18
ኡባፕ ኣꬍዛይ ኦኖ?
(ማር. 9:33-37፤ ሉቃ. 9:46-48)
1 የ ዎደ የሱሳ ታማርታይ ይኢ፥ «ሳሎ ካተትꬅ ኡባፕ ኣꬍዛይ ኦኖ?» ዬጊ ኦይጬዛ።
2 የሱሳ ፐቲ ዱደ ናአ ጼጊ ኡ ጋንጨ ኤሲ Ꮊይ ጋርከ ዬጌዛ።
3 «ታ ይንትስ ቱሮ ኦድዛ፤ ይ ላምንታምጽኮኔ ዱደ ናአ ጋርክ ሀናም እጽኮ ሳሎ ካተትꬅ ገሎዳይስ የሻ ዳንዳኦያ።
4 ይኬ፥ Ꮊ ዱደ ናአይ ጋርክ ፋና ካዉሽዛ ኦንካ ሳሎ ካተትꬅ ኡባፕ ኣꬍዛ ማቃዳ።
5 Ꮊይ ጋርክ ዱደ ናአ ታ ሱንꬃር ሞክዛ ኦንካ ታና ሞክዛ።
6 «ዝን ታና አማንዛ Ꮊ ጽቅታይፕ ፐታ ናጋራ ኦꬆድ ጋርክ ꬉበ ማቅዝ ኦንካ ዳማ ዎጻ ፋ ቆል አጪ ጪሞ አባ ጋንጨ ምትንትኮ ኤስ ሎኦ።
7 አላመል አሲ ናጋራ ኦꬆድ ጋርክ ኦꬅዛባዝ የዛ ግሾስ አላመ አየ። የይ ጋርክ ባዝ የኤካ አታሚ፥ ዝን ꬉበ ኤ ባጋር ይእዝ አꬃ አየ።
8 «ነ ኩሸ ዎይ ነ ቶኬ ነና ባልꬅኮ ኔፕ ጋቺ ኦሎባ። ኔኒ ናምኢ ኩሸር ዎይ ናምኢ ቶከር መꬍና ታማ ጋንጨ ዎꬋዳይፕ ኩሸ ዎይ ቶኬ ዱጻ ማቂ መꬍና ደኦ ደንግዛይ ኔስ ሎኦ።
9 ማ ነ ኣፋይ ነና ባልꬅኮ እዞ ዎጪ ከሲ ኦሎባ። ኔኒ ናምኢ ኣፈር ጋናመ ታማ ጋንጨ ዎꬋዳይፕ ፐቲ ኣፈር መꬍና ደኦ ገልዛኮ ኔስ ሎኦ።
10 «ታ ይንትስ ኦድዛ፤ ሳሎ የዝ ኡንታን ናግዝ ኪታንችታይ ኡባ ዎደ ሳሎ የዝ ታ አዳይ ቲና የዝ ግሾስ ይ Ꮊ ጽቅታይፕ ፐታካ ሌቃም ጋርክ ናግንቶይታ።
11 አስ ናአይ ꬋቤዝታ አሾዳይስ የኤዛ» ዬጌዛ።
ꬋቤዝ ዱር ኣዝሶ
(ሉቃ. 15:3-7)
12 ማ የሱሳ፥ «ይንትስ አብ ኣዜ? ፐቲ አꬃይስ ጼት ዱርታይ የዝታይፐ ፐታይ ꬋብኮ ኡዱፉን ታማኔ ኡዱፉንታ አምባል አፋ ኦሊ አሺ የ ꬋቤዛና ኮዮዳይስ Ꮊንጎሳ?
13 ታ ቱሮ ኦድዛ፤ ኤ ደንጌዝ ዎደ ኡዱፉን ታማኔ ኡዱፉንታይፕ ኣꬃ ꬋቢ በንቴዝ ፐቲ ዱራይል ኡፋይትዛ።
14 የይ ጋርከካ፥ ሳሎ የዝ ይ አዳይ Ꮊ ጽቅታይፕ ፐታይ ꬋቦድ ጋርክ ኮዮያ።
ቆሄዝ አሲ ዋይሳደ?
15 «ነ እሻይ ነና ቆህኮ ነ ኣዳስ ኤዝኮ Ꮊንጊ ኤ ቡታ ኤዝስ ኦዶባ። ኤ ነና ስእኮ ነ እሻ ኔስ ሻሎ ኡዶባ።
16 ዝን ኤ ነና ስአም እጽኮ፥ ናምኢ ዎይ ሀይꬒ አስ ማርካር ሞቲ ዎꬍዛ ግሾስ ፐቲ ዎይ ናምኢ አስ ኤኪ ኤዝኮ Ꮊንጎባ።
17 ኤ ኡንታን ስአም እጽኮ፥ ዎሳ ኬꬅስ ኦዶባ። ዎሳ ኬꬅ ግዝ ባዝ ስአም እጽኮ አማኖዋ አስ ጋርክ ዎይ ቃራጸ ጋችስዝ አስ ጋርክ ኤዛ ታይቦባ።
18 «ታ ይንትስ ቱሮ ኦድዛ፤ ሳአ ይ አጭዝ ባዝ ኡቢታይ ሳሎ ጾስ ካለ አጭንቴዝ ባዝ ማቃዳ። ሳአ ይ ብሌዝ ባዝ ኡቢታይ ሳሎ ጾስ ካለ ብልንቴዝ ባዝ ማቃዳ።
19 «ማካ ታ ይንትስ ኦድዛ፤ ሳአ ይንትፕ ናምእታይ ፐቲ ዎዝናር ማቂ ጾስ ዎስዛ ባዝ ማቅኮ ሳሎ የዝ ታ አዳይ ይንትስ ኦꬆዳ።
20 ታና ካልዝታይፕ ናምኢ ዎይ ሀይꬒ ማቂ ሺቅዛ በሳ ታ ኡ ጋንጨ በንቶዳ» ዬጌዛ።
አቶ ጉስ ባጋ
21 የ ዎደ ጵጽሮሳ የሱሳኮ ይኢ፥ «ጎዳዮ፥ ታ እሻይ ታና ቆህኮ ኣፑን ቶኬ ታ አቶ ጎዳይስ ቤዝኔ? ላፑን ቶኬ ሄሎዳይሶኔ?» ግ ኦይጬዛ።
22 የሱሳ ማሂ፥ «የያ ባያ፥ ላፑን ታም ቶኬ ላፑንፕ አትን ላፑን ቶኬ ባያ።
23 «የይ ግሾስ፥ ጾስ ካተትꬃይ ፋ ኦሶ አስታይር ፋ ምሻይ ፓጨዛኮኔ ፉጬዛኮ በአዳይስ ቆፔዝ ካታ ኣዝዛ።
24 የ ካታይ ሚሻይ ፓጨዛኮኔ ፉጬዛኮ ብእዛ ዎደ ጋመ ሙኩለ አጮ የዝ ፐቲ አꬃ ኤዝኮ ከኤዛ።
25 ዝን የ አይላይ አጫ ጭጎዳይስ ጋምንትን ኤዛ፥ ኤ ማቻትራ፥ ኤ ናእታይራኔ ኤዝስ የዛ ባዝ ኡባይ ባይዝንቲ አጮ ጭግንቶድ ጋርክ ኤዛ ጎዳይ አዛዜዛ።
26 የዝን አይላይ ፋ ጎዳይ ቶካይል አፋ ዎꬊ፥ ‹ታ ጎዳዮ፥ ሀያና ጽቃስ ጋምኦዬ፥ ታ ኡባ ጭጎዳ› ዬጊ ዎሴዛ።
27 ካታይ ኤዝስ ቃꬍንቲ፥ ዳኪ አሼዛ፤ ኤ አጫካ ማሬዛ።
28 «ዝን የ አይላይ ከዚ Ꮊንጊ ፋ ላጌ ኦሶ አስታይፕ ፐታይ ኤዛፕ ጽቃ ሚሸ ታልኤዛና፥ ‹ኔል አፋ የዝ ታ ሚሻ ታስ ጭጎባ› ግ አꬃይስ ቆꬋት ጩሌዛ።
29 «የ ኤ ላጌ አይላይ ኤ ቶካይል ዎꬊ፥ ‹ሀያና ጽቃል ጋምኦዬ ታ ኔስ ኡባ ጭጎዳ› ዬጊ ዎሴዛ።
30 «ዝን እጺ ኤኪ ካንጊ ፋ ላጋይ ኣጫ ጭጎድ ሄሎዳይስ አች ኬꬃ ገልሴዛ።
31 የይ ግሾስ፥ ሀራ ላጌ ኦሶ አስታይ የያ ብኢ ኢታ ይሎቲ፥ Ꮊንጊ ፋ ጎዳይስ ኤ ኦꬄዝ ባዝታ ኡባ ኦዴዛ።
32 «የዝን ጎዳይ የ አይላ ጼግሲ፥ ‹Ꮊ ኢታ አይላዮ፥ ኔኒ ታና ዎሴዝ ግሾስ ታ ነ አጫ ኡባ ነና ማሬዛ።
33 የዝን፥ ታኒ ነ አጫ ማሬዛይ ጋርክ ኔኒ ነ ላጌ ማቄዝ አይላይ አጫ ማሮዳይስ ኔስ ቤዞሳ?› ዬጌዛ።
34 የይ ግሾስ፥ ጎዳይ ኢታ ይሎቲ፥ ኤ ፋ አጫ ኡባ ጭጎድ ሄሎዳይስ ፓꬅ ካእንቶዳይ ጋርክ አች ኬꬅስ ኣꬂ እንጌዛ።
35 «የይ ጋርከ፥ ይ ፐታይ ፐታይ ይ እሻ ዎዝናፕ ማራም እጽኮ ሳሎ የዝ ታ አዳይ ይንታን Ꮊይ ጋርክ ኦꬆዳ» ዬጌዛ።