2
1 Lau na Saron vahuvahuna,
koura ai e varamu sosanana.
*****
2 Ulato bogaragidiai egu lalokau na
sosana burena siniura bogaragidiai na heto.
*****
3 Uhau bogaragidiai egu lalokau na
apolo auna uda audia bogaragidiai na heto.
Ia ikerukeruna ai na helai mai moale-badagu ida;
huahuana na mai gaihona udugu ai.
4 Aria rumana ai e hakaugu lao;
ena pepe lau daegu ai na lalokau.
5 Vine huahuadia kakorodia amo ba ubugu,
apolo huahuadia amo ba hagoadagu,
badina be uraheni ese e hamasegumu.
6 Imana laurina amo bema hahekwinagu,
imana idibana amo bema rosigu.
7 Ierusalem kekenimui e, na haḡanimuimu,
uda nanidia bona dia daidiai,
uraheni na basio haoa
ela bona sibona baine noga.
8 Egu lalokau tauna gadona!
A itaia, ia na e maimu;
ororo badadia ai e roho daemu,
ororo maraḡidia ai e roho laomu.
9 Egu lalokau tauna na uda nanina
eiava dia natuna na heto.
A itaia, emai ruma murimurinai e ginimu,
gaba-mauruna amo e ha-igomu,
makamaka amo e igo vareaimu.
10 Egu lalokau tauna ese e hereva henigumu,
ini e gwau tomamu:
Egu lalokau e, a tore isi!
Hane namo e, aitala!
11 Keru negana vada e ore;
medu vada e doko.
12 Tano heraheradia vada e tubu;
ane-abi negana vada e kau;
bona pune na e taimu eda tano ai.
13 Suke huahuadia e dobimu,
vine buredia e papamu,
bonadia na e daemu.
Egu lalokau e, a tore isi!
Hane namo e, aitala!
14 Egu pune e, oi na nadi matudia ai;
oi na haga kohuadia ai.
Vairamu bama itaia,
bona gadomu bama kamonai;
badina be gadomu na namo,
bona vairamu na mai hairaina.
*****
15 Aoma, mariboi baita idoadia,
ena be mamaragi to
idia ese vine imeadia e hadikamu,
badina na eda vine buredia e papamu.
*****
16 Ia na egu lalokau, lau be ena lalokau;
ia ese ena mamoe e ubudiamu, sosana bogaragidiai.
17 Egu lalokau taumu e, a kerehai,
uda nanina eiava dia natuna
ororo gabaedia ai na heto;
ela bona dina baine keruma,
bona hanua baine boi.