SEFANIA
1
Iehova ena badu dinana
Iehova ena hereva Sefania enai e kau, Iosia Amon, Iuda pavapavana, ena nega ai. Hari Sefania na Kusi natuna; Kusi na Gedalia natuna, Gedalia na Amaria natuna, Amaria na Hesekia natuna.
Iehova na e tomu:
Ḡau iboudiai baina darodia oho vaitani
tanobada kopina amo.
Taunimanima bona uda ḡaudia baina darodia oho,
bona atai manudia bona davara gwarumedia danu.
Iehova na e tomu:
Kara dika taudia na baina tahodia dobi,
taunimanima iboudiai baina negedia daure,
tanobada kopina amo.
Lau ese imagu baina toia roro, Iuda ihadikana totona,
bona Ierusalem inoholaina taudia iboudiai ihadikadia totona.
Ina gabu amo Baal oreana kwabukwabudia baina negedia daure,
bona kaivakuku edia hahelaḡa taudia ladadia baina rohodia:
ruma guhidia ai e igo dihomu guba hisiudia e toma henidia dihomu taudia,
bona e igo dihomu Iehova ladana ai e gwau hamatamu a Milkom ladana ai danu e gwau hamatamu taudia,*
bona Iehova igavana amo vada e raka muri,
Iehova asie tahuamu bona enai asie henanadaimu, taudia.
 
Ḡaubada Iehova vairanai asi reḡereḡemui ba noho;
badina be Iehova ena dina vada eme kahikahi.
Iehova ese boubou ḡauna vada e hahegaegaea,
bona e vavea taudia na vada e hahelaḡadia.
Iehova ese ena boubou ḡauna baine hahelaḡaia dinana ai,
lau ese heitatao taudia bona hanua pavapavana natuna mamaruanedia baina hadava henidia,
bona idau bese dabuadia e hahedokilaimu taudia iboudiai danu.
Una dina ai ruma raka-vareaina e rohoa hanaimu taudia iboudiai,
bona biagudia edia ruma na daḡedaḡe bona koikoi karadia ai e hahonudiamu taudia iboudiai,
baina hadava henidia.
 
10 Iehova na e tomu: Una dina ai
taitai na Gwarume Ikoukouna amo baine dae,
bona tai lolololo na Hanua Matamatana amo,
bona rege badana na ororo amo.
11 Raro-kaka kourana inoholaina taumui e, a tai lolololo!
Badina be hoihoi taudia iboudiai na lasihidia;
silver e hahetohoamu taudia iboudiai vada eme henege daure.
12 Una negana ai lau ese lamepa baina abi kau,
Ierusalem ai baina hetahu;
bena noho-herekwa taudia,
lalodia ai e tomu
“Iehova basine hahenamo bona basine hahedika” taudia,
baina hadava henidia.
13 Edia kohu na haida ese bae dadi oho,
edia ruma na haida ese bae ḡiḡi dobi.
Ena be ruma bae haginidia,
to basie noholaidia;
ena be vine imeadia bae hadodia,
to anidia ranudia basie inu.
 
14 Iehova ena dina badana vada eme kahikahi,
e kahira-kahiramu, e mai haraḡamu;
Iehova ena dina reḡena mamina na idita,
una dina ai goada-herea tauna baine tai lolololo.
15 Una dina na badu dinana,
hisihisi bona lalo-hekwarahi dinana,
hahevahu bona hahebua-tari dinana,
dibura bona ḡabora dinana,
dagadaga bona dibura masemase dinana,
16 kibi reḡena bona hone dinana,
hanua mai maḡudia bona kohoro ḡaulatalatadia
ihadikadia dinana.
 
17 Lau ese hisihisi baina mailaia taunimanima latadiai,
bena bae raka, mata-kepulu taudia na heheto,
badina be Iehova vada e kara dika henia.
Raradia bae hebubu nege ḡahu na heto,
bona hidiodia boromakau taḡena na heto.
18 Edia silver eiava edia gold ese basie hamauridia diba,
Iehova ena badu dinana ai.
Ena badu ḡaraḡarana lahina ai,
tanobada idoinai baine ara oho;
badina be ia ese tanobada inoholaina taudia iboudiai
baine ha-oredia taku, baine ha-oredia vaitani
* 1:5 Kanaan taudia gunadia edia dirava ladadia e hato “Baal”; Asuria taudia ese guba hisiudia e toma henidia diho; Amono taudia edia dirava badana ladana na Milkom.