25
Laḡani helaḡadia
Iehova ese Mose e hereva henia, Sinai ororona ai, eto, Israel taudia ba hamaorodia, baoto: Baina henimui tanona ai ba kau negana ai, tano ena nega helaḡadia ba badinadia, Iehova ena. Laḡani tauratoi emu uhe ba hado, bona laḡani tauratoi emu vine audia rigidia ba kwamadia heini, huahua ihahohodia totona. A laḡani ihahituna na tano ena laḡa-ani negana, laḡani helaḡana Iehova ena: uhe basio hado emutano ai, bona emu vine audia rigidia basio kwamadia heini. Sibona baine tubu ḡauna na basio utua, bona vine huahuadia bae dobi na basio habou; tano ena laḡa-ani helaḡana bunai. Tano ena laḡa-ani amo amui ba davaria:oi bona emu hesiai tauna bona emu hesiai hahinena bona dekemu ai e ḡaukaramu tauna bona dekemu ai e noho hedoamu tauna, bona emu boromakau bona emu seri iboudiai emu tano lalonai. Tano anina idoinai na amui.
Laḡani helaḡadia hitu ba duahidia, laḡani kavakavadia hitu hitu amo: unu laḡani iboudiai bae hari-ahui taurahani-ta. Bena hua ihahituna dinanaihagwautana ai kibi ba hiriria badabada; herohemaino dinana ai kibi bae hiriri emui tano idoinai. 10 Laḡani iha-imahuina ba hahelaḡaia, bainehelaḡa herea. Una laḡani lalonai iḡui taudia iboudiai bae ruhadia nege. Ia ladana be Iubile: ia lalonai taunimanima iboudiai edia tano korikori bona edia iduhu korikori bae lou henidia. 11 Laḡani iha-imahuina na emui Iubile: ia Ialonai uhe basio hado, bona sibona baine tubu ḡauna basio utua; emui vine danu rigidia basio kwamadia heini, bona huahuadia basio habou. 12 Badina be Iubile laḡanina na helaḡa emui ai: tano anina na bavania, vadaeni.
13 Iubile laḡanina ai umui ta ta ena tano ena tano bavabi lou. 14 Dekemu tauna enai ba hoihoi, basio koia, ia danu basine koimu. 15 Dekemu tauna ena tano ba hoia negana ai, ba laloa, Iubile murinai laḡani hida vada e lao bubuni; ia danu baine laloa, taboro hida do mimia. 16 Bema laḡani momo mimia, davana na baine bada, a bema laḡani gadoi mo mimia, davana na baine maraḡi, badina e hoimu ḡauna be taboro e hoimu. 17 Raruosi basio hekoi heheni, a emui Dirava garina be gari, badina be lau be Iehova, emui Dirava.
18 Taunabunai, egu taravatu bona egu haheḡani ba badinadia bona karadia ba kara; unu amo ba noho namonamo emui tano ai. 19 Tano ese anina baine henimui: bavaniani, ba boga kunu, ba noho namonamo. 20 Ba henanadai reana, baoto “Laḡani ihahituna ai dahaka baia ania, basia hadohado bona basia taboro negana ai?” 21 Benaini, laḡani ihatauratoina ai baina hanamomui, tano anina bavabia, laḡani toi davadia. 22 Bena laḡani ihataurahanina ai emui uhe ma ba hado, a emui uma anidia gunadia do bavani, ela bona laḡani ihataurahani-tana ena taboro negana baine kau. 23 Tano tabasio hoia vaitani, badina be tano na lauegu, umui ese o noholaiamu, e kara lauegu vadivadi na heto. 24 Ba hoi tanodia iboudiai na biagudia gunadia bae abi lou diba.
25 Tadikakamu ta baine ogoḡami, bena ena tano kahana baine hoia, ia varavara-dosina ese una tano davana baine karaia, baine abia lou. 26 Bema asi iabi-louna tauna ta, a gabeamo ogoḡami tauna ma baine taḡa, iabi-lounabaine heḡereḡere, 27 ia na baine haeroa, laḡani hida vada ela ia ese e hoia, bena davana orena baine heni lou, ena tano ma baine abia lou. 28 A bema imana baine tuna, iabi-louna basine heḡereḡere, e hoia tauna ese bainebirulaia ela bona Iubile laḡanina; una negana ai tano tauna korikorina ese ena tano baine abia lou.
29 Hanua mai maḡuna lalonai tau ta ese ena ruma baine hoia, moni davana, ia na davana baine heni lou bona ena ruma baine abia lou diba, ela bona laḡani ta baine ore. Laḡani ta lalonai ia ese baine hoia lou diba. 30 A laḡani ta lalonai basine abia lou, una ruma na iena amo e hoia tauna ena ruma korikori ai bainela, iena bona ia garana edia; Iubile laḡanina ai biaguna gunana basine abia Iou. 31 A hanua maraḡidia, asi maḡudia hanuadia, lalodiai na ruma bae hoi be tano bae hoi heḡereḡerena, davadia bae heni lou bona ruma bae abi lou diba, bona Iubile laḡanidia ai biagudia gunadia ese bae abi lou. 32 Ḡau tamona, Levi taudia edia hanua ai, Levi taudia ese edia ruma bae hoi lou diba, laḡani iboudiai. 33 A Levi tauna ta ena ruma basine hoia Iou, ia na Iubile laḡanina ai do baine abia lou. Badina be Levi taudia edia hanua rumadia na edia korikori, Israel taudia bogaragidiai. 34 Bona edia gabi-ruma tanodia na haida ese basie hoi; unu tano na ediatano korikori ela bona hanaihanai.
35 Tadikakamu ta baine ogoḡami, asi ena heubu dalana, oi ese ba ubua, laolao tauna eiava vadivadi tauna na heto. 36 Moni eiava kohu iena amo basio abia; emu Dirava garina ba gari, bona tadikakamu ba hamauria. 37 Moni ba henia eiava aniani ba ubulaia na davadia basio abi. 38 Lau binai Iehova emui Dirava; Aigupto tanona amo na hakaumui lasi, Kanaan tanona baina henimui bona emui Dirava ai bainala totona.
39 Tadikakamu ta baine ogoḡami, bena emu ai sibona baine hehoi, basio kara henia o hoia tauna o kara heniamu heḡereḡerena; 40 a mai davana emu ai e ḡaukaramu tauna eiava noho-hedoa tauna heḡereḡerena oi dekemuai baine noho. Ia na oi isiaimu baine lao heni ela bona Iubile laḡanina; 41 bena emu ruma amo baine raka lasi, ia mai natuna ida, ena ruma taudia bona ena tano korikori baine lou henidia. 42 Badina be idia na lauegu hesiai taudia, Aigupto tanona amo na hakaudia lasi; basio hoidia. 43 Basio hahisihisia; emu Dirava garina ba gari. 44 E noho hetabiramu besedia edia amo emui hesiai taudia bona hahinedia ba hoidia; 45 bogaragimui ai e noho hedoamu taudia edia amo danu natudia emui tano ai e vara na ba hoidia diba, emui iḡui taudia ai baela. 46 Umui murimui ai dihimui ese danu bae abidia, edia korikori; isiaimui bae lao heni hanaihanai. A Israel taudia, varavaramui korikori, na basio hahisihisidia.
47 Bogaragimui ai e noho hedoamu tauna na baine taḡa, bona tadikakamu ta baine ogoḡami, bena hari tadikakamu na sibona baine hehoi, una nohohedoa tauna enai eiava iena ruma tauna ta enai, 48 unu e hehoi toma tauna na bae hamauria diba, tadikakana ese, 49 eiava tamana lahaina ese, eiava varavarana ta ese; eiava ia sibona moni baine davaria negana ai na sibona baine hahemauri. 50 Laḡani bae duahidia, biaguna enai e hehoi negana ela bona Iubile laḡanina; bena iruhana monina na unu laḡani hidaosi ahudia, hesiai tauna mai davana ahuna heḡereḡerena, baine heni. 51 Negana bema daudau, laḡani unuhohodia davadia baine heni, sibona e hehoilai monina amo; 52 eiava negana bema kwadogi, laḡani unuhohodia davadia na biaguna baine henia, laḡani hidaosi mimia heḡereḡeredia ia ese iruhana monina na baine heni. 53 Ia na hesiai tauna mai davana, laḡani ta ta amo e ḡaukaramu, heḡereḡerena ai baine ḡaukara; biaguna ese basine hahisihisia oi vairamu ai. 54 Bema basine heruha guna, ia na Iubile laḡanina ai baine heruha, ia mai natuna ida. 55 Badina be Israel taudia na lauegu hesiai taudia; Aigupto tanona amo na hakaudia Iasi, isiaigu ilao-henina totona. Lau binai Iehova, emui Dirava.