102
1 Iehova e, egu noinoi a kamonai;
egu taitai na dekemu aine vasi,
2 Oi vairamu na egu amo basio hunia,
egu hisihisi dinana ai.
Taiamu ae kirara egu ai;
baina boiboi dinana ai ba haere henigu haraḡa.
3 Badina be egu mauri dinadia na e lao bubunimu, kwalahu na heto;
turiagu na e aramu, lahi hururuna na heto.
4 Lalogu na vada e kakoro, rei na heto, bena vada e marai;
agu aniani ianina na reaiamu.
5 Egu ḡanaḡana bada dainai,
tau-anigu na e varoda-varodamu.
6 Lau na boebedi tano ḡaḡaena ai na heto,
eiava baimumu gahu ḡaḡaena ai na heto.
7 Na noga ranimu;
lau na manu edeana ta ruma guhina ai na heto.
8 Dina idoinai inaigu ese e ihi-ihiraigumu;
e kirikirilaigumu taudia ese lau ladagu na hahedika ḡauna ai e halaoamu.
9 Badina be kahu na aniamu, aniani ḡauna na heto,
bona iruru-mata na agu inuinu ḡauna ida na buloamu,
10 emu lalo-dika bona emu badu daidiai;
badina be oi ese vada o abigu isi bona ma o tahogu nege.
11 Egu mauri dinadia na dina e dihomu ikerukeruna na heto;
na maraimu, rei na heto.
12 Iehova e, oi na o lohia, bainela hanaihanai;
oi ladamu na e hesiriumu ela bona uru iboudiai.
13 Oi na ba tore isi, Siona ba bogaia hisi;
ilalonamo-henina negana binai,
o gwauraia hamata negana vada e gini dae.
14 Badina be emu hesiai taudia ese ia nadina e lalokau henidiamu
ia ḡahuna e bogaia hisimu.
15 Bese idau-idau ese Iehova ladana garina bae gari,
tanobada pavapavadia iboudiai ese oi hairaimu garina bae gari.
16 Badina be Iehova ese Siona baine haginia,
mai hairaina ida baine hedinarai.
17 Ia ese ogoḡami taudia edia ḡuriḡuri baine lalodia,
bona edia noinoi na basine dadaraidia.
18 Ina na bae torea, uru gabedia edia,
do asie vara taudia ese Iehova bae imodaia totona:
19 ia na ena gabu helaḡana amo e roha dobi,
guba amo Iehova ese tanobada e nenea,
20 iḡui taudia edia ḡanaḡana baine kamonai
bona e revadia mase taudia baine ruhadia nege helaoreana,
21 Siona ai taunimanima ese Iehova ladana bae gwauraia,
bona Ierusalem ai bae imodaia totona.
22 Una negana ai bese idau-idau bona basileia idau-idau bae hebou,
Iehova bae toma henia diho.
23 Egu mauri dinadia bogaragidiai ia ese egu goada vada e abia oho,
egu mauri dinadia vada e hagadoidia.
24 Lau na tomamu: Egu Dirava e,
egu mauri dinadia bogaragidiai basio abigu daudau;
oi emu laḡani na e hesiriumu,
uru iboudiai lalodiai.
25 Oi ese gunaguna tanobada badina o hadaia,
guba danu oi imamu ese e karaia.
26 Idia na bae ore, a oi na ba hesiriu;
idia iboudiai na bae mouka-mouka, dabua na heto.
Oi ese o bolodiamu, hahedoki na heto,
bena idia na e boiomu;
27 a oi na so idaumu, bona emu laḡani na asi dokodia.
28 Emu hesiai taudia natudia na bae noho namonamo;
idia garadia na vairamu ai bae gini.