58
Lohiamui e, emui hahemaoro herevadia na maoromaoro eiava?
Taunimanima o hahemaoro henidiamu mai maoromaoromui ida a?
Lasi, lalomui ai kara kerere-kereredia o haeromu;
imamui na daḡedaḡe karadia e karamu tanobada ai.
 
Kara dika taudia na dounu sinadia bogadia lalodiai e nohova negadia amo vada e raka muri matama,
edia vara dinadia amo vada e kerere, koikoi herevadia e gwauraimu.
Idia na mai edia mase muramurana, gaigai ena mase muramurana na heto,
taia kudima gaigaina na heto.
Ia na taiana e kouamu,
mea tauna gadona basine kamonai totona,
babalau tauna mai aonegana gadona basine kamonai helaoreana.
 
Dirava e, isedia ba hakwaidudia ududia ai,
Iehova e, leona natudia gadigadidia ba ragadia lasi.
E aru ohomu ranuna na heto bae puki;
rei na heto bae moidia tao, bena bae marai.
Bisisi na kwari ai e hepunimu na heto bae boio,
e vara dika merona heḡereḡerena, dina nega hata se itaia.
Ava ḡiniḡini, mauridia eiava kakorodia, siahudia na emui uro ese do se abi negana ai,
ia ese baine petadia oho.
 
10 Kara maoromaoro tauna baine moale,
dava ihenina baine itaia negana ai;
kara dika tauna rarana ai
ia aena baine huridia.
11 Bena taunimanima baeto:
Momokani, kara maoromaoro na mai davana;
momokani, tanobada ihahemaoro-henina Diravana na e nohomu.