5
የሱሳ ፐቲ ስላ አꬃ ፓꬄዛ
1 የይፕ ጉየ፥ የሱሳ አይሁድታይ ቦንችዛ ባላይስ የሩሳላመ Ꮊንጌዛ።
2 የሩሳላመ ዱርታይ ፐንገ ካለ እብራይስጸ ዶናር ቤተሳይዳ ግዝ ዴለ የዛ። የ ሃꬃይ ላንቀ እችን ሸምፖ በስታይ የዛ።
3 [የይድ ሃꬃይ ኤንኦዳና ናግዛ ጋመ ሀርግንቴዝታይ፥ ቶእታይ፥ ዎብታይኔ ጉንድታይ ዎይእዛ።
4 አብስ ጊኮ፥ ፐቲ ፐቲ ቶኬ ጎዳ ኪታንቻይ ሃꬃ ዎꬊ ኤንእስዛ። ሃꬃይ ኤንኦዳር ቲን ገሌዝ አꬃይ ፋና አይኬዝ አባ ሀርገፐካ ፓጽዛ።]
5 የ አቃይድ ሀስታማኔ ሆስፑን ላይꬅ ሀርግንቴዝ ፐቲ አꬃይ የዛ።
6 የሱሳ የ አꬃ ብኢ፥ ማ ጋመ ዎደ ሀርግንቴዛና ኤሪ አꬃይኮ፥ «ፓጾዳይስ ኮይኔ?» ዬጌዛ።
7 ሀርግንቴዝ አꬃይ ማቂ፥ «ጎዳዮ፥ ሃꬃይ ኤንኦዳር ታና ሃꬃይ ጋንጨ ኦልዛ አሲ ባያ። ታኒ ገሎድ ሀኖዳር ሀራይ ታፕ ቲናቲ ገልዛ» ዬጌዛ።
8 የሱሳ ኤዝኮ፥ «ደንዲ ኤቆባ፤ ነ አርሳ ቶኪ ቅቶባ» ዬጌዛ።
9 አꬃይ እዝር ኤልሲ ፓጼዛ፤ ፋ አርሳ ቶኪ ቅቴዛ።
የይ ማላ ጋላሳር ሀኔዛ።
10 የይ ግሾስ፥ አይሁድታይ ፓጼዝ አꬃይኮ፥ «Ꮊይኖ ሳአይ ማላ፤ ኔኒ ነ አርሳ ቶክዛይ ዎጋ ባያ» ዬጌዛ።
11 ዝን አꬃይ፥ «ታና ፓꬄዛይ፥ ነ አርሳ ቶኪ ቅቶባ ጌዛ» ዬጊ ማሄዛ።
12 ኡንቲ ኤዝኮ፥ «ነና፥ ነ አርሳ ቶኪ ቅቶባ ጌዛይ ኤ ኦኖ?» ዬጊ ኦይጬዛ።
13 ዝን የሱሳ የ አቃይድ ጋመ አስ ጋንጨር ኤርሰካዛር ኣꬊ ቅቴዝ ግሾስ አꬃይ ፋና ፓꬄዛይ ኦናዛኮ ኤሮያ።
14 የሱሳ ጉየፕ የ አꬃ ጾስ ኬꬃ ደንጊ፥ «Ꮊት፥ ኔኒ ፓጼዛ፤ Ꮊይፕ ኢታ ባዝ ነና ሄላማይ ጋርክ ማቂ ናጋራ ኦꬅፐ» ዬጌዛ።
15 የይፕ ጉየ፥ አꬃይ Ꮊንጊ ፋና ፓꬄዛይ የሱሳ ማቄዛና አይሁድታይስ ኦዴዛ።
16 የሱሳ የያ ማላ ጋላስ ኦꬄዝ ግሾስ አይሁድታይ የሱሳና ባይእꬅ አይኬዛ።
17 የሱሳ ማቂ፥ «ታ አዳይ ኡባ ዎደ ኦꬅዛ፤ ታካ ኦꬆዳይስ ቤዝዛ» ዬጌዛ።
18 የሱሳ ማላ ቦንቼካ ግሾስ ኣዳ ባዝን ጾሳ ፋ አደ ግ ፋና ጾሳር ኡኩልሴዝ ግሾስ አይሁድታይ ኤዛ ዎꬎዳይስ ቲናሳይፕ አꬂ ኮይዛ።
ጾስ ናአይ ማዉተ
19 የሱሳ ማሂ፥ «ታኒ ይንትስ ቱሮ ኦድዛ፤ ናአይ ፋ ኣዳስ አብካ ኦꬆዳይስ ዳንዳኦያ። ኤ ፋ አዳይ ኦꬆዳር በኤዛና አዳ ኦꬅዛ። አዳይ ኦꬅዛና ናአይካ ኦꬅዛ።
20 አዳይ ፋ ናአ ቃꬍዛ ግሾስ ኤ ኦꬅዝ ኦꬆ ኡባ ፋ ናአ ቤዝዛ። ይ ማላባዝ ጎዳይ ጋርክ ኤ Ꮊይፕ አꬊዝ ኦሶ ፋ ናአ ቤዞዳ።
21 አዳይ Ꮊይቄዝታ Ꮊይቆፕ ደንꬂ ኡንትስ ደኦ እንግዛይ ጋርክ ናአይካ ፋ ኮይዝታይስ ደኦ እንግዛ።
22 አዳይ ናአይስ ፕርደ ማዉተ ኡባ እንጌዛፕ አትን ኤ ኦናካ ፕርዶያ።
23 አሳይ ኡቢታይ አዳ ቦንችዛይ ጋርክ ናአካ ቦንቾዳ። ናአ ቦንቾዋ ኦንካ ናአ ኪቴዝ አዳካ ቦንቾያ።
24 «ታኒ ይንትስ ቱሮ ኦድዛ፤ ታ ቃላ ስእዝታይኔ ታና አዛዜዛና አማንዛይ መꬍና ደኦ የዛ። ኤ Ꮊይቆፕ ደኦ ፒንጌዝ ግሾስ ፕርድንታሚ።
25 ታኒ ይንትስ ቱሮ ኦድዛ፤ Ꮊይቄዝ አሳይ ጾስ ናአ ቃላ ስእዝ ዎደ የኦዳ፤ የይካ Ꮊተ። የ ቃላ ስእዛይ ደኦር የዞዳ።
26 አዳይስ ኤስ ደኦ የዛይ ጋርክ ናአይስካ ኤስ ደኦ የዞዳይ ጋርክ እንግንቴዛ።
27 አስ ናአ ማቅዝ ግሾስ አዳይ ናአይስ ፕርደ ማዉተ እንጌዛ።
28 «ዱፎ የዝታይ ኤ ቃላ ስኢ ደንዶድ ዎደ የኦድ ግሾስ Ꮊያ ማላባዝ ጊፓተ።
29 ሎኦ ኦꬄዝታይ ደኦር የዞዳይስ ማ ኢታ ኦꬄዝታይ ፕርደ ኤኮዳይስ ዱፎፕ ደንዶዳ።
30 «ታኒ ታ ማዉተር አባባዝካ ኦꬆዳይስ ዳንዳኦያ። ጾሳይ ታስ ኦዴዛይ ጋርክ ፕርድዛ። ታኒ ታና ኪቴዛይ ኮይዝ ባዝ ኦꬅዛፕ አትን ታ ኮይዝ ባዝ ኦꬆዋ ግሾስ ታ ፕርዳይ ቱማ።
የሱሳስ ማርካቴዝ አስቶ
31 «ታኒ ታባዝ ማርካትኮ ታ ማርካትꬃይ ቱማ ባያ።
32 ታ ባጋ ማርካትዛይ ሀራ የዛ፤ ኤ ታባዝ ማርካትዛይ ቱማ ማቅዛና ታኒ ኤርዛ።
33 «ይ ዋንሳኮ አስ ኪትን ኤ ቱማስ ማርካቴዛ።
34 ታኒ የያ ይንትስ ኦድዛይ፥ ይ አቶድ ጋርክ ጌዛፕ አትን አስ ማርካትꬂ ታስ ኮሼዝ ግሾ ባያ።
35 ዋንሳ ሙቃዳ ጋርክ ኤጽታር ፖኤዛ። ይ ጽቃ ዎደስ ኤ ፖአይድ ኡፋይቴዛ።
36 «ዝን ታስ ዋንሳፕ ኣꬊዝ ማርካ የዛ። ታኒ ኦꬆድ ጋርክ ታ አዳይ ታስ እንጌዝ ኦስታይ ታ ባጋ ማርካትዛ፤ አዳይ ታና አዛዜዛና ቤዝዛ።
37 «ማ ታና ኪቴዝ አዳይ ፋ ኡባስ ታባዝ ማርካትዛ። ይ ኤ ቃላ ኡባራካ ስኤካ ዎይ ኤ ማላ ብእቤኤካያ።
38 ኤ አዛዜዛና ይ አማኖዋ ግሾስ ኤ ቃላይ ይ ዎዝና ጋንጨ ባያ።
39 «ጌሻ ማጻፍታይፕ መꬍና ደኦ ደማድባዝ ይንትስ ኣዝን ኡንታን ይ ፕላግዛ፤ ኡንቲ ታባዝ ማርካትዛ።
40 ዝን ይ ደኦ ደንጎዳይስ ታኮ የኦዳይስ ኮዮያ።
41 «አሳፕ ታኒ ቦንቾ ኮዮያ።
42 ዝን ታኒ ይ ዎዝና ጋንጨ ጾስስ ቃ ባዛ ኤርዛ።
43 ታኒ ታ አዳይ ማዉተር የኤዛ፥ ዝን ታና ሞከካያ። ሀራይ ፋ ማዉተር ይእዛ ዎደ ኤዛ ሞክዛ።
44 ይ ፐታይ ፐታይፕ ቦንቾ ኮይዝታይ፥ ፐቲ ጾሳፕ ይእዝ ጋላታ ኤኮዳይስ ኮዮዝታይ፥ ዋይዚ ታና አማኖዳይስ ዳንዳኤ?
45 «ታኒ ታ አዳይ ቲና ይንታን ሞትዛባዝ ይንትስ ኣዝፐ። ይንታን ሞቶዳይ ይ ኡፋይሳር ናግዝ ሙሰ።
46 ይ ሙሰ አማኔዝ ባዝ ማቄዛኮ ኤ ታ ባጋ ጻፌዝ ግሾስ ታናካ አማኖዳዝን።
47 ዝን ይ ኤ ጻፌዛና አማናም እጽኮ ታ ቃላ ዋይዚ አማኖዴ?» ዬጌዛ።