49
1 Bese idau-idau taumui iboumui ai, a kamonai!
Tanobada taumui iboumui ai, a hakala!
2 Henu taumui bona atai taumui,
taḡa taumui bona ogoḡami taumui,
orea tamona mo.
3 Udugu ese aonega baine gwauraia,
lalogu ese lalo-parara herevadia baine haerodia.
4 Hereva heḡereḡerena baina hakala henia,
egu hereva hehunina na gitara reḡena ese baine hahedinaraia.
5 Dahaka dainai baina gari, hekwakwanai negadia ai,
eiava e daḡedaḡe henigumu taudia edia kara dika ese e ḡeḡegu ahumu negadia ai?
6 Idia ese edia taḡa e abidadama heniamu,
edia kohu momo herea e heagilaimu.
7 Momokani, tau ta sibona basine hehoi lasi diba,
ena mauri davana na Dirava basine henia diba;
8 badina be ena mauri davana na bada herea.
Tau ta dia heḡereḡere
9 ena mauri baine hadaudaua hanaihanai,
bona mase gabuna basine itaia.
10 Oibe, ia baine itaia, aonega taudia danu e masemu;
kava tauna bona lalo-duhu tauna raruosi bae mase,
bona edia taḡa na bae rakatani, haida edia.
11 Ena be tano haida e gwauraidia edia,
to edia guri na edia ruma ela bona hanaihanai,
edia noho gabudia ela bona uru iboudiai.
12 Tau ta na ena hairai ai basine noho diba,
ia na e masemu boromadia na heheto.
13 E heaḡi kavamu taudia davadia binai,
ahudia e moalelaimu taudia dokodia binai.
14 Mamoe na heheto mase gabuna baela;
mase ese baine regudia, mamoe iregudia tauna na heto.
Maoromaoro guri ai e dihomu,
hairaidia vada bae ore,
mase taudia edia gabu ai bae noho.
15 A Dirava ese lau laumagu davana baine karaia,
mase siahuna amo baine rauaia;
badina be ia ese baine abigu dae. (Selah)
16 Tau ta baine taḡa negana ai,
bona ena ruma hairaina baine bada negana ai,
basio gari.
17 Badina be baine mase negana ai ḡau ta basine abia kau, basine laohaia;
ia hairaina basine diholaia.
18 Ena be ena mauri dinadia ai ia na sibona moale tauna ai baine hegwaurai,
ena be sibona ena namo e havaraiamu tauna na bae imodaia,
19 to tamana ena uru taudia baine lao henidia;
idia ese diari basie itaia lou.
20 Tau ta na ena hairai ai basine noho diba,
ia na e masemu boromadia na heheto.