71
Iehova e, oi mo na abidadama henimumu;
ba durugu, nega ta basie hahemaraigu.
Emu kara maoromaoro ai ba rauagu bona ba hamaurigu;
ba hakala henigu, ba harohogu mauri.
Egu roho-mauri nadina ai baola,
egu kohoro aukana ai baola, ihamaurigu totona;
badina be oi na egu nadi-gini bona egu kohoro.
 
Egu Dirava e, kara dika tauna imana amo ba hamaurigu,
kara gageva-gageva bona daḡedaḡe tauna imana amo.
Badina be, Ḡaubada e, egu helaro na oi,
Iehova e, tauhaugu negana amo egu abidadama na oi.
Egu vara dinana amo oiemu ai vada na tabe kau;
oi ese sinagu bogana amo o abigu.
Oi mo na umodaimu hanaihanaimu.
 
Lau na toa ta, hutuma ediai;
a oi na egu roho-mauri gabuna aukana.
Lau udugu na oi ihanamomu ai e honumu,
bona oi hairaimu ai danu, dina idoinai.
Baina buruka negana ai basio negegu daure,
egu goada e oremu negana ai basio rakatanigu.
10 Badina be inaigu ese e herevalaigumu,
egu mauri iabi-ohona totona e bani taomu taudia na e henega boumu;
11 e tomu: Dirava ese vada e rakatania;
a havaia, ba dabaia tao,
badina be asi ihamaurina tauna ta.
 
12 Dirava e, dauhai basio noho
egu Dirava e, a durugu haraḡa.
13 Ihabadelaigu taudia na hemarai bona hahebua-tari ese bae abidia,
heihi-ihirai bona hedadarai ese bae ḡovadia ahu.
14 A lau be baina helaro Ioulou,
bona oi ihanamomu baina habadaia loulou.
15 Udugu ese emu kara maoromaoro baine herevalai,
emu hahemauri karadia baine gwaurai dina idoinai,
badina be iduahidia na asi dibagu.
16 Ḡaubada Iehova ena siahu karadia baina gwauraidia,
oiemu kara maoromaorodia baina imodaidia, oi mo sibomu emu.
17 Dirava e, tauhaugu negana amo vada o hadibagu;
emu hoa karadia doini na gwauraidiamu.
18 Taunabunai, ena be baina iahu, huigu baine buruka,
to, Dirava e, basio rakatanigu,
ela bona oi siahumu baina gwauraia,
do bae vara urudia iboudiai ediai.
19 Dirava e, oi siahumu bona emu kara maoromaoro na e dae e laomu.
ela bona guba doriva-dorivana.
 
Oi ese kara siahudia vada o kara,
Dirava e, daika na oi idaimu?
20 Hisihisi dikadia momo amo vada o hahisigu,
to vada ba hagoadagu lou;
tanobada ena dobu gabudia amo
ba hakaugu dae lou.
21 Oi ese imatauraigu ba habadaia,
bona taugu ma ba haloa lou.
 
22 Egu Dirava e, hatai-hatai ḡauna amo danu baina hanamomu;
emu momokani baina hanamoa.
Israel ena Helaḡa Diravana e,
gitara amo do baina hanamomu.
23 Oi ihanamolaimu anedia baina abi negadia ai,
bibinagu na bae lolo, moale dainai,
laumagu danu, oi ese o hamauria dainai.
24 Malagu danu oiemu hekaha maoromaorona baine gwauraia,
dina idoinai;
badina be ihahisigu dalana e tahuava taudia na
vada e hahemaraidia bona vada e dadaraidia.