23
Yesu agòɗ: “Ɗahàw haŋkəli kà azla Farisəya la azlaməna mapahla mapəhay ala”
(Mark 12.38-39; Luka 11.43,46; 20.45-46)
1 La lig la ahəŋ, Yesu agolà à huma à slaka maham à ahəŋ dza la azlaməna matapla la slaka aŋha
2 agòɗ à atà: “Azlaməna mapàhla mapəhay ala la azla Farisəya, sləray aŋatà kà mapàhla mapəhay aŋa Musa à azladza.
3 Kiya uwaga kà, kə̀sàw gay aŋatà, ŋgaha hànàw uwana ala tapəh à akul gesina, ama kaɗahawwaŋ bokuba maɗehəŋ aŋatà aw, kà uwana atà takəs uwana tatapla à azladza anik aw.
4 Tawàɗàh tatak mahanayga kà mafàh à azladza anik à gəl, ama atà kà takəs aw, amiyaka bà gay gəl ahàl aŋatà babay kà tadəbəlani aw.
5 Ama taɗàh sləray aŋatà gesina kà la huma yewdi aŋa azladza pəra. Tawàɗàhla azlalaya à vok la azlagabaga bəzlə̀h bəzlə̀hga à vok, uwana matsetser à ahàl azlamapəhay anik anik aŋa wakità Zəzagəla à adi, ŋgaha la azlagwazazuv duksuffa la azlalukut aŋatà la gay.
6 Asa à atà kà azlaslaka teraŋa la azlagày madəv kuɗa la aku, la azlatatak may lakəl kà manəŋ à atà aŋa azladza.
7 Asa à atà bay kà azladza taɗahaha à atà ‘Ayyi’ la azlavadavaday la afik, la mazalàhatàla azlaməŋga.
8 Ama akul kà, kayahaw mazalakulla azlaməŋga aw, kà uwana akul gesina kà akul azladeda, ŋgaha məŋga aŋkul kà tekula ahàl pəra.
9 Kazalawla Baba à dza asik babay aw, kà uwana akul kà Baba aŋkul kà tekula à ahàl pəra, masla uwana la zagəla la afik.
10 Ŋgaha aya kayahaw mazalakulla sufəl babay aw, kà uwana Sufəl aŋkul kà tekula à ahàl pəra, uwaga kà Kristu.
11 Mazəɓ gəl gà aŋkul kà, agà kà bokuba masla mazəɓ à akul dogum.
12 Dza uwana azigəŋ gəl kà tadàwulla à vəɗah, ŋgaha dza uwana awulla gəl à vəɗah kà, tazigənəŋ.”
Yesu asləh vok à azlaməna matapla mapəhay la azla Farisəya
(Mark 12.40; Luka 11.39-42,44,52; 20.47)
13 “Ŋgərpa agay la akul, akul azlaməna matapla mapəhay, la akul azla Farisəya. Akul azlaməna magolla dza. Katsakaw à gamagày aŋa makoray Zəzagəla à ama kà azladza. Tekeɗik kà, akul la gəl aŋkul kà asa à akul mad à gày aw, azlauwana tayàh mad à gày bay kavàw à atà tetəvi aw.”
((
14 “Ŋgərpa agay la akul, akul azlaməna matapla mapəhay la akul azla Farisəya, akul azlaməna magolla dza. Kazawaw azlamis kuɗa à uda gesina, ŋgaha aya kavakaw à madəv kuɗa à abà kà mapəhla gəl aŋkul ala la huma azladza. Kà uwaga à uwana kadàɓəzaw seriya uwana aɗuwa aŋa azladza anik.”))
15 “Ŋgərpa agay la akul, akul azlaməna matapla mapəhay la akul azla Farisəya, akul azlaməna magolla dza. Kauguzahaw dawali dawali gesina la gudəŋ la vok, amiyaka la kəslah iyaw babay, kà akul aŋa maɓəz masla mapəh gay la ləv ala tekula. Ŋgaha baŋa kaɓə̀zàwwal aya kà, kapakàwwàŋ ala kà bəzi aŋa gày akàl ɗaɗuwa à gay akul asik səla.”
16 “Ŋgərpa agay la akul, akul azlaməna maguwàh azlaguləf à huma. Kagoɗaw kà: ‘Baŋa dza azuw mawaɗay la məŋ gày Zəzagəla kà, uwaga kà deyday’, kagoɗaw. ‘Ama baŋa azuw mawaɗay kà la luwàluwà uwana la gày Zəzagəla la aku kà, mawaɗay adànəfay’, kagoɗaw.
17 Akul azlakusoŋu, akul azlaguləf! Uwa la à uwana məŋga gà la? Luwàluwà ay awma məŋ gày Zəzagəla uwana masla la uwana agəŋ luwàluwà uwaga sətaka takay?
18 Kagoɗaw aya kà: ‘Baŋa dza azuw mawaɗay la slaka makəɗ tatak kà, uwaga kà deyday’, kagoɗaw, ‘Ama dza uwana azuw mawaɗay la tatak makəɗayga uwana la afik kà, mawaɗay adànəfay’, kagoɗaw.
19 Akul azlaguləf, uwa la à uwana məŋga gà la? Tatak makəɗayga ay awma slaka makəɗ tatak uwana agəŋ tatak makəɗayga sətaka takay?
20 Kà uwaga kà, dza uwana azuw mawaɗay la slaka makaɗ tatak kà azuw mawaɗay la tatak makaɗayga uwana la afik babay.
21 Dza uwana azuw mawaɗay la məŋ gày Zəzagəla kà, azuw mawaɗay la məŋ gày Zəzagəla ŋgaha la Zəzagəla uwana adz à ahəŋ la aku babay.
22 Dza uwana azuw mawaɗay la zagəla kà, azuw mawaɗay la kursi Sufəl aŋa zagəla, ŋgaha la masla uwana adz à ahəŋ la afik babay.”
23 “Ŋgərpa agay la akul, akul azlaməna matapla mapəhay, ŋgaha la akul azla Farisəya, akul azlaməna magolla dza, kavàw makulo aŋa tatak aŋkul, baməraka la azlatsəhay alàl anik anik gesina, ama kapəsewaw uwana aɗuwa à vok la mapəhay la abà, bokuba maɗehəŋ delga la tələmma, ŋgaha la madiŋal gəl à vok. Uwaga la uwana akəsà à vok kà makəsay la kokuɗa mapəsewaw azlaanik uwanay.
24 Akul azlaməna maguwàh azlaguləf à huma, kazaɓaw slaslam à uda la tataka masay aŋkul la abà, ama zlugumi kà kadàguwa à gay.”
25 “Ŋgərpa agay la akul, akul azlaməna matapla mapəhay, la akul azla Farisəya, akul azlaməna magolla dza, kapalaw lig aŋa kətsaw la azlakəslaɗ aŋkul, ama la huɗ aŋkul kà kahənawla la makəsafər dzəɓaŋŋa, ŋgaha la gəl la adi gesina.
26 Kak zil Farisəya guləf gà, pàl huɗ kətsaw dadàŋ, ŋgaha lig gà adàgay kuzekaka babay.”
27 “Ŋgərpa agay la akul, akul azlaməna matapla mapəhay, la akul azla Farisəya, akul azlaməna magolla dza. Akul kà bokuba akul azlazəvay uwana tawoɗəŋla, ahəɗ la lig gà, ama la huɗ gà kà, mahənlaga la azlatatak mazinga vaŋvavaŋ.
28 Akul babay kà la lig gà kà, kapəhawla vok ala kà kiya uwaga: ‘Anu azladza delga’, kagoɗaw, ama la huɗ kà kahənawla la magolla dza ŋgaha la mawisiga”, Yesu agòɗ à atà.
Seriya uwana lakəl aŋa azlaməna magolla dza
(Luka 11.47-51)
29 Yesu ahàd à huma à gay la magoɗay: “Ŋgərpa agay la akul, akul azlaməna matapla mapəhay, la akul azla Farisəya, akul azlaməna magolla dza, kaŋalàhàw zəvay aŋa azlaməna mapəh à atà gay à ahàl kà mapàhla à azladza ala kà lela. Kaɗahàw azlatatak ɓə̀ɗà à azlazəvay aŋa azlauwana à vok tadzà à ahəŋ la dziriga la abà.
30 ‘Aganay məgay la ahəŋ la zamana aŋa azlababa gami madzidziga kà naka məɗàh sləray anina kà makaɗ azlaməna mapəh à atà gay à ahàl kà mapàh à azladza aw’, kagoɗaw aya.
31 La gəl aŋkul kà, kasəlaw kà akul azlamayyi à tsəh ala aŋa azladza uwana takàɗàh azlaməna mapəh à atà gay à ahàl uwaga.
32 Kətà zlà kà, dàw à huma à gay kadəvawla sləray uwana à gay azlababa aŋkul tadzəkà maɗehəŋ zla!
33 Akul azlabəza matsapa: ‘Kakay mədàtəf seriya aŋa gày akàl la gay ala?’, kagoɗaw ma!”
Gay makəɗ gəl à ahəŋ
34 Ŋgaha agòɗ aya: “Kà uwaga katsənàwwàŋ lela, gədàsləl akul à azlaməna mapəh à atà gay à ahàl à waŋ, la azlaməna haŋkəliga, ŋgaha la azlauwana tasəl mapəhay. Kadàkaɗaw azlaanik, azlaanik aya kà, kadàtataslaw atà à ahàf à adi, azlaanik kadàzlaɓahaw atà la kurpi la gày madəv kuɗa la aku, ŋgaha aya kadànəfahaw la gudəŋ la gudəŋ kà makaɗ atà.
35 Kiya uwaga à uwana aŋiz aŋa azladza dziriga uwana takàɗàhàh atà dadzəka à vok la Abel, dza dziriga uwana takàɗ, tsəràh à makaɗ Zakari, kona aŋa Baraki uwana kakàɗàw la tataka aŋa azlagày tsiɗaŋaga à abà la slaka makaɗ tatak.
36 Haɗay, gəpəh à akul la dziriga kà, kà uwaga gesina adàtəɗay kà à gəl aŋa azladza aŋa zamana uwanay lakana.”
Yesu atà la Urusalima
(Luka 13.34-35)
37 “Urusalima, Urusalima, kak la uwana kakàɗ azlaməna mapəh à atà gay à ahàl uwana à gay, ŋgaha katsàh azlauwana Zəzagəla aslala kà atà à waŋ la akur. Gəday vok kà mənga, kà maham gay à vok aŋa azladza aŋak la slaka gulo, bokuba gotsak uwana aham gay azlabəza aŋha à vok la tsəh gogozlàh aŋha, ama kakəsaw aw.
38 Ŋgaha zla, lagwa kà, gày aŋkul adàgay ŋvagay.
39 La kità gəpəh à akul kà: Dagay lakana kadànəŋaw gi aya tsəràh à uwana: ‘Məpis gay à vok à gay la dza uwana atsa à waŋ la sləm aŋa Sufəl’, kadàgoɗaw”, Yesu agòɗ.