25
1 Iehova e, laumagu na abia isimu oiemu ai;
2 egu Dirava e, lau oi na abidadama henimumu.
Ba durugu, hemarai na basine abigu;
ba durugu, inaigu na basie herouheroua latagu ai.
3 Oibe, e narimumu tauna ta basie hahemaraia;
a asi badina e tao toremu taudia vada bae hahemaraidia.
4 Iehova e, emu kara ba haheitalaigu,
emu dala ba hadibalaigu.
5 Emu hereva momokanidia ai ba hakaugu, ba hadibagu,
badina be oi na lau ihamaurigu Diravana;
oi na narimumu dina idoinai.
6 Iehova e, emu hebogahisi ba laloa,
emu lalokau ba laloa tao;
badina be idia na nega gunadia amo e hemailaimu.
7 Tauhaugu negana ena kara dika na basio Ialoa tao,
eiava egu kara havara danu;
Iehova e, lau ba lalogu tao,
emu hebogahisi dainai.
8 Iehova na namo bona maoromaoro;
taunabunai ia ese kara dika taudia na dala ai e hadibadiamu.
9 Ia ese lalo-manau taudia na kara maoromaoro ai e hakaudiamu,
lalo-manau taudia na iena dala e hadibalaidiamu.
10 Iehova ena dala iboudiai na hebogahisi bona momokani daladia,
ena taravatu bona ena hahediba herevadia e badinadiamu taudia edia.
11 Iehova e, oi ladamu dainai egu kara dika ba gwau tao,
badina be vada e bada.
12 Iehova garina e garimu tauna be daika?
Iehova ese ia baine hadibaia, edena dala baine abia hidi.
13 Ia na taḡa ai baine noho,
bona ia natuna ese tano bae abia, edia.
14 Iehova ena hetura na ia garina e garimu taudia edia;
ia ese ena taravatu baine hadibalaidia.
15 Matagu ese Iehova e haḡereamu,
badina be ia ese lau aegu na huo amo baine veridia oho.
16 A haḡeregu, a bogagu hisi;
badina be lau na sibogu, bona na hisihisimu.
17 Lalogu ena hisihisi na e bada e laomu;
egu hisihisi amo ba hakaugu lasi.
18 Egu hisihisi bona egu hekwarahi ba haerodia,
bona egu kara dika iboudiai ba gwau tao.
19 A haeroa, inaigu na hutuma,
bona edia badu na auka herea egu ai.
20 Egu mauri ba gimaia, ba hamaurigu;
ba durugu, basie hahemaraigu;
badina be egu roho-mauri be oiemu ai.
21 Kara momokani bona kara maoromaoro ese bae hamaurigu;
badina be oi na narimumu.
22 Dirava e, Israel ba hamauria,
ena hisihisi iboudiai lalodia amo.