5
Ekalesia oreana ita-taona
1 Umui hahidaosi ekalesia ita-taona taumui aina hahealo henimui. Lau danu heitatao taugu. Keriso e hisihisiva lau danu na itaia, bona baine hedinarai hairaina ai lau danu mai ahugu.
2 Dirava ena mamoe serina ba reḡudia. Ba itadia tao, Dirava ena ura heḡereḡerena; dia gwaugwau amo, a lalodia iha-uradia amo; dia kohu idavarina totona, a lalomui e uramu dainai;
3 dia lohia taumui ai baola totona, a mamoe serina bae haḡoimui totona.
4 Bena mamoe ireḡudia Tauna badana baine hedinarai negana ai, kwara-havava ḡauna mai hairaina, se maraimu ḡauna, do bavabia.
5 Eregabe taumui e, umui ese heitatao taudia ba kamonai henidia. Iboumui ai, lalo-manau ba hahedokilaia; badina be Dirava ese hekokoroku taudia e laodia ahumu, a manau taudia e harihari henidiamu.
6 Taunabunai, Dirava imana siahuna henunai ba hahemanau, bena negana baine gini dae ia ese do baine abimui isi.
7 Emui lalo-haguhi na ia enai ba tahoa kau, badina be ia ese e lalomuimu.
8 Ba boga auka, ba gima; inaimui diabolo na e loamu mai ḡouna ida, leona na heto, baine anidia ore taudia na e tahudiamu.
9 Ba laoa ahu, abidadama ai ba gini tutuka-tutuka; ba diba, o animu hmisidia heḡereḡeredia varavaramui tanobada heḡeḡe-madai ai danu e animu.
10 Umui na nega sina mo ba hisihisi; bena harihari-bada idoinai Diravana, Keriso dainai ena mia-hanaihanai hairaina iabina vada e boirimui Diravana, ese baine hanamomui ḡuḡuru, baine haginimui tutukatutuka, baine hakwalimumui.
11 Siahu na ia ena, ela bona hanaihanai. Amen.
Hahetoni
12 Ina revareva sina na Siluano imana amo vada na torea heau heau. Lau na tomamu ia na varavara korikori. Na haduamuimu, Dirava ena harihari-bada korikorina binai; ia lalonai ba gini tutuka-tutuka.
13 Ekalesia oreana Babulono ai, umui bamomui e abidia hidi taudia, ese e hahenamo henimuimu. Natugu Mareko ese danu e hahenamo henimuimu.
14 Lalokau haherahuna amo ba hahenamo heheni. Keriso lalonai o nohomu taumui iboumui ai, maino emui ai baine mia.