21
Iesu Ierusalem ai e dara dae
1 Idia na e raka ela, Ierusalem vada e kahira-kahira, Betefage ai e kau, Olive ororona badinai. Bena Iesu ese ena hahediba rarua e siaidia guna,
2 e hamaorodia, eto, Vairada hanuana aola, doniki ta hematakauna ai, mai natuna ida, ba davaridia; ba ruhadia, bena ba hakaudia mai.
3 A ta ese baine hereva henimui, baoto “Lohiabada ese e ura henidiamu”, bena baine siaidia.
4 Ina na vada e vara, peroveta tauna ena hereva ihamomokanina, eto,
5 Siona natuna kekenina a hamaoroa,
A itaia, emu Ḡaubada na e maimu,
Manada tauna, doniki doruna ai e helaimu,
Doniki natuna doruna ai.
6 Raruosi vada ela, Iesu ese e haduadia heḡereḡerena e kara;
7 doniki mai natuna ida e hakaudia lao, edia dabua dorudia ai e laha; bena Iesu e helai kau.
8 Bena hutuma bada ese edia dabua dala ai e laha, ma haida ese au rigidia e utu, dala ai e laha.
9 Bena hutuma, mata taudia bona gabe taudia, e hisi dae, eto,
Hosana, David natuna ena!
Lohiabada ladana ai e maimu tauna aita hanamoa.
Atai doriva-dorivana ai Hosana!
10 Ia na Ierusalem ai e kau, bena hanua taudia iboudiai e herou-herou, eto, Ina be daika?
11 Aru taudia e haere, eto, Ina na Iesu, peroveta tauna, Nasaret Galilea amo vada e maimu.
Hoihoi taudia Dubu Helaḡa amo e luludia lasi
12 Iesu Dubu Helaga ai e raka vareai, bena unuseni ai e hoihoiva taudia iboudiai e luludia lasi, moni e senisi taudia edia pata bona pune e hoi taudia edia helai ḡaudia e uhe hebubu.
13 E gwau henidia, eto, Vada e torea, Egu ruma na ḡuriḡuri rumana bae gwauraia; to umui ese dadidadi taudia edia kohua ai ome halaoa.
14 Bena mata-kepulu taudia bona ae-hedairike taudia Dubu Helaḡa ela ia dekenai, bena ia ese e hamauridia.
15 Hahelaḡa taudia bona itorena taudia ese ena hoa karadia e ita, bona memero danu eredia e kamonai, Dubu Helaḡa lalonai e hisi dae, eto “Hosana, David Natuna ena”; bena idia na e badu diliadika,
16 e nanadaia, eto, Edia hereva o kamonaimu a? Iesu eto, Oibe; umui nega ta revareva asio duahia, a? Natudia karukarudia, rata e inumu memerodia, ududia amo heimodai vada o haḡuḡurua.
17 Bena ia ese e rakatanidia, hanua badana amo e raka lasi, Betania ai eha mahuta.
Suke auna asi huahuana
18 Daba ai, ia ese hanua badana ma e lou henia mai hitolona ida.
19 Ia ese suke ta dala isena ai e itaia, bena e lao henia, to huahuana se davaria, rauna mo. Bena ia ese e gwau henia, eto, Oi huahuamu basine dobi, harihari ela bona hanaihanai. Asi vanahana suke na vada e marai vaitani.
20 Ena hahediba ese e itaia, e hoa dikadika, elo, Asi vanahalla suke vada eme marai vaitani.
21 Iesu eto, Na hamaoromui momokanimu, bema mai emui abidadama, bona basioma daradara, hari suke enai e vara heḡeregerena mo basioma karaia, a ina ororo danu boma haḡania, boma toma “Ba heraḡa; davara ai ba henege dobi”; bena unu bema hekara toma.
22 Ḡau iboudiai ḡuriḡuri ai ba noinoi, mai emui abi-dadama ida, vada bavabi.
Dubu Helaḡa ai
23 Ia na Dubu Helaḡa ai ma e raka vareai; bena hahelaga taudia bona hanua tau-badadia ia dekena ela, e hahedibava negana ai, e nanadaia, eto, Edena siahu ai ini ḡau o karamu, bona daika ese ina siahu e henimu a?
24 Iesu ese e haere henidia, eto, Lau danu umui aina nanadaimui: ba haere henigu, bena lau danu ini ḡau na karalaimu siahuna na baina hamaorolaimui.
25 Ioane ena bapatiso be ede amo? Guba amo eiava taunimanima edia amo? Idia ese e hereva heheni, eto, Baitato “Guba amo”, ia baineto “Matona, asio kamonai heniava”;
26 a baitato “Taunimanima edia amo”, aru taudia garidia baita gari, badina be idia iboudiai lalodia e tomamu Ioane na peroveta tauna.
27 Taunabunai, idia ese Iesu e haere henia, eto, Asi dibamai. Bena ia eto, Lau danu ini ḡau na karalaimu siahuna na basina hamaorolaimui.
Sivarai heḡereḡerena: Memero rarua
28 Dahaka o tomamu? Tau ta mai natuna rarua; bena tau guna dekena ela, eto, Natugu, mani aola, hari dina ai egu vine imeana ai ba ha ḡaukara.
29 Ia na e haere, eto, Ḡauka e, ainala. To sela.
30 Tau muritai danu dekena ela, unu e hamaoroa toma. Ia na e haere, eto, Basinala. To gabeamo e helalo, bena ela.
31 Idia raruosi, daika ese tamana ena ura e karaia? Idia eto, Tau muritai ese. Bena Iesu ese e hamaorodia, eto, Na hamaolomui momokanimu, tax gogo taudia bona mata-bodaga hahinedia ese e gunalaimuimu, Dirava ena basileia dalana ai.
32 Badina be Ioane na kara maoromaoro dalana ai dekemui ema, to asio kamonai heniava. A tax gogo taudia bona mata-bodaga hahinedia ese e kamonai heniava; bona umui, ena be edia kamonai o itaiava, to asio helalo kerehaiva, asio kamonai heniava.
Sivarai heḡereḡerena: Imea ireḡuna taudia dikadia
33 Sivarai heḡereḡerena ma ta mani a kamonai. Ruma biaguna ta ese vine imeana e hadoa, maḡuna e ahu, vine imoilaina gurina e ḡeia, hegima koholona e haginia. Bena imea ireḡuna taudia e habadinalaidia; bena hanua daudau vada ela.
34 Huahua negana vada e kahira-kahira, ia ese ena hesiai taudia na imea ireḡuna taudia dekedia e siaidia lao, vine anidia iabidia totona.
35 A imea ireḡuna taudia ese ena hesiai taudia e dabaidia tao, ta e dadabaia, ma ta e alaia mase, ma ta nadi amo e hodoa.
36 Ma idau hesiai taudia diaḡau ia ese e siaidia lao, bena kara heḡereḡeredia idia ese e kara henidia.
37 Gabeamo ia ese natuna idia dekedia e siaia lao, eto, Natugu na bae matauraia.
38 A imea ireḡuna taudia ese e itaia, bena e hereva heheni, eto, Dihina binai; baitama alaia mase, bena imea na vada baita abia iseda.
39 Bena e dabaia tao, imea murimurinai e veria lasi, e alaia mase.
40 Matona, imea biaguna bainema negana ai na unu imea ireḡuna taudia ede baine karadia toma?
41 Idia e haere, eto, Imea ireḡuna taudia dikadia baine aladia ore, imea na ireḡuna taudia idaudia haida baine henidia, bena idia ese huahua negadia ai vine anidia ia dekena bae laohai.
42 Iesu ma eto, Ina revareva asio duahia, a?
Kuma ilarebana taudia ese e dadaraia nadina na
Daiguni nadina ai vada ela;
Ina na Lohiabada ena kara,
Ta itaiamu, ta hoamu.
43 Badina bunai na hamaoromuimu, Dirava ena basileia na emui amo do baine abia oho, bona huahuana baine havara besena baine henia.
44 Una nadi latanai baine moru tauna na baine makohi; a una nadi ese baine kurea tao tauna na baine pata rohoroho, ḡahu na heto.
45 Hahelaḡa taudia bona Farisea taudia ese ena sivarai heḡereḡeredia e kamonai, bena dibadia ia ese idia e herevalaidia.
46 Bena idabai-taona e ura, to aru taudia garidia e gariva, badina be lalodia na e tomava ia na peroveta tauna.