12
Aaron bona Miriama edia Maumau
Aaron bona Miriama ese Mose e maumauraia, ia adavana hane Kusu dainai, badina be ia ese Kusu hahinena vada e adavaia. Idia eto, Iehova na Mose mo sibona uduna amo vada e hereva a? Eiava ai danu udumai amo vada e hereva? Iehova ese edia hereva e kamonai. Hari Mose na tanobada taudia iboudiai bogaragidiai ia mo sibona manau herea. A Iehova ese Mose bona Aaron bona Miriama e hereva henidia taku, eto, Umui tatoiosi a raka lasi, hebou kalagana baoma. Bena tatoiosi ela. Bena Iehova na ori dubuna ai e diho, hebou kalagana vairanai e gini, Aaron bona Miriama e boiridia, bena raruosi e raka henia kahi. Ia eto, Egu hereva a kamonai: daika umui bogaragimui ai be peroveta tauna, lau ese mata-hanai ai baina hahedinarai henia bona nihi ai baina hereva henia. A egu hesiai tauna Mose na dia unuheto; ia na egu bese ireḡuna tauna. Ia ida baia hereva-hereva hedinarai, lau udugu amo, ia uduna amo; basia hereva hehuni. Iehova oromana danu ia ese matana amo baine itaia. Edeheto umui raruosi na egu hesiai tauna Mose imaumauraina asio garimu?
Iehova ena badu e siahu ḡaraḡara unu raruosi ediai, bena ia ese e rakatanidia. 10 ori ese hebou kalagana e daetania negana ai, Miriama vada e lepra, kopina vada e kuroka-kuroka, snow na heto. Aaron ese Miriamae haḡerea, e itaia vada e lepra. 11 Bena Aaron ese Mose e hereva henia eto, Ḡauka e, ai vada a kara kava, vada a kara dika; mani emu kara emai dika davana basio henimai, 12 Ina hahine na basine noho mase hahinena na heto, eiava sinana bogana amo e vara mai dikana kekenina na heto. 13 Bena Mose ese Iehova e noia, eto, Dirava e, lau na noimumu, ba hamauria. 14 A Iehova ese Mose e haere henia, eto, Tamana ese vairana bema kanudia, ia na mai hemaraina ida bema noho ela dina hitu bema ore, ani? Benaini, ia be dina hitu taruha murimurinai baine noho, bena ma bae hakaua vareai.
15 Taunabunai, Miriama na taruha murimurinai e nohova ela bona dina hitu e ore; bona Israel taudia na edia laolao asie matamaia lou ela bona Miriama na taruha lalonai ma e hakaua vareai. 16 Una murinai idia ese Haseroto e toretania, ela, Paran tano-ḡaḡaena ai e taruha.