12
Tuari na guba ai
1 Bena hoa ḡauna badana ta guba ai e hedinarai: hahine ta, ena dabua na dina, bona hua na aena henudiai, bona hisiu gwauta-rua kwarana ai e ḡeḡea.
2 E rogorogo, bena hekamonai hisina dainai e tai lolo.
3 Bena hoa ḡauna ma ta guba ai e hedinarai: huala badana kakakakana ta, kwarana na hitu, doana na gwauta, ena havava ḡaudia danu na hitu, kwarana ta ta ai.
4 Iuna ese guba hisiudia e daro dobi tanobada ai; hisiu toi toi amo ta ta e daro dobi. Bena hari huala na baine mara hahinena vairanai e gini, bine abia merona na ia ese baine ania eto.
5 Hahine na e mara, mero e abia; ia ese bese loḡora iboudiai auri itotohina amo bainereḡudia. To mero na e kitoa dae Dirava vairana bona ena terono vairanai.
6 Bena hahine na tano ḡaḡaena e heau lao, Dirava ese e heḡaeḡaelaia gabuna ai e noho; unuseni ai dina daha-ta sinahu-rua tauratoi-ahui bae ubua.
7 Bena guba ai tuari e vara, Mikael mai ena aneru ida ese huala e tuari henia. Huala mai ena aneru ida e tuari,
8 to e darere, bena edia gabu asie davaria lou guba ai.
9 Bena hari huala badana, idau negai gaigaina, ma ladana ta Satana, tanobada idoinai e koiamu ḡauna, na e doria lasi bona e tahoa dobi tanobada ai; bona ena aneru danu ia ida e tahodia dobi.
10 Bena na kamonai, gado badana ta guba ai e hereva, eto, Harihari iseda Dirava ena hahemauri bona ena goada bona ena basileia, bona iena Keriso ena siahu, vada eme gini dae; badina be Dirava vairanai varavarada e habadelaidia boi e habadelaidia rani tauna na vada e tahoa dobi.
11 Idia ese Mamoe Natuna rarana dainai bona e gwaurai hedinarai herevadia daidiai vada e hadarerea; edia mauri asie lalokau henia, ela bona mase.
12 Guba e! Guba ai o nohomu taumui e! Idia daidiai ba moale. Tanobada bona davara, madi ihabaimui! Badina be diabolo vada e vasi, e badu dikadikamu, badina be ia dibana ena nega eme kwadogi.
13 Bena huala ese e itaia, tanobada ai vada e tahoa dobi, bena ia ese mero e abia hahinena na e daḡedaḡe henia.
14 A ugava badana hanina ruaosi hari hahine e henia, bena ia ese huala e rohotania, tano ḡaḡaena e roho lao, ena gabu korikori ela, laḡani ta bona laḡani rua bona laḡani kahana e ubua gabuna.
15 Bena huala ese hahine murina amo ela, uduna amo ranu e loria lasi, sinavai na heto, aru ese baine arua isi eto.
16 A tanobada ese hahine e durua, e kara uduna e haḡaia na heto, huala ese e loria lasi sinavaina ma e hadonoa.
17 Bena huala ese hahine e badu henia, ela, hahine natuna oredia eha tuari henidia, Dirava ena haheḡani herevadia bona Iesu ena hahediba herevadia e badinamu taudia bunu. Bena kone ai e gini.