89
Iehova e, emu hebogahisi na do baina anelaia hanaihanai;
lau udugu amo emu heabidadama baina gwauraia hedinarai uru iboudiai ediai.
Badina be emu hebogahisi vada o haginia hanaihanai,
emu heabidadama na auka, guba na heto.
Oi na vada oto: Na abia hidi tauna ida vada a hegwau hamata heheni;
egu hesiai tauna David na ini vada na gwau henia hamata toma,
“Oi garamu baina haginidia hanaihanai,
oiemu terono baina haginia uru iboudiai lalodiai.” (Selah)
Iehova e, guba ese oiemu hoa ḡaudia bae imodaidia,
bona emu heabidadama helaḡa taudia edia hebou ai danu.
Badina be Iehova idaina be daika guba ai?
Guba taudia bogaragidiai daika na Iehova heḡereḡerena?
Ia na helaḡa taudia edia hebou ai e gari heniamu Diravana;
ia na bada bona mai garina, e ginia hegegemu taudia iboudiai bogaragidiai.
Iehova Sabaota e,
Iehova e, emu heabidadama ese e ḡeḡemu dae;
daika na mai siahuna oi heḡereḡeremu?
Davara hurehuredia o biagudiamu;
hurehure e daemu, to oi ese o hadokodiamu.
10 Rahaba o taoa kohi, mase ḡauna na heto;
oi inaimu na imamu siahuna amo o hakarohodia rohoroho.
11 Guba na oiemu, tano danu oiemu;
tanobada mai lalona ḡaudia iboudiai na oi ese o karadia.
12 Mirigini kahana bona diho kahana na oi ese o karadia,
Taboro bona Heremon ese oi ladamu e heatolaiamu, mai moaledia ida.
13 Oi imamu na mai siahuna,
imamu palapalana na mai goadana,
imamu idibana na atai ai.
14 Emu terono badidia na kara maoromaoro bona hahemaoro ḡoevadia;
hebogahisi bona heabidadama na oi vairamu ai e laomu.
15 Heimodai honedia mai dibadia taudia be nanamo;
Iehova e, idia na oi vairamu diarina ai e rakamu.
16 Idia ese oi ladamu e heaḡilaiamu dina idoinai,
idia ese oiemu kara maoromaoro e imodaiamu.
17 Badina be oi na edia goada hairaina;
oiemu hahenamo ese emai doa e haduduia isimu.
18 Badina be emai kesi na Iehova ena;
emai hanua pavapavana na Israel ena Helaga Diravana ena.
 
19 Sene negana ai e abidadama henimumu tauna na
oi ese mata-hanai ai o hereva henia, oto:
Goada tauna kwarana ai havava ḡauna vada na atoa,
hanua taudia bogaragidia amo na abia hidi tauna vada na imodaia.
20 Egu hesiai tauna David vada na davaria;
egu dehoro helaḡana amo vada na horoa,
21 lau imagu palapalana ese ia baine bamoa hanaihanai
bona lau imagu ese ia baine hagoadaia totona.
22 Inai tauna ese basine haerotania,
bona kara dika tauna ese basine hahemaraia.
23 Ia inaina baina taodia kohi ia vairanai;
e inai heniamu taudia baina rahudia mase.
24 Egu heabidadama bona egu hebogahisi na ia ida,
lau ladagu ai ena doa baine heabi isi.
25 Ia imana na davara latanai baine atoa kau,
ia imana idibana sinavai latadiai danu.
26 Ia ese baine tai henigu, baineto “Oi na lau Tamagu,
egu Dirava, ihamaurigu Nadi-ginina.”
27 Bena lau ese tau roboana ai baina halaoa,
bona pavapava herea-daena, tanobada pavapavadia bogaragidiai.
28 Egu hebogahisi na ienai baina hamomokania hanaihanai,
egu gwauhamata na ienai baine gini tutuka-tutuka.
29 Ia garana baina haginidia hanaihanai,
iena terono do baine mia, guba baine mia dinadia heḡereḡerena.
30 Ia natuna ese egu taravatu bema rakatania,
bona egu hahedua heḡereḡeredia basiema raka,
31 egu taravatu bema tata utu,
bona egu haheḡani basiema badinadia,
32 bena edia kerere davadia na hedadaba auna amo,
bona edia kara dika davadia na hekwadi varodia amo
baina henidia.
33 A lau be egu hebogahisi na iena amo basina abia oho,
egu heabidadama basina ha-idaua;
34 egu gwauhamata na basina rakatania,
eiava udugu bibinadia amo e lasi herevadia na basina ha-idaudia.
35 Egu helaḡa ai vada na gwau hamata vaitani;
David na basina koia.
36 Ia garana bae hesiriu hanaihanai,
iena terono baine mia, dina na lau vairagu ai e miamu heḡereḡerena;
37 hua heḡereḡerena baine gini hanaihanai,
baine gini tutuka-tutuka, guba e hesiriumu heḡereḡerena. (Selah)
38 A harihari vada o kahua nege bona vada o dadaraia,
o horoa tauna na o badu henia lalodikamu.
39 Emu gwauhamata na emu hesiai tauna ena amo vada o haloua;
ena havava ḡauna na gahu ai vada o hadikaia.
40 Ena maḡu iboudiai vada o hamakohidia,
ena kohoro vada o ḡiḡidia dobi.
41 Raka-hanai taudia iboudiai ese ena kohu e dadihaimu;
ia dekena taudia ese e ḡonaḡonalaiamu.
42 Ia inaina imadia idibadia vada o abi isi,
ia inaina iboudiai vada o hamoaledia.
43 Oibe, iena dare matana vada o haloua;
tuari ai so haginia auka.
44 Ena ḡoeva-dae vada o abia oho,
ena terono na tano ai vada o ḡiḡia dobi.
45 Ena malaḡa dinadia vada o hakwadogidia,
vada o hahemaraia vaitani. (Selah)
46 Iehova e, ba noho hehuni ela bona edena nega ai? Ela hanaihanai ai?
emu badu baine ḡaraḡara lahi na heto ela bona edena nega ai?
47 Ba laloa tao, egu mauri dinadia na dia hoho;
dahaka badina ai taunimanima natudia o havaradia!
48 Tau be daika ena mauri baine hesiriu, mase basine mamia toho?
Daika sibona mase siahuna amo ia laumana baine hamauria? (Selah)
 
49 Ḡaubada e, emu hebogahisi gunana,
emu heabidadama amo David o gwaurai henia hamata hebogahisina,
ḡauna be edeseni ai?
50 Ḡaubada e, emu hesiai tauna e dadaraiamu na ba laloa tao;
bese iboudiai edia heuduguirai na lau ese na huaiamu;
51 Iehova e, heuduguirai bunu, oi inaimu edia heuduguirai,
unu amo idia ese oi o horoa tauna ena raka e ḡonaḡonalaiamu.
52 Iehova baita hanamoa hanaihanai.
Amen. Amen.