14
ዱራኔ ጼታኔ ኦይታማኔ ኦይዲ ሙኩሎ አስታ
1 የይፕ ጉየ፥ ዱራይ ጽዮነ አምባል አፋ ኤቄዛና ታ በኤዛ። ኤ ሱንꬃኔ ኤ አዳይ ሱንꬃይ ኡ ስናይድ ጻፍንቴዝ፥ ጼታኔ ኦይታማኔ ኦይዲ ሙኩሎ አስታይ ኤዛር የዛ።
2 ሳሎፕ ግታ ሶሳ ሃꬅ ጉምꬅኔ ዳዳ ጉምꬅ ኣዝዝ ዎልቃማ ጊርꬅ ታ ስኤዛ። ማ ታ ስኤዝ ጊርꬃይ ዲꬅ ዲጾዳር ስእንትዝ ጊርꬅ ጋርከ።
3 ጼታኔ ኦይታማኔ ኦይዲ ሙኩሎ አስታይ ዙፋናይ ቲና፥ ኦይዲ ሸምፖር የዝ መትꬅታይ ቲናኔ ጭምታይ ቲና ኤቂ ቢታፕ ዎዝንቴዝታይፕ ሀራ ኦንካ ታማሮዳይስ ዳንዳኦዋ ኦሮꬅ ማዝሙረ የጼዛ።
4 የይትታይ ማቻር ፋና ቱንሰካ ናጌዝ ጌሽታ። ኡንቲ ዱራይ Ꮊንግዛ አቆ ኡባ ካልዛ። ኡንቲ ጾስስኔ ዱራይስ አስ ኡባይ ጋንጨፕ ባይራ ማቃዳይ ጋርክ ዎዝንቲ ሺቄዝታ።
5 ኡንቲ ዎርዶኔ ቦሮ ባ አስታ።
ሀይꬒ ኪታንችታ
6 የይፕ ጉየ፥ መꬍና ዎንግለ ሳአል አፋ የዝ ካተትꬅ ኡባይስ፥ ኮች ኡባይስ፥ ያራ ኡባይስኔ ዱማ ዱማ ዶና ኦድንትዛ ኡባይስ ማርካቶዳይስ ሳሎራ ፕራꬍዛ ሀራ ኪታንቾ ታ በኤዛ።
7 የ ኪታንቻይ ፋ ቃላ ꬎቅ ኡዲ፥ «ጾሲ አላማ ፕርድዛ ሳታይ ሄሌዛ፥ ጾሳይስ ያሽቶይታ፤ ኤዛ ቦንቾይታ። ሳሎኔ ሳአ፥ አባኔ ፑልቶ ሃꬃ መꬌዝ ጾሳይስ ጎይኖይታ» ዬጌዛ።
8 ሀራ ናምእንꬆ ኪታንቻይ፥ «ዎይታ ኡባ ማꬅስዝ ላግተ ዎይነ ኡሼዛን፥ ግታ ባብሎነ ፖኬዛ! ፖኬዛ!» ዬጊ ኡክታር ቲና ኪታንቻ ካሌዛ።
9 ሃይꬒንꬆ ኪታንቻይ ኡንታን ካሊ፥ ፋ ቃላ ꬎቅ ኡዲ፥ «ዶአይስኔ ኤ ምስላይስ ጎይንዛይ ዎይ ኤ ማላ ፋ ስኖል ዎይ ፋ ኩሸል ጋዴዝ ኡባይ፥
10 ጾስ ካች ዎይና ኡ ኡዦዳ የይካ ዎይናይካ ዋላክንተካ ኤ ካች ጹአይር ኣዳ ዱቅንቴዛያ። ኡንቲ ጌሻ ኪታንችታይ ቲናኔ ዱራይ ቲና ኤጽዝ ዲኔ ታማ ጋንጨ ፋꬅ ካእንቶዳ።
11 ኡንቲ ዋይንትዛ ታማይፕ ከዝዝ ጩያር መꬊ መꬍናስ ጩይታር የዞዳ። ዶአኔ ኤ ምስላ ጎይንዛኔ ማ የ ዶአይ ሱንꬃ ማላይ የዝ ኦንካ ቃማኔ ጋላስ ሸምፖ ባይꬅ ካእንቶዳ» ዬጌዛ።
12 ጾስ አዛዛ ናግዛይኔ የሱሳስ አማንንቴዝታይ ጋርዤዝ ምኖትꬃይ ቆንጮዳይ የይዳ።
13 ሳሎፕ Ꮊይ ጋርክ ዬግዝ ጊርꬅ ታ ስኤዛ። «Ꮊያ ጻፎባ፥ ይከፕ ጉየ ጎዳይር የዚ Ꮊይቅዝታይ አንጅንቴዝታ» ዬግዝ ጊርꬅ ሳሎፕ ታ ስኤዛ። አያናይ፥ «ኤ ቱማ፥ ኡ ኦሳይ ኡንታን ካልዛ ግሾስ ኡንቲ ፋ ዳቡራይፕ ሸምፖዳ» ዬግዛ።
ጎዳይ ካቺ ቢታል
14 የይፕ ጉየ፥ ቦꬅ ሻራ በንቴዛ። Ꮊ ሻራይል አፋ በቴዝ አስ ናአ ኣዝዛና ታ በኤዛ። ኤ ፋ ኦማይል አፋ ዎርቃ ዛዉደ ጋዴዛ፤ ፋ ኩሻይዳካ ኦጮ ባጫ አይኬዛ።
15 ሀራ ኪታንቻይ ጾስ ኬꬃይፕ ከዚ፥ ሻራል አፋ በቴዛይኮ ፋ ቃላ ꬎቅ ኡዲ፥ «ካꬃ ሺሾ ቶርቼ ሄሌዝ ግሾስ ነ ባጫ ዳኪ ካꬃ ቡጮባ፤ ሳአ የዝ ካꬃ ቡጭዝ ዎደ ሄሌዛ» ዬጌዛ።
16 የይፐ ሻራል አፋ በቴዛይ ፋ ባጫ ሳአ ዳኪ፥ ሳአ የዝ ካꬃ ቡጬዛ።
17 ማካ ሳሎ የዝ ጾስ ኬꬃይፕ ሀራ ኪታንቻይ ከዜዝ፤ ኤስካ ኦጮ ባጫ የዛ።
18 ታማል አፋ ማዉተ የዝ ሀራ ኪታንቻይ ያርሾ አቃይ ካላይፕ ከዜዝ። ኤ ፋ ቃላ ꬎቅ ኡዲ ኦጮ ባጫ አይኬዝ ኪታንቻይኮ፥ «ዎይነ ኣፋይ ቴሬዝ ግሾስ ነ ኦጮ ባጫ ዳኪ፥ ሳአ የዝ ዎይናይ ኮሻ ጋቺ ሺሾባ» ዬጌዛ።
19 የ ኪታንቻይ ፋ ባጫ ዳኪ፥ ሳአ የዝ ዎይናይፕ ኮሻ ጋቺ፥ ጾስ ግታ ካች ቡልዝ አቆ ኦሌዛ።
20 ኡንቲ ካታማይፕ ጋጻ የዝ ዎይነ ኣፈ ቡልዝ አቆ ቡሌዛ። ሱꬂ ዎይነ ቡልዝ አቃይፕ ከዚ ሀይꬒ ጼት ክሎ ምትረ ጋርክ ሃኪ፥ ፋራ ፑሎ ሄልዛ ጋርክ ኤል ꬎቅ ጌዛ።