4
1 Gold vada e hoḡohoḡo,
gold ḡoeva-daena vada e idau;
nadi helagadia vada eme heḡiḡi rohoroho,
ariara iboudiai dokodia ai.
2 Siona natuna mamaruanedia herea-daedia,
davildia na gold ḡoevaḡoevana metaudia heḡereḡeredia ai,
madi, ihabaidia, raro urodia ida vada e haheḡereḡeredia,
uro ikarana tauna imana ese e kara ḡaudia na heheto.
3 Uda sisiadia ese natudia e ubudi unu,
rata na e henidiamu;
a egu bese natuna hahinena vada e daḡedaḡe,
uda kokokokodia na heheto.
4 Rata e topoamu merona malana na
ranu mase dainai uduna atai maona ai e kape daemu;
memero na aniani dainai e noinoimu,
a ta ese adia se henidiamu.
5 Aniani manoka-manokadia e aniva taudia na
ariara ai e masemu;
dabua kakakakadia idokilaidia e manadava taudia na
kahu e negeamu gabudia ai e hekuremu.
6 Badina be egu bese natuna hahinena ena kara dika davana ese
Sodoma ena kara dika davana vada e hereaia;
una hanua na e heḡiḡi dobi haraga-haraga,
tau ta ese se daua toho negana ai.
7 Ena lohia taudia na ḡoḡoeva-ḡoḡoeva, snow ena ḡoevaḡoeva e hereaiamu;
idia na kukuroka-kukuroka, rata ena kurokuro e hereaiamu;
tau-anidia na kakakaka, ḡiriḡi ena kakakaka e hereaiamu;
oromadia na mai hairaidia, sapairo nadidia na heheto.
8 Harihari idia vairadia na korema-korema, guma ena korema e hereaiamu;
ariara ai bae itadia taudia basie diba idia na daidia;
kopidia na e makuku turiadia ai,
vada e kakoro au na heto.
9 Dare ai e mase taudia edia moale ese
hitolo ai e mase taudia edia moale e hereaia;
idia na e varoda-varodava,
uma na asi anidia dainai e maseva.
10 Hebogahisi hahinedia imadia ese
natudia adoradia vada e nadudia;
adia vamu ai vada e halaodia,
egu bese natuna hahinena ihabua-tarina ai.
11 Iehova ese ena badu e hasiahua,
ena badu fiaraḡarana e bubua dobi;
Siona ai lahi e ha-araia,
hanua badidia e aradia ore.
12 Tanobada pavapavadia ese asie abia dae,
tanobada taudia iboudiai ese danu,
tuari tauna ta eiava inai tauna ta ese
Ierusalem ikoukoudia lalodiai baine raka vareai diba.
13 Ina na ena peroveta taudia edia kara dika
bona ena hahelaḡa taudia edia kara havara daidiai,
idia ese kara maoromaoro taudia raradia e hahebubu
ia bogaraginai.
14 Idia na mata-kepuludia ai ariara ai e loava,
rara ese vada e hamirodia,
bona tau ta ese
edia dabua na basine dau toho diba.
15 Taunimanima ese e boi henidia, eto,
A siri! Mai miromui!
A siri! A siri! Basio hedau toho!
Bena idia na heau bona loa-evaeva taudia ai ela;
bese idau-idau bogaragidiai taunimanima eto:
Ai dekemai ai basie noho lou.
16 Iehova sibona ese e hakarohodia rohoroho,
ia ese basine haḡeredia lou;
hahelaḡa taudia na asie matauraidia,
bona hanua tau-badadia na asie lalo namo henidia.
17 Matamai e valahu-valahu, hekaha inarina ai,
a gima kava hanaihanaiva dainai;
emai hegima lalonai
hahemauri asi dibana besena a nariava.
18 Taunimanima na ae-gedumai ai e raka dainai
emai ariara ai asia raka diba;
dokomai vada e kahikahi, emai mauri dinadia vada e duahi,
badina be dokomai vada e kau.
19 E hahavamai taudia edia heau ese
guba ugavadia edia roho e hereaia;
ororo ai e hahavamai,
tano ḡaḡaena ai e bani henimai.
20 Iehova ese e horoa tauna, emai mauri laḡana, na
edia guri ai e abia;
a ai ese vada a herevalaia, ato,
Bese idau-idau bogaragidiai ia ikerukeruna ai baia noho.
21 Edom kekenimu e, Usu tanona ai o nohomu,
ba moale, ba hisi dae!
A oiemu ai danu kehere baine kau,
ba kekero, emu dabua ba doki oho, ḡaḡaemu ai ba noho.
22 Siona kekenimu e, emu kara havara davana vada o abia ḡuḡuru,
ma dauhai basine hanohomu;
a Edom kekenimu e, emu kara havara davana baine henimu,
emu kara dika baine hulalai.