2
ቱማ አሽከትꬅ
1 ክርስቶሳር ይንትስ ምኖትꬂ የዝኮ፤ ማ ኤ ሲቃይራካ ይ ምንꬃꬅንቴዝባዝ ማቅኮ፥ ጌሻ አያናር ይንትስ ፐትፐተꬂ የዝኮ፤ ይ ዎልስ ኬህኮኔ ቃꬊንትኮ፥
2 ይኬ ይ ፐቲ ቆፋር፥ ሲቆር፥ ፐቲ ዎዛናራኔ አያናር ፐቶ ማቂ ታና ፎሎ ኡፋይሶይታ።
3 ይንታን ዶሶር ዎይ ጬቅንታር ፐትባዝካ ኦꬅፓተ። ዝን ይ ፐታይ ፐታይፕ ታ ኣꬍዛ ዬጊ ቆፐካዛር ይንታን ዝቂ ኡዶይታ።
4 ይ ፐታይ ፐታይ፥ ሀራ አስ ማድዛ ባዝ ኮዮይታፕ አትን ይንታን ማድዛ ባዝ ኣዳ ኮይፓተ።
5 ክርስቶስ የሱሳር የዝ ቆፋይ ይንታር የዞዳይስ ቤዝዛ።
6 ኤዝስ ኡባ ዎደ ጾሳትꬅ ሃኖትꬂ የዛ።
ማቆፕ አትን፥ ኤዛ ጾሳር ፐቶ ኡድዝ ጾሳትꬅ ሀኖታ፥
ዎልቃር ኤኮዳይስ ኮየካያ።
7 ማቆዝን፥ ኤ ፋስ የዛ ቦንቻ ኡባ አሺ፥
አይለ ጋርክ ማቂ አስ ኣዚ በንቴዛ፤
አስ ጋርክ የልንቴዛ።
8 ኤ ፋና ላፍꬄዛ፤
Ꮊይቆድ ጋꬆ፥
ሀራ አቶዝን ማዝቃለል አፋ
Ꮊይቆድ ሄሎዳይስ ኪትንቴዛ።
9 የይ ግሾ፥ ጾሳይ ኤዛ ኣꬂ ꬎቅ ꬎቅ ኡዴዛ፤
ማ ሱንꬅ ኡባፐካ ኣꬊዝ ꬎቀ ሱንꬅ እንጌዛ።
10 ሳሎኔ ሳአል፥
ሳአፕ ኦሞር የዝ ኡቢታይ፥
የሱሳ ሱንꬃይ ቦንቻይስ ቡንቂቶዳ።
11 አስ ኡባይ ፋ እራንꬃይር፥
የሱስ ክርስቶሳ ጎዳ ዬጊ ማርካቲ፥
ጾስ አዳይስ ቦንቾ እንጌዛ።
Ꮊ አላማይስ ፖኦ ማቅꬅ
12 ታ እሹንꬆ፥ ታኒ ይንታር የዛ ዎደ ኡባይድ ይ ኪትንቴዛይ ጋርክ፥ Ꮊት ታኒ ይ ላንቃይፕ ሃክኮካ፥ ቲናሳይፕ ኣꬂ፥ ኪትንቶዳይስ ቤዝዛ። ጾሳይስ ያሻራኔ ኩኩርሳር ይ አቶትꬃ ቤዝዛ ኦሶ ኦꬆይታ።
13 ጾሳይ፥ ይ ሀኖድ ጋርክ ኤ ኮይዝ ባዝ ይ ኮዮዳይ ጋርከኔ ኦꬆዳይ ጋርክ ኡባ ዎደ ይ ጋንጨ ኦꬅዛ።
14 አባ ኦሶ ኦꬅታራካ ዝግረካዛራኔ ፓላመካዛር ኦꬆይታ።
15 ዡጫኔ ናጋራ ኦꬅዝ አስ ጋንጨ ቦርንቶዝታ፥ ቦርሶ ባዝታኔ ጌሻ ጾስ ናእታ ማቆይታ። ይ ኡ ጋንጨ ሳሎ ጾልንቶ ጋርክ ፖኦዳ።
16 የይካ ሀንዛይ ደኦ እንግዝ ቃላ ሚንꬅ አይክꬃራ። የ ዎደ ታ ዳቡርሳይ ታ ኦሳይ ጨረ አተካ ግሾስ ክርስቶሳ ይእዛ ጋላስ ታ ይንታል ጬቅንቶዳ።
17 ሀኖ ዝን ይ ጾስስ አማኖር እንግዝ ያርሻይላኔ ኦሳይል አፋ ታካ ጉጅንቲ ያርሽንትዛኮ ታና ኡፋይስዛ። ይንትካ ታር ኡፋይቶዳ።
18 የይ ጋርክ ይንትካ ኡፋይቲ ታናካ ይንታር ኡፋይሶዳይስ ቤዝዛ።
ጽማቶሳራኔ ኤጳፍራድቱሳ
19 ታኒ ይ የስ ባጋ ስኢ ኡፋይቶዳይስ ጽማቶሳ ይንትኮ ኤልሲ ዳኮዳይ ጎዳ የሱሳ ሸነ ማቆዳና ታ አማንዛ።
20 ይንትስ ዎዝናፕ ቆፕዝ ኤ ጋርከ አስ ሀራ ኦንካ ታስ ባያ።
21 Ꮊንክታይ ፋና አድዛ ባዝ ኮዥዛፕ አትን የሱስ ክርስቶሳ ኮይዝ ባዝ ኦꬆያ።
22 ኤ ታራ ዎላ ማቂ ናአ ፋ አደስ ኦꬅዛይ ጋርክ ዎንግለ ኦሶ ኦꬄዛኔ አማንንትዛ አስ ማቄዛና ይ ኤርዛ።
23 የይ ግሾ፥ ታባዚ አብ ሀኖዳዛኮ ብኢ ኤልሲ ኤዛ ይንትኮ ዳኮዳ ግ ታ ቆፕዛ።
24 ታኒ፥ ታ ኡባስ ኡከር ይንትኮ Ꮊማዳና ጎዳይል አማንንትዛ።
25 ኡባራካ፥ ታኒ፥ ታ እሻ ኤጳፍሮድቱሳ፥ ታር ዎላ ታ ባጋ ማቂ ኦꬄዛና፥ ዎታዳረ ማቄዛኔ፥ ታና ማዶዳይስ ይ አዛዜዛና፥ ይንትኮ ኪቶዳይስ ቆፔዛ።
26 ኤ ይንታን ኡብታ በአዳይስ ኢታ ላሞትዛ። ማ ኤ ሀርግንቴዛና ይ ስኤዝ ግሾስ ፋ ዎዝናር ሎእꬂ ኡንእንቴዛ።
27 ኤ ቱማ ሀርግንቲ Ꮊይቂ ዉሪ አቴዛ። ዝን ጾሳይ ኤዝስ ቃꬊንቴዛ። ኤ ኣዳስ ባዝን አዛናይ አዛኖል አፋ ጉዥንታም ጋርክ፥ ታስካ ቃꬊንቴዛ።
28 ይኬ፥ ይ ኤዛ ማሂ ብኢ ኡፋይቶድ ጋርክ ታስካ ታ ዎዛና ጹሳይ እርጾድ ጋርክ ታኒ ኤዛ ኤልሲ ይንትኮ ዳኮዳይስ አሞትዛ።
29 ጎዳ አማንዛ አስ ጋርክ ኤዛ ኩንꬅ ኡፋይሳር ሞኮይታ። ማ ኤ ጋርክ አስ ኡብታካ ቦንቾይታ።
30 ይ ታ ላንቀ ማቂ ኦꬆዳይስ ዳንዳኦዋ ማዴ ማዲ ክርስቶሳ ኦሳይ ግሾስ ፋ ሸምፖስ ምጭንተካዛር Ꮊይቂ ዉሪ አቴዛ።