18
Dla Nǝ Mǝlmǝ Babilanu
1 Ayukuɗa sǝˈyar kǝ patǝu, ba yi lari vanyi waladi a vǝr shida sara a dǝmǝlmau. Aˈyi ja ǝnga dǝnama nǝ sǝm tǝlkur, ǝnga kadakadarkur nyi a vǝr mbǝl ar kǝra duniya patǝu.
2 Ji ngga ǝnga ɗahǝ dǝgalǝu, ji na,
“A dlar ja, madiya Babilanu a dlari!
A ɗar ja vir nggya anǝ mambǝl ɗǝmwaˈyiˈyar pampamǝu,
Ənga vir nggya anǝ kalar mambǝl diyadiyaɓǝˈyar,
ǝnga vir nggya anǝ ˈyagǝ dǝgur ǝnga diyadiyaɓǝˈyar,
ǝnga vir nggya anǝ kalar sǝr tagǝu, kǝra dǝgur ǝnga diyadiyaɓǝu.
3 Ara patǝr ˈyiˈyi ndǝ wathliya dzau
wu nggyabiya nǝ sǝsukur nyi.
Tǝlˈyar nǝ duniya patǝ a mǝliyar nda sǝsukur ǝnga ja.
Njir shafǝli a mǝliyar nda gǝnna wu ja
lagur yiwu nggyabiya wawahǝ nyi.”
4 Kǝ yi ɓǝra nggari vanyi ɗahǝ sara a dǝmǝlmǝ a vǝr na,
“Biya mau, nahyi nji ɗa, sara wu ja!
Ara hya sara gu bikǝ nyi
ara ɓwaɓwatǝ nyi a sara uya hyi.
5 Ara bikǝ nyi a vuyar dzǝ ba a dǝmǝlmau.
Kǝ Hyal ɗǝngari ǝnga bikǝ nyi.
6 Mǝliya nya mau ǝnggǝr kǝra ji mǝliya.
Kibiya nya mau aga mǝthlǝu sǝra ji mǝliya.
Wathliya nya mau aga mǝthlǝu kyakiwa ɗǝmwaˈyikur kǝra ji wathliya hyi a gwa.
7 Nǝ nya mǝ ɓwaɓwatǝ ǝnga huɗǝ kyakyaru
ǝnggǝr kǝra ji hana kǝrnyi ǝnga nggya wawahǝ nyi.
Wu ɗǝfuwa ja, ja vǝr ɓwakǝr nyi,
‘Yi wu nggya ǝnggǝr kwatam, aˈyi yi mala tǝsal mai,
ǝnga aˈyi yiwu sǝˈyinggu mai.’
8 Agabangau, wu pǝci pathlǝu ɓwaɓwatǝ wu nda nyabiya dzau,
tau, ǝnga sǝˈyinggu ba wuɓau.
Uˈu wu nda nggyina nyi,
arya Hyal Thlagǝu ndǝ dǝgal dǝnama ngu sa thlana nyi numa.”
9 Ma tǝlˈyar nǝ duniya kǝra mǝl sǝsukur ǝnga nggyabiya wawahǝ nyi ǝnga nda lari ˈyar nǝ uˈu kǝra wu nggyi nyi, ndu nda tiwi ǝnga sǝˈyinggu nyi.
10 Maja wu ɓwaɓwatǝu, ndu taˈyi tsalǝu ara ndu hivǝr nja sara daɓǝr nda wu ɓwaɓwatǝ nyi, ǝnga ndu tiwi nyi.
“Sǝr tǝhuɗǝu! Sǝr tǝhuɗǝu, madiya mǝlmau,
Babilanu, mǝlmǝ kǝra ǝnga dǝnama!
Wu saka pathlǝu numa ngau a shiliri!”
11 Njir shafǝli nǝ duniya wu nda tiwi ǝnga jiga tiwi arya ja, ara tsu ndǝr nda ɗǝl kar nda aˈyi mai.
12 Tsu ndǝr nda ɗǝl ǝndzau, ǝnga thladla ǝnga tsǝka dǝduru ǝnga handzǝlkwa ǝnga yadi lilinu ǝnga yadi ɗǝdla ɗǝdla ǝnga yadi pǝrapǝraɗǝu ba ǝnga kar maggǝdi maggǝdi, patǝ ǝkkǝˈyi alenyi wu la ki ǝnga alenyi sǝ kǝra nji mǝliya sara wu hira ciwar ǝnga wu dǝduru ǝnga liyangǝ shishiˈwu ba alenyi liyangǝ ǝnga tsǝka pǝzi mai.
13 Ətsu ndǝr nda ɗǝl kar nǝ sǝ kisǝu ǝnga yaji ǝnga sǝr ɗǝzǝ huɗa umbwa ǝnga ɓurdi dza wu ǝnga ɓurdi dǝdǝgau ǝnga ˈyimir wur inabi ǝnga mal wur zaitunu ǝnga ǝpou ǝnga uhi, ǝnga thla ǝnga tǝmahǝu ǝnga tagu ǝnga keki tagǝu ǝnga mafaˈyar ba ǝnga alenyi nji aˈyi mai.
14 Ndu na anǝ nyi, “Kalar sǝ mǝnahǝu, kǝra gu cim a tǝrabiyari, tsu gu ɓǝra uya nda mai. Patǝr bǝrbakur ngau a tǝrabiyari, tsu gu ɓǝra nda uya mai.”
15 Njir shafǝli kǝra ɗǝlna nyi sǝˈyar kǝ uya akkǝri a gu bǝrbakur nyi ndu nda taˈyi tsalǝu, ara ndu hivǝr nja sara daɓǝr nda wu ɓwaɓwatǝ nyi. Ndu tiwi ndu sǝˈyinggu,
16 ndu wau, ndu na,
“ ‘Sǝr tǝhuɗǝu! Sǝr tǝhuɗǝu, madiya mǝlmau,
ndǝra ɗǝɗǝmǝu, a vǝr mba kadǝmbul lilinu ǝnga lǝgutǝ ɗǝdla ɗǝdla ǝnga lǝgutǝ maggǝdi maggǝdi.
Ndǝra ɗǝɗǝmǝu, a vǝr ha ǝndzǝ wilwilu ǝnga tsǝka dǝduru ba ǝnga handzǝlkwa.
17 Wu saka pathlǝu kalar bǝrbakur nyi kau wu nda sa!’
“Kalar njir dlǝ kwambwal, ǝnga njira wu ɓǝ a gwa, ǝnga njir mǝl thlǝr a gwu nda ǝnga kalar njira vǝr mǝl gǝnnar nda a gwar ˈyimi, ndu nda taˈyi tsatsalǝu.
18 Ma ndǝ lari ˈyar uˈu kǝra a vǝr nggyi nyi, ndu sǝya mala wau, “Mǝlmǝ aˈyi saya ɗa dǝgala abangǝ nga nyi ya?”
19 Ndu nda tǝwa ˈyiˈyi wu kǝra nda, ndu tiwi ǝnga jiga tiwi, ndu na,
“ ‘Sǝr tǝhuɗǝu, madiya mǝlmau,
vira njira ǝnga kwambwal ar tsadau,
ǝnga ndǝ mǝliya gǝnna lagur bǝrbakur nyi!
Wu saka pathlǝu, kǝja nja sana nyi ri!
20 Caguli mau ar kǝra ja, dǝmǝlmau!
Caguli mau nji cici gǝ Hyal ǝnga cama sǝsǝˈyar ba ǝnga nabiˈyar!
Hyal a cabiya nyi ri numa nǝ shishikur nyi kǝra ji mǝl anǝ hyi.’ ”
21 Kǝ madiya waladi hǝri vanyi madiya tsǝka kǝra ǝnggǝr bǝra, kǝ ji vakuwa a gwar tsadau, kǝ ji na,
“Ənga gwazhi vi ǝnggǝr kau, ngǝ
madiya mǝlmǝ Babilanu, nga nju nda vakana nyi a gya,
tsu nju ɓǝra lari nyi mai.
22 Njir tsa sǝmbǝl ǝkkǝˈyi njir thlǝ na ǝnga njir mbiɗǝ mbǝlaˈwu, ǝnga aligata
aˈyi kǝra nju ɓǝra nggari wu gǝ mai.
Ndǝ aˈyi kǝra wu ɓǝra mǝl thlǝr tsi
kǝra aˈyi nju uya wu gǝ mai.
Ɗahǝ nǝ au ar bǝra
nju ɓǝra nggari wu gǝ mai.
23 Tsu nju ɓǝra lari mbǝmbǝl nǝ pitǝlla wu gǝ mai.
Ɗaha sal kwanjili ǝnga kwanjili
nju ɓǝra nggari wu gǝ mai.
Njir sugu ngau, ca ngǝ nji nggunggurǝm nǝ duniya.
Lagur shavi ngau, nga gǝ nggutana ˈyiˈyir duniya.
24 A gu ja ngǝ mashi nabiˈyar ǝnga nǝ nji cici gǝ Hyal,
ǝnga kalar njira nji tsǝya wu duniya.”