24
Iesu e tore isi lou
Pura dinana gini-gunana ai, idia na daba galuma-galumana ai gara ela, muramura mai bonadia, e abi heḡaeḡae gaudia, na e laohai. A gara ikoulaina nadina vada e hekure oho, dauhai heatona ai e davaria. Bena kohua lalonai e raka vareai, a Lohiabada Iesu tau-anina asie davaria. Una dainai e daradara. Bena tatau rarua dekediai e gini, mai dabua hururu-hururudia ida. Hahine e gari, tano ai e goru diho. A raruosi ese e hereva henidia, eto, Dahaka dainai mauri tauna mase gabuna ai o tahuamu? Ia na dia iniseni ai: vada e tore isi. Galilea ai e nohova negana ai e hamaoromui herevana na ba laloa; eto “Taunimanima Natuna na dika taudia ediai taona bae torea, bae hasatauroa, a dina ihatoina ai ia na do baine tore isi lou”. Bena idia ese ena hereva e helalolaia une.
Bena kohua e rakatania, e lou ela, unu ḡau iboudiai gwauta-taosi mai bamodia ida e hamaorodia. 10 Hahinedia bini: Maria, hane Magdala; bona Ioana; bona Maria, Iakobo sinana; bona bamodia haida. Idia ese hari kara aposetolo taudia e hamaorolaidia. 11 To edia hereva mamina na gori na heto, bena asie abia dae. 12 A Petro e tore isi, e heau lao, gara lalonai eha igoa, dabua mo e ita; bena ena ruma e lou henia, e vara ḡaudia e hoalai.
Iesu na Emausa dalana ai e hedinarai
13 Una dina ai, idia rarua na hanua maraḡina ta, ladana Emausa, ela: Ierusalem bona una hanua padadia na maila hitu sisivana. 14 Dala ai idia na hari e vara ḡaudia e herevalai heheniva, 15 bena edia hereva-hereva lalonai Iesu na dekedia e raka kahi lao, e bamodia. 16 A matadia asie papa; asi dibadia ia. 17 Ia eto, Umui na dahaka dala ai o herevalai hehenimu? Bena raruosi e gini, vairadia e hua. 18 Bena idia ta, ladana na Kleopa, ese e haere henia, elo, Oi na Ierusalem ai o noho edeamu, una dainai hari e vara ḡaudia na asi dibamu a? 19 Ia eto, Dahaka ḡau? Idia eto, Iesu, Nasaret tauna, sivaraina. Ia na peroveta tauna, Dirava vairanai bona taunimanima iboudiai vairadiai, ena kara bona ena hereva danu mai siahudia. 20 A hahelaḡa taudia bona hanua Iohiadia ese e revaia mase, e hasatauroa. 21 A ai banava ato ia na Israel edia hahemauri tauma. Dina toi vada ela unu ḡau e vara; 22 harihari emai hahine haida ese vada e hahoamai. Idia na daba matana ai gara ela, 23 to tau-anula asie davaria; bena e lou ema, e tomu aneru haida e itadia, bona unu aneru ese e hamaorodia ia na vada e mauri lou eto. 24 Bena bamomai haida danu ma gara ela, hahine edia hereva heḡereḡerena ai e davaria, to ia be asie itaia.
25 Bena ia ese e gwau henidia, eto, Kavakava taumui, laloduhu taumui, peroveta taudia edia hereva asio abi daemu. 26 Dia maoro a, Keriso hisi unu baine ani tonla bona hairaina baine abia? 27 Bena Mose bona peroveta taudia edia buka ai ia sivaraina e tore herevadia iboudiai anidia ia ese e hadibalaidia.
28 E lao henia hanuana vada e kahira-kahira, bena ia na baine raka hanai eto. 29 To raruosi ese e rua, eto, Mani baita noho, badina be ado vada eme rahi, dina vada be dihomu. Bena ia na idia ida ruma ai e dae kau. 30 Tatoiosi aniani gabuna ai e ege diho, bena ia ese flaoa atagana ta e abia, e hanamoa, e bitua, raruosi e henidia. 31 Bena matadia e papa; dibadia ia. Bena vairadia amo vada e puki oho.
32 Bena raruosi e hereva heheni, eto, Dala ai e hereva henida, bona Buka Helaḡa anina e hadibalaida negana ai, laloda e siahu ani? 33 Bena idia e tore isi, lerusalem e lou henia, gwauta-taosi mai bamodia ida heboudia ai e davaridia. 34 Idia ese raruosi e hamaorodia, eto, Momokani, Lohiabada vada e tore isi, bona Simona enai vada e hedinarai. 35 Bena raruosi ese dala ai e vara ḡaudia na e hamaorolaidia, bona flaoa atagana ibituna ai lalodia e parara herevana danu.
Iesu bogaragidiai ma e hedinarai
36 Edia hereva lalonai, Iesu bogaragidiai e gini, bena eto, Maino emui ai baine mia. 37 Idia na kudoudia e hetaha, bona gari ese e butudia tao; banava eto laulau ta. 38 To ia eto, Dahaka dainai kudoumui e hetahamu? Dahaka dainai o daradaramu? 39 Imagu bona aegu ame ita: lau binai. Ame daugu toho, vada ba diba; badina be laulau na asi hidiona bona asi turiana, hari lau o itagumu heḡereḡerena. 40 Unu e gwau toma, bena imana bona aena e haheitalaidia. 41 To edia moale bona edia hoa daidiai idia na dounu e daradara. Bena ia ese e nanadaidia, eto, Amui taina mia eiava? 42 Idia ese gwarume taina, vada e gabua ḡauna, e henia; 43 bena ia ese e abia, idia vairadiai e ania.
44 Ia ese e hereva henidia, eto, Ta noho hebouva negadia ai na na hamaoromuiva, Mose bona peroveta taudia edia buka ai bona salamo ai lau sivaraigu e tore herevadia iboudiai vada bae momokani. 45 Bena ia ese Buka Helaḡa anina e hadibalaidia, ela bona lalodia e parara. 46 Ma e hamaorodia, eto, mi vada e torea toma, Keriso hisi unu baine ania toma, bona dina ihatoina ai mase amo baine tore isi lou; 47 bena ia ladana helalo-kerehai bona dika igwau-taodia bae harorolai rohoroho, lerusalem ai bae matamaia ela bona tanobada besedia iboudiai bae harorolai henidia. 48 Umui na ini ḡau ihamomokanidia taumui. 49 A lau ese Tamagu e gwauraia hamata ḡauna baina siaia, latamui ai baine kau; taunabunai, umui na Ierusalem ai ba noho ela bona atai amo baine diho siahuna na do bavabia.
Iesu guha ai e heabi dae
50 Bena ia ese e hakaudia lasi, ela bona Betania vada e kahikahi. Bena imana e dudui isi, e hanamodia. 51 Ena hahenamo lalonai, ia na idia edia amo e heabi oho, e heabi dae guba ai. 52 Idia ese e toma henia diho; bena mai moaledia ida Ierusalem e lou henia. 53 Bena Dubu Helaḡa e loulou henia, nega iboudiai Dirava e imodaia.