22
1 Egu Dirava e, egu Dirava e, dahaka dainai vada o rak-atanigu?
Dahaka dainai emu hekaha na dauhai e miamu?
Dahaka dainai egu ḡanaḡana so kamonaimu?
2 Egu Dirava e, dina ai na tai henimumu,
a so haere henigumu;
hanuaboi ai danu,
to laḡa-ani asina davariamu.
3 A oi na helaḡa;
Israel taudia edia heimodai latadiai o nohomu.
4 Tamamai ese oi e abidadama henimuva;
e abidadama henimuva, bena oi ese o hamauridiava.
5 E tai henimuva, bena e mauri;
e abidadama henimuva, bena asie baia.
6 A lau na biluga mo, dia taunimanima;
taunimanima ese e ihi-ihiraigumu,
egu bese taudia ese e dadaraigumu.
7 E itagumu taudia iboudiai ese e kirikirilaigumu,
bibinadia e hamue henigumu,
kwaradia e taiko-taikomu, e tomu
8 “Ia ese Iehova e abidadama henia,
Iehova ese baine hamauria, baine harohoa mauri;
badina be ia ese e moalelaiamu”.
9 Ḡau tamona, oi ese sinagu bogana amo o verigu lasi;
oi ese o gimaguva sinagu kemena ai.
10 Egu vara dinana amo oiemu ai na tao;
sinagu bogana amo na lasi dinana amo oi na egu Dirava.
11 Egu amo dauha basiola,
badina be hisihisi vada eme kahira-kahira,
bona lau na asi ikahagu ta.
12 Boromakau mamaruanedia momo ese e ḡeḡegu ahumu,
Basan boromakaudia mai goadadia ida ese e kougu heḡeḡemu;
13 Idia ese ududia e haga henigumu,
leona na mai daḡedaḡena ida e ḡoumu na heto.
14 Na aru ohomu ranu na heto,
turiagu na e heridemu;
kudougu na bada na heto,
kemegu ai e veve ohomu.
15 Egu goada na e kaukaumu, ataga na heto,
malagu na udugu ai e kaki taomu;
mase ḡahuna ai vada o hagorugu diho.
16 Momokani, sisia ese e ḡegegu ahumu;
kara dika taudia vada e hebou, vada e kougu ahu;
imagu palapaladia bona aegu palapaladia vada e daidia uru,
17 (Turiagu idoinai na ita hedinaraimu).
Idia ese e raraigumu, e itagu taomu;
18 egu dabua e hari,
egu hahedoki na mari amo e hari.
19 A oi, Iehova e, basio noho dahu ai!
Ikahagu e, aoma haraḡa, ba durugu!
20 Laumagu na dare amo ba hamauria,
egu mauri na sisia ena siahu amo ba rauaia.
21 Leona uduna amo ba hamaurigu,
uda boromakaudia doadia amo lau laumagu ba hamauria.
22 Oi ladamu baina hatoa, tadikakagu vairadiai;
baina imodaimu, hebou bogaraginai.
23 Iehova garina o garimu taumui e, ia ba imodaia!
Iakob natuna iboumui ai, ia ba heatolaia!
Israel natuna iboumui ai, ia ba matauraia!
24 Badina be hisi ani tauna ena hisihisi
ia ese se dadaraia bona se lalo dika henia;
ia vairana na iena amo se hunia,
e tai henia negana ai e kamonai.
25 Hebou badana ai baina imodaimu;
egu gwauhamata anidia baina kara,
ia garina e garimu taudia vairadiai.
26 Ogoḡami taudia na bae aniani, bogadia bae kunu;
e tahuamu taudia ese Iehova bae imodaia.
Oi lalomu baine mauri hanaihanai.
27 Tanobada dokodia iboudiai na bae helalo tao,
bena Iehova bae haḡerea;
bese idau-idau edia iduhu iboudiai ese
ia bae toma henia diho.
28 Badina be basileia na Iehova ena,
ia ese bese bese e lohiadiamu.
29 Momokani, heaḡi taudia iboudiai tanobada ai ese
ia bae toma henia diho;
ḡahu ai e dihomu taudia iboudiai na
ia vairanai bae igo diho,
bona sibona ihamaurina asi dibana tauna danu.
30 Garada ese ia isiaina bae lao henia;
taunimanima ese uru gabena na Iehova sivaraina bae hamaorolaidia;
31
do asie vara taudia na iena hahemauri bae hadibalaidia,
hari vada e hahedinaraia heḡereḡerena.