia bona itorena taudia ese ia ialana dalana e tahua, badina be idia na aru taudia garidia e gari. 3 Una negana ai Satana ese Iuda Iskariote, gwauta-rarua tauna, e boloa; 4 bena ia na vada ela, hahelaḡa taudia bona Dubu Helaḡa biagudia ida e henega, Iesu ede baine henidia toma. 5 Idia na vada e moale, e gwau henia hamata, moni bae henia eto. 6 Ia eto, Namo. Bena nega e naria, aru taudia lasihidia ai ia ese Iesu baine henidia.
Aria e karaia heḡaeḡae
7 Asie-hatubua-flaoana Ariana dinana, Lagau-hanai mamoedia ialadia dinana, e kau. 8 Bena Iesu ese Petro bona Ioane e siaidia, eto, Aola, Lagauhanai ba karaia heḡaeḡae, bena baita ania. 9 Raruosi eto, Edeseni ai baia karaia heḡaeḡae? 10 Bena ia ese e hamaorodia, eto, Hanua badana ai ba raka vareai, tau ta hodu baine ehea ba itaia, bena ia baine dae kau rumana ai ba dae kau. 11 Bena una ruma biaguna ba hereva henia, baoto “Hahediba tauna e tomu, vadivadi daiutuna be edena, egu hahediba ida Lagau-hanai baia ania?” 12 Bena ia ese atai daiutuna badana ta baine haheitalaimui, vada e iravaia vaitani. Unuseni ai ba heḡaeḡae.
13 Bena raruosi ela, ia ese e gwaurai guna ḡaudia e davari; bena Lagauhanai e dabaraia.
Anibou Helaḡa
14 Negana vada e gini dae ai, ia na ena aposetolo taudia ida e ege diho. 15 Bena ia ese e hereva henidia, eto, Vada na ura bada hari ina Lagauhanai baitama ania hebou guna, murinai hisi bama ani. 16 Badina be na hamaoromuimu, lau na Lagau-hanai basina ania lou ela bona anina korikori baine hedinarai Dirava ena basileia lalonai. 17 Bena kehere ta e abia, e hanamoa, eto, Ina na avabia, iboumui ai ba inua. 18 Badina be na hamaoromuimu, lau na vine ranuna basina inua lou ela bona Dirava ena basileia baine kau.
19 Bena flaoa atagana ta e abia, e hanamoa, e bitua, e henidia, eto, Lau taugu binai, umui daimui ai vada e heni; ini ba kara toma, lau ilalolaigu. 20 E aniani vaitani, bena ia ese kehere ma e abia, eto, Ina kehere na herohemaino matamatana lau raragu ai, umui daimui ai baine hebubu. 21 Taogu itorena tauna imana na pata latanai, ina lau ohegu ai. 22 Momokani, Taunimanima Natuna vada be laomu, e gwaurai guna heḡereḡerena, a taona itorena tauna madi ihabaina.
23 Bena sibodia e henanadai heheni, idia daika unu baine kara toma.
24 Ma sibodia e hapapahuahu heheni, idia daika vada e herea. 25 Bena ia ese e hamaorodia, eto, Bese idau-idau edia pavapava ese e lohiadiamu; bona hanua idau-idau taudia ese edia lohia e heatolaidiamu. 26 To umui na dia unuheto: umui bogaragimui ai tau guna na tau muritai ai bainela, bona hahekau tauna danu hesiai tauna ai bainela. 27 Hereana be daika: aniani gabuna ai e ege dihomu tauna, eiava hesiai tauna? Aniani gabuna ai e ege dihomu tauna ani? Lau be umui bogaragimui ai hesiai taugu na heto. 28 A umui be e dibaḡaniguva negadia ai dekegu ai o noho tarikatarikava taumui; 29 taunabunai, Tamagu ena basileia ta lauegu vada e gwauraia heḡereḡerena, lau danu basileia ta umui emui na gwauraiamu; 30 bena egu basileia lalonai egu pata ai bavaniani bona ba inuinu, bona terono ai ba helai kau, bena Israel iduhudia gwauta-ruaosi ba hahemaoro henidia.
31 Simona e, Simona e, na hamaoromuimu, Satana ese umui iboumui ai vada e gwauraimui, baine tapomui hidi uit na heto. 32 A lau ese emu vada na ḡuriḡuri, emu abidadama basine darere. Bena lalomu baine lou negana ai ma tadikakamu ba hagoadadia. 33 Ia eto, Lohiabada e, lau baina bamomu ela bona dibura rumana, ela bona mase. 34 A Iesu eto, Petro e, na hamaoromumu, kokoroku do basine tai, oi ese hatoi ba ḡoregu, baoto “Lau na asi dibagu ia”.
35 Ma eto, Lau ese na siaimuiva negana ai, asi emui vaina, asi emui moda, asi emui tamaka, o raka, umui na ḡau ta ai o dabu a? Idia eto, Lasi. 36 Ia eto, A harihari ta mai ena vaina, baine abia kau; ta mai ena moda danu unuheto; ta asi ena dare, ena dabua amo dare baine hoia. 37 Badina be na hamaoromuimu, ina e torea herevana anina be lauegu ai baine vara; eto, Ia na kara havara-havara taudia ida vada e duahidia hebou. Momokani, una hereva be lauegu ai baine ḡuḡuru. 38 Idia eto, Lohiabada e, dare aurua o ini. Ia eto, Vada heḡereḡere.
Getesemane
39 Bena e raka lasi, vaia ena kara Olive ororona ela; ena hahediba danu ia murinai e raka. 40 Una gabu ai e kau, bena ia ese e hamaorodia, eto, Ba ḡuriḡuri, hedibaḡani ese baine butumui tao na garina. 41 Bena ia sibona e raka siri, nadi ta bema tahoa sisivana; bena e hetuitui, e ḡuriḡuri, 42 eto, Tamagu e, lalomu bema heḡereḡere ina kehere na egu amo boma abia oho; to dia lauegu ura, oiemu ura hari. 43 Bena aneru ta guba amo ienai e kau, ihagoadana totona; 44 a hisihisi bada ese ia lalona e gugubaia, bena e ḡuriḡuri goadagoada ela bona varahuna tano ai e moru, rara komutudia na heto.
45 Ḡuriḡuri amo e tore isi, hahediba dekedia e lou ela, mahutadia ai e davaridia, daradia e doko dainai. 46 Bena ia ese e gwau henidia, eto, Dahaka dainai o mahutamu? A tore isi, a ḡuriḡuri, hedibaḡani ese baine butumui tao na garina.
Iesu e dabaia tao
47 Ena hereva lalonai, hutuma vada e gini dae; luda, gwauta-rarua tauna ta, ese e gunalaidia, bena Iesu iharahuna totona e raka kahi lao. 48 A Iesu eto, Iuda e, Taunimanima Natuna haherahu amo ba revaia a? 49 Ia dekenai e gini taudia ese e itaia dahaka baine vara, bena e nanadaia, eto, Lohiabada e, dare amo baia dapa-dapa a? 50 Bena idia ta ese hahelaḡa tauna badana ena hesiai tauna taiana idibana e dapaia oho. 51 A Iesu eto, Mani do. Bena taiana e daua toho, vada e namo.
52 Bena Iesu ese ia idabai-taona ela taudia, hahelaḡa taudia bona Dubu Helaḡa biagudia bona hanua tau-badadia, e hereva henidia, eto, Umui na e kara dadidadi tauna ta idabai-taona oma na heto, mai daremui bona mai karevamui, a? 53 Dina iboudiai Dubu Helaḡa lalonai ta gini hebouva; matona, asio dabaigu tao. To ina na vada emui nega; dibura ena siahu negana.
Petro e heḡore
54 Bena idia ese e dabaia tao, hahelaḡa tauna badana ena ruma ai e hakaua vareai. Petro danu ia murinai e raka, to mai padana. 55 Haida ese maḡu lalonai lahi e haraia, bena e helai heḡeḡe; Petro danu idia dekedekediai e helai.
56 Bena hesiai hahinena ta ese lahi diarina ai e itaia; bena e raraia, eto, Ena tau na ia bamona ta. 57 To ia na e heḡore, eto, Hahine e, lau na asi dibagu ia.
58 Asi vanahana ta ese ma e itaia, eto, Oi danu idia bamodia ta. A Petro eto, E tau, lau na lasi.
59 Hora ta sisivana vada ela, ta ma e hereva goadagoada, eto, Momokani, ina tau na ia bamona ta, badina be ia danu Galilea tauna. 60 A Petro eto, E tau, emu hereva na lalogu seme parara. Bena herevana ai kokoroku e tai.
61 Bena Lohiabada ese Petro e roha henia kerehai, e raraia. Una negan; ai Petro ese Lohiabada ena hereva e helalolaia une, eto “Kokoroku do basine tai, oi ese hatoi ba ḡoregu”. 62 Bena Petro vada e raka lasi, e tai dikadika.
Iesu e hahemaoro henia kaunsil taudia vairadiai
63 Iesu e dogoa tao taudia ese e ḡonaḡonalaia, bona e dadabaia. 64 Matana danu dabua amo e kou, e pataia, e nanadaia, eto, E patamu tauna a gwauraia, daika ese? 65 Bona hereva dikadia diaḡau e gwaurai henia.
66 Daba matana ai, hanua tau-badadia e hebou, hahelaḡa taudia bona itorena taudia ida, bena kaunsil vairadiai e hakaua lao. Eto, 67 A hamaoromai, oi na Keriso eiava? Ia eto, Bama hamaoromui, to basioma kamonai; 68 bona bama nanadaimui, to basioma haere. 69 A harihari ela, Taunimanima Natuna na Dirava siahuna idibana kahana ai baine helai. 70 Bena iboudiai eto, Be, oi Dirava Natuna a? Ia eto, O ena vada o gwaumu. 71 Idia eto, Dahaka dainai hahebade herevadia ta tahumu? O ina sibona uduna ai e herevalaimu ta kamonaimu.
☰