13
Nehemia ena hahekau karadia
1 Una dina ai idia ese Mose ena buka e duahia, taunimanima vairadiai; lalonai e davaria, vada e torea, Amono tauna ta eiava Moab tauna ta na nega ta Dirava ena orea hebouna lalonai basine vareai;
2 badina be Israel taudia asie hedavari henidia ranu bona aniani ida, a Balaam e vatua, baine uduguiraidia totona; ḡau tamona iseda Dirava ese heuduguirai na hahenamo herevana ai e halaoa.
3 Taunimanima na taravatu e kamonai negana ai, idia ese bese idaudia amo e vara taudia na Israel edia amo e abidia oho.
4 Ina kara do se vara negana ai, hahelaḡa tauna Eliasibi, e duanaia eda Dirava ena dubu daiutudia baine biagua tauna, na Tobia bamona,
5 bena ia ese daiutu badana ta e lailaia Tobia ena. Una daiutu na guna idia ese boubou flaoana bona muramura mai bonana bona dubu kohudia, bona aniani bona vine ranuna bona dehoro karoadia ihagwautadia, haheḡani heḡereḡerena ai Levi taudia bona ane-abi taudia bona ikoukou igimadia taudia e henidia gaudia, bona herahia, hahelaḡa taudia e henidia ḡaudia, e haboulaiva daiutuna.
6 Una kara e vara negana ai lau na dia Ierusalem ai; badina be Aratasasta, Babulono pavapavana, ena lohia laḡanina ihatoiahui-ruana ai lau na hanua pavapavana dekena nala. Nega taina vada ela, bena hanua pavapavana na noia baine kahugu nege;
7 bena Ierusalem nama. Una negana ai lau ese hari kara dikana na davaria, Eliasibi ese Tobia iduruna totona vada e karaia, daiutu ta Dirava ena dubu maḡuna ikoukoudia lalodiai e heḡaeḡaelaia iena.
8 Bena na badu dikadika, bena Tobia ena ruma ḡaudia iboudiai na daiutu lalona amo na tahodia lasi.
9 Na hahedua, bena daiutu e haḡoevadia. Bena lau ese Dirava ena dubu kohudia na una daiutu lalonai ma na atodia lou, bona boubou flaoana bona muramura mai bonadia danu.
10 Lau na davaria danu Levi taudia ahudia na asie henidia; una dainai Levi taudia bona ane-abi taudia, ḡaukara e karava taudia, na vada e heau, ta ta ena uma ena uma vada ela.
11 Taunabunai lau ese heitatao taudia na gwau henidia, nato, Dahaka dainai Dirava ena dubu vada o laloa herekwa? Bena na haboudia, bona edia ḡaukara gabudia na henidia.
12 Bena Iuda idoinai ese aniani bona vine ranuna bona dehoro karoadia ihagwautadia na habou-habou rumadia lalodiai e vareailaidia.
13 Bena hahelaḡa tauna Selemia bona itorena tauna Sadok bona Levi tauna Pedaia na duanaidia, habou-habou ḡaudia ibalahenidia taudia ai baela; bona Hanana, Sakuru Matania natuna, na duanaia, idia idurudia tauna ai bainela; badina be idia na kara momokani taudia. Edia ḡaukara na tadikakadia adia bae henidia hagau-hagau.
14 Dirava e, ba lalogu tao, ina kara dainai, bona egu kara namodia egu Dirava ena dubu bona ena ḡaukara ihanamolaidia totona vada na kara ḡaudia na basio lalodia nege.
15 Unu dinadia ai lau ese haida na itadia Iuda ai, idia ese vine huahuadia na dina helaḡa ai e moimoilai, bona uit bali senudia e mailai, doniki latadiai; bona vine ranuna bona vine huahuadia bona suke huahuadia bona kohu idau-idau iboudiai na dina helaḡa ai Ierusalem ai e vareailai. Bena aniani e hoihoilai dinana ai na sisiba henidia.
16 Turo taudia hanua badana ai e nohova danu, gwarume bona hoihoi ḡaudia idau-idau e vareailai, dina helaḡa ai Iuda taudia ediai bona Ierusalem lalonai e hoihoilai.
17 Bena Iuda lohiadia na gwau henidia, nato, Ina kara dikana umui ese o karaiamu be dahaka, dina helaḡa o hadikaiamu?
18 Senemui na unu e kara toma, bena eda Dirava ese ina dika idoinai ita latadai bona ina hanua badana latanai e havaraia, ani? A umui ese badu ma o havaraiamu Israel latanai, dina helaḡa o hadikaiamu dainai.
19 Dina helaḡa e kahira-kahira ai, Ierusalem ikoukouna ai dina e diho negana ai, lau ese na haduadia iduara bae koudia, bona na haḡanidia basie kehodia ela bona dina helaḡa baine ore. Bena egu hesiai taudia haida na ikoukou itataodia na atodia, maduna ta dina helaḡa ai basie vareailaia helaoreana.
20 Bena nega ta eiava rua hoihoi taudia, kohu idau-idau e hoi taudia, na Ierusalem murimurinai e taruhava.
21 A lau ese na sisiba henidia, nato, Dahaka dainai maḡu vairanai o taruhamu? Una kara ba karaia lou negana ai, baina dabaimui tao. Una negana amo idia na dina helaḡa ai asiema lou.
22 Bena Levi taudia na haḡanidia, idia na sibodia bae haheḡoeva, bena baema, ikoukou bae gimadia, dina helaḡa bae hahelaḡaia helaoreana. Egu Dirava e, ina danu ba laloa tao, lau ihanamogu, bona emu hebogahisi badana heḡereḡerena ai ba hamaurigu.
23 Unu dinadia ai lau ese Iuda taudia haida, Asdod bona Amono bona Moab hahinedia vada e adavadia taudia, na itadia;
24 idia natudia orea kahana na Asdod gadona ai e herevava, bona Iuda gadona igwauraina asi dibadia, a bese ta ta gadodia mo.
25 Bena na heai henidia, bona na uduguiraidia, bona haida be na dadabadia bona huidia na butu. Bena na haduadia, Dirava ladana ai bae gwau hamata; nato, Natumui hahinedia na idia natudia mamaruanedia basio henidia, bona idia natudia hahinedia na basio abidia, umui adavamui eiava natumui mamaruanedia adavadia ai basio halaodia.
26 Solomon, Israel pavapavana, na hahine unuhetomadia daidiai e kerere, ani? Bese momo bogaragidiai asi pavapava ta ia heḡereḡerena; ena Dirava ese e lalokau henia, bona Dirava ese Israel idoinai pavapavana ai e halaoa; ḡau tamona, idau bese hahinedia ese ia e hakaraia dika.
27 Matona, ai ese umui baia kamonai henimui, bona ina kara dika-hereana baia karaia, bona eda Dirava baia kara henia koikoi, idau bese hahinedia iadavadia ai, a?
28 Iehoiada natuna ta, hahelaḡa tauna Eliasibi tubuna, na Sanbalata, tau Horono, rava-maragina, una dainai lau ese egu amo na lulua oho.
29 Egu Dirava e, ba lalodia tao, badina be idia ese hahelaḡa dagina, bona hahelaḡa taudia bona Levi taudia edia gwauhamata, na e hamiro.
30 Taunabunai, lau ese idau bese ḡaudia iboudiai amo na haḡoevadia, bona hahelaḡa taudia bona Levi taudia na haginidia, edia ḡaukara ta ta ai;
31 bona boubou au-rakurakudia dalana na lailaia, e gwaurai negadia ai, bona aniani roboadia dalana danu. Egu Dirava e, ba lalogu tao, baina namo helaoreana.