18
ባብሎነ ꬋቦ
1 የይፕ ጉየ፥ ግታ ማዉተር የዝ ሀራ ኪታንቻይ ሳሎፕ ዎꬎዳር ታ በኤዛ። የ ኪታንቻይ ቦንቻይ ሳአ ፖእሴዛ።
2 ፋ ቃላ ꬎቅ ኡዲ፥
«ዳማ ባብሎነ ꬋቤዛ! ኤ ꬋቤዛ!
ባብሎነ ጋለነስ አቅዛ አቆ ማቄዛ።
ዱማ ዱማ ቱና አያንታይስ ኬꬄ ማቄዛ፤
ቱናኔ ፍልንቴዝ ካፍታይ ሸምፕዛ አቆ ማቄዛ።
3 አስ ዘረꬅ ኡባ ፋ ላመ ዎይና ኡሼዛ።
ሳአ ካትታይ ኢር ላሜዛ። ኢስ የዝ አቆፕ ኣꬌዝ ዱረትꬃይፕ ደንዴዛይድ
ቢታል የዝ ዛልእዝታይ ዱረቴዛ»
ዬጌዛ።
4 የይፕ ጉየ፥ ታ ሳሎፕ Ꮊይ ጋርክ ዬግዝ ሀራ ግርሲ ስኤዛ።
«ታ ዎይታዮ እ ናጋራ ኢር ኮጻማይ ጋርከኔ፥
እዛ ኤኮዳይስ የዝ ሴራ ይ ኤካማይ ጋርክ፥
ኢፐ ከዞይታ።
5 ይኬ፥ እ ናጋራይ ሳሎ ሄሎዳይስ ዶርንቴዛ።
ጾሲ እ ናቃ ቆፔዛ።
6 እዛ እንጌዛን ጋርክ ማሂ ኢስ እንጎይታ።
እዛ ኦꬄዝ ኦሳይስ ናምኢ ኩሸ ኢስ ማሆይታ።
እዛ ዋላኬዝ ኡሻይል አፋ ይ ናምኢ ኩሸ ዋላክንቴዝ ኡሽ እ ጹአይድ ኩንꬆይታ።
7 እዛ ቦንችንቴዛኔ ኢስ ጊጌዛይ ጋርክ፥
ኢስ መቶኔ ካዮ እንጎይታ።
እዛ ፋ ዎዛናይር፥
‹ታኒ ካታቲ ጋርክ በቴዛ፤ ታ ኣዝን ባ ማች ባያ፤
ታኒ ኡባራካ ካያካ የሻ ታን በአሚ› ዬጌዛ።
8 የይ ግሾስ፥ ቦሻ ኡባይ፥ Ꮊይቆ
ሀርገ፥ ካያኔ ናየ እዞ ፐቲ ጋላስ አይኮዳ።
ማ እዛ ታማር ጹግንቶዳ፤
አብስ ጊኮ፥ እዝል አፋ ፕርድዛ ጎዳ ጾሳይ ዎልቃማ»
ዬጌዛ።
9 «ኢር ላሜዝታይስኔ እ ጊጋይድ የዜዝ፥ አላመ ካትታይ የ ካታምታ ጹግንትን ከዜዝ ጩያ በኤዝ ዎደ ኢስ ኡኪ ዬኮዳ።
10 ኡንቲ የ ካታምት ዋየ ብኢ Ꮊሽቴዝ ግሾስ ሃኪ ኤቂ፥
«‹Ꮊ ግታ ካታምተ! ዎልቃማ ካታምተ!
ባብሎነ፥ ነና አየ! አየ!
ኔኒ ፐቲ ሳተ ጋንጨ ነ ፕርዳ ኤኬዛ› ዬጎዳ።
11 «ኡ ማርካበ ጫና ይከፕ ዎንግዛ አስ ባዛይ ግሾስ ሳአ የዝ ዛልአንችታይ የ ካታምትስ ዋስዛ ካዮትዛ
12 ኡ ማርካባይድ ጫንንቴዛይካ ዎርቀ፥ ብራ፥ ቦንቾ ሹቺ፥ እንቆ ግዝ አልኦ ሹቺ፥ ሌኦ ማኦ፥ ጩልኮ ማኦ፥ ሊኖ ማኦ፥ ሀረ ማኦ፥ ዞቆ ማኦ፥ ዱማ ዱማ ሳዉዛ ምꬂ፥ ዛለ አቻፕ፥ አልኦ ምꬃፕ፥ ናሰ ብራታፕ፥ ጎለ ሹቻፕ ኦꬅንቴዝ ሚሻ ኡባ፥
13 ቃራፋ፥ ሳዎ፥ እጻኔ፥ ካርበ፥ ሽቶ፥ ዎይነ፥ ዛይተ፥ ሊቆ ꬊለ፥ ግስተ፥ መሄ፥ ዱረ፥ ፋራ፥ ፋራ ጋረ፥ አይልታኔ ሀራ አስታ።
14 «ዛልአንችታይ አስትኮ፥ ‹ኔኒ አሞቴዝ ሎኦ ባዝ ኡባይ ኔፕ ꬋቤዛ። ነ ሻላይኔ ቡቁርታይ ኡባይ ኔፕ ሃኬዛ። ኔኒ ማሂ ኡንታን የሻ ደንጋሚ› ዬጌዛ።
15 የይትታ ዛልእ ዱረቴዝ ዛልአንችታይ እ መታ ያሽቲ ኢፕ ሃኪ ኤቆዳ። ኡንቲ ዬኮዳኔ ካያቶዳ።
16 ማ፥
«‹ሊኖ ማኦ፥ ሌኦ ማኦኔ ዞቆ ማኦ ማኢ፥
ዎርቃር፥ ቦንቾ ሹቻራኔ እንቆ ግዝ አልኦ ሹቻር ቡቁርንቴዛ፥
የ ግታ ካታምታ አየ! አየ!
17 Ꮊይ ጋርክ ግታ ሻሎ ኡባይ ፐቲ ሳተር ꬋቤዛ› ዬጌዛ።
«ማርካበ ላግዝታይ ኡባይ፥ ማርካበር Ꮊንግዝታይ ኡባይ፥ ማርካበል አፋ ኦꬅዛ ኡባይኔ አባል ዛልእዛ ኡባይ ሃኪ ኤቄዛ።
18 የ ካታምታ ጹግንትን ከዜዝ ጩያ በኤዝ ዎደ ‹Ꮊ ዎልቃማ ካታምቶ ኣዝዛ ሀራ ካታማ የነሻ?› ዬጌዛ።
19 ኡንቲ ፋ ኦማል ቡልአ ቆል፥ ዬኬዛኔ ካያቴዛ።
«‹አባል አፋ ማርካብታይ የዝ ኡባይ፥
እ ሻላይድ ዱረቴዝ ኡባይ፥
የ ካታምታ ፐቲ ሳተ ꬋቤዝ ግሾስ
እዞ አየ! እዞ አየ!
20 ሳሎ፥ እ ꬋባይድ ኡፋይቶባ!
ጌሽታዮ፥ ሀዋርታዮ፥ ናብታዮ፥
ጾሲ ይ ግሾስ ኢል አፋ ፕርዴዝ ግሾስ ኡፋይቶይታ›»
ዬጌዛ።
21 የይፕ ጉየ፥ ፐቲ ምኖ ኪታንቻይ ዎጻ ኣዝዛ ግታ ሹች ደንꬂ አባ ጋንጨ ꬎግታር፥ «ዳማ ካታምታ ባብሎነ ዎልቃር ኡርቅንቲ Ꮊይ ጋርክ ፖኮዳ፤ እዛ Ꮊይኖፕ ጉየ ኡባራካ በንታሚ።
22 ዲꬅ ዲጽዝታይኔ የጽዝታይ፥ ሹልሹሎኔ ቱልቱላ ፑግዝታይ፥ ይከፕ ጉየ ነ ጋንጨ ኡባራካ ስእንታሚ። አብ ኩሸ ህላር ኦꬅዛ አስካ ነ ጋንጨ በንተና። ዎጻ ግርስ ይከፕ ጉየ ነ ጋንጨ ስእንታም።
23 ጾምፐ ፖኦ Ꮊይፕ ጉየ ነ ጋንጨ ፖኤና። ማቾ ኤክዛይኔ ኣዝን ገልዝታይ ግርሳይ ይከፕ ጉየ ነ ጋንጨ ስእንታም። ነ ዛልአንችታይ ቢታ ኡባይል ኤርንቴዝ ዎልቃምታ። ነ ቢታይር ዎያ ኡባ ባልꬄዛ» ዬጌዛ።
24 ናብታይ ሱꬅ፥ ጌሽታይ ሱꬅኔ ቢታል ሹክንቴዝ አስ ኡባ ሱꬅ እ ጋንጨ በንቴዝ ግሾስ ባብሎነ ፕርድንቴዛ።