6
Jesús Nazaretpo aaney
(Mt. 13:53-58; Lc. 4:16-30)
1 Jesús huämi yeu sika ä buíarau yépsak, jume ä discíipulommaki.
2 Jimyore taahuata yúmak éntok jum sinagogapo am majtíataitek. Huanäi juebenakä ä jíkkajakä at guómtek ínel jíaka:
—¿Jákübo bétanasu ïri íkäi täya jäni? ¿Jita suáhuasa jäni ïri ä jípurëhui, éntok hua milagrom ä joähui, jítasasu nok báare jäni?
3 ¿Jachu kaa ïri ínel jü carpínteero, Maríata asóa, Jacobota, éntok Joseta, Judasta, éntok Símonta saayi? ¿Jáchum kaa ket im itomak aane jume ä huáyihuam?
Huanärim áa bétana jájana jiautáitek.
4 Jesús éntok ínel ámeu jiaahua:
—Kíal jábe profeta júne yörihua, të huam ä buíaräpo, éntok ä jóapo ä huahuajim násuk ëe.
5 Huanäi jume milagrom júne kara áma yáuhuai, Kia huame kökoremmet kaa jáikimmet jíba mámteka am tütek.
6 Huanäi kaa at al‑léakä taahuak hua kaíta bem súalëubechi. Huanäi Jesús jume huate puéblommet naa siikä am majtíaka.
Jume dóoce comisionpo yeu jaahuak
(Mt. 10:5-15; Lc. 9:1-6)
7 Jume dóoce yeu púarim nau núnuka, guoguóyim naa bíttuak, útteata am mákakä diáblom yoremem jiápsipo yeu bébnakë béchïbo.
8 Éntok kaíta am huéria sauhue böot béchïbo, morralta, éntok páanim junne, tómita junne; boróoniata jíbba.
9 Éntok am béräbochate sauhue, éntok kaa guoyik sánkotam huéria sauhue.
10 Ket ínel ámeu jiaahua:
—Kia jak jóapo enchim mabethuakäpem aane, jum puéblopo enchim yeu kátëpo tajti.
11 Sïmekut huam kaa enchim mabethuakäpo, éntok huam kaa enchim nok jikkaibahuäpo, yeu katëtekem huaka tóröchiata enchim guókimmet chätulata ámeu tátaknake, bem jüneenakë béchïbo kaa tüisi bem ayúkähui. Tua lútüriapone enchimeu ínel jiaahua, huame Sodóma teäpo éntok Gomórrapo joomem chë jiokoritunake hua taahuari bette nokta chúpeyo, huame puéblopo kaa enchim mabethuakäpo joomem béppa.
12 Huanäi jume dóoce yeu púari yeu sájakä géntemmeu ä noktáitek, huaka yoremem emo temajeka am jíapsi kúaktinakëhui.
13 Éntokim juebena diáblom yoremem jiápsipo anëu yeu bebbai, éntok juebena kökoremem tütek aceiteta ámet óreka.
Juan Bautista mëhuakähui
(Mt. 14:1-12; Lc. 9:7-9)
14 Jü rey Herodes éntok Jesústa bétana buériata jíkkajak, bueïtuk ä téhuam sïmekut yeu machíak. Huanäi Herodes ínel jiaahua:
—Juan jü batöaïhui jíabitela, jume kókkolam násuku. Kíalïku úttiärata jípure milagrom ä jonákë béchïbo.
15 Huate ä Elías tíyay. Huate éntok huame huate profeetam násuk ä profeeta tíyay.
16 Íkäi jíkkajakä jü Herodes, ínel jiaahua:
—Ïri jü Juan ín kóba chúktiatebokähui. Áapo kókkolam násuk jíabitela.
17 Bueïtuk áapo juka Juanta buíjtebokä ä carcelpo ä páttiatebokay, Herodíasta béchïbo, Felípeta juubi ä sailahua; bueïtuk áapo, jü Herodes, Herodíasta jípurey.
18 Bueïtuk Juan Herodestau ínel jiakay:
—Kaa türi juka em saila jubi em jípurëhui.
19 Herodías, éntok át kopteka ä mëpéiyay, të kaa áma yuumay,
20 bueïtuk Herodes Juanta bétana májhuey, bueïtuk jüneiyay Juanta lútula entok Diostau bíchaa näikiataka ä jiápsaïhui, entok ä suayay. Ä jíkkajaka kaachin an máchika tatahuay, të tü éaka ä jíjikkajay.
21 Taahuari yuumak, Herodesta huásuktiriam yúmariaka pajkoy. Kúptey am äbosek, huame áamak nésahueme, sontaro yäuram, entok Galiléapo chë nésahueme.
22 Huanäi Herodíasta jámut ásoa yïsimeka áman kibakek. Herodes éntok tüsä musäuleka taahuak, entok huame mesau áamak jokaïhuim. Huanäi jü rey hua ili jámuttau ínel jiaahua:
—Em huáatiähuë inou aahua; ínapone enchä máknake.
23 Entok ä nokäu bát kéchaka ä lútüriatebok, ínel jíaka:
—Sïmeta em inou aahuäune enchi máknake, reytaka ín nésahuëpo násuk áman junne.
24 Huanäi hua ili jámmut yeu sika ä áyebeu nátemajek:
—¿Jítasune áunake jäni?
Ä áyehua éntok ínel au jiaahua:
—Juka Juan Bautistata kóbba.
25 Áapo éntok sep áman kibakeka, jü reytau ínel jiaahua:
—Én läutine puraato bueürupo ä huáatia, juka Juan Bautistata kóbba.
26 Huanäi jü rey tüisi kaa al‑lëeak. Të juka ä nookakäu ä lútüriatebokä béchïbo, entok huame áamak mesau jokame tihueka, kara ëe ti au jíaka taahuak.
27 Huanäi sep sontarota Juanta kóba chúktiaka áu ä huéria sáuhuek.
28 Jü sontaro éntok áman sika jum ä páttiatukäpo ä kóba chúktiak. Huanäi juka kóbata jum puraatopo yéchaka, jü ili jámuttau ä tójjak; jü ili jámut éntok ä áyebehui.
29 Huanäi jume Juanta discíipulom ä jíkkajaka, áman sájaka ä takaahua nükä ä núk sájjak. Huanärim kókkolam mamähuäpo ä maäak.
Jesús mamni miilim jïbuätuak
(Mt. 14:13-21; Lc. 9:10-17; Jn. 6:1-14)
30 Jume apóstolim éntok júchi Jesústau nau yájjak. Huanärim ä ettejhuariak, sïmeta bem yáakähui entok bem am majtiakähui.
31 Áapo éntok ínel ámeu jiaahua:
—Emepolem ímin ínomak kaate ánia see päriahui; ámanïrem chúbala jimyorenake.
Bueïtuk juebénakam sákkay, entok juebénakam yájjay; junëlim kara júne ámey jïbuäy.
32 Huanärim jum canoapo sájjak ánia see päriahui, kaabeta anëhui.
33 Huä gente éntok am bitchak yeu am sájako, entokim am tátäyak. Huanäi juebénaka huate pueblom bétana guókimmea áman yájjak, ámepachi. Huanärim áu nau yájjak.
34 Jesús éntok canoapo kom chépteka huaka juebenarata bíchaka tüisam jiokoley, bueïtukim kabaram kaa kabyerokä bénasi áma aaney. Huämi juebenak am majtia táytek.
35 Béja tüisi kúptey éntok, jume ä discíipulom áu rúkteka ínel áu jiaahua:
—Ímï ánia see päria, entok béja kúpte.
36 Akë am sáka sáuhue; éläpom pueblommet entok ranchommet sájaka páanim emo jínnurianake, bueïtukim ímï kaita buä mátchi.
37 Huanäi Jesús ínel ámeu jiaahua:
—Akem am jïbuätua emëe.
Bempo éntok ínel au jiaahua:
—¿Jachute áman sájaka guoy cien denariom béjhuay páanim jínnuka am jïbuätuanake jäni?
38 Huanäi Jesús ínel ámeu jiaahua:
—¿Jaiki páanimsem jípure? Ámanem sájaka am bitcha.
Bempo éntok am bíchaka ä téjhuak:
—Mamni páanim entok guoy kútchum.
39 Huanäi sïmem básso síaripo am jote sáuhuek, nátepola,
40 cicientom náuhui entok cincucuentam náuhui.
41 Huanäi jume mamni páanim entok jume guoy kútchum nüka, téhuekau reemteka, Diosta tü éäu ámet chúpaka jume páanim rébektiak. Huanäi jume ä discíipulom am mákkak, am mik sáhueka. Jume guoy kúchum éntok sïmemmet näikimtebok.
42 Huanäi sïme jïbuäka jóboak.
43 Jume pan rérebeim entok jume kúchum buä bëterim dooce canajtam tátapunika áma tóboktiahuak.
44 Huame áma jïbuäkame éntok mamni mil oohuimtukay.
Jesús bäata béppa huerama
(Mt. 14:22-27; Jn. 6:16-21)
45 Chúkula Jesús jume ä discíipulom canoau am jämutuak, áapat huáytana pueblo Betsaidau am yaij ïaaka, áapörik huaka juebenarata am sákatuäu tájti.
46 Chúkula genteta sákatuaka, jum káhuiu bíchaa siika, Diostau oraciompo nok báreka.
47 Huanäi tukariu yúmay jü canoa bäa násukun aaney. Jesús éntok buíapo áapola aaney.
48 Béja bájim jiäpo matchü bíchaa, canoata buaatiaka lotteme bitchak, bueïtuk jü jeka am nankirika búitey. Huanäi ámeu siika, bäata béppa huéeka, áme huam sika ámepat yebij báreka.
49 Bempo éntok bäata béppa huémta bíchaka, akim ä jóusï téyey. Huanärim cháchayek,
50 entokim sïmetaka ä bíchaka sum éiyay. Të áapo sep ámeu nónookak, ínel jíaka:
—¡Óusem eiya, katem májhue, ínapone ájäria!
51 Huanäi canoapo ámeu ä jämuk, jü jeka yánti taahuak; bempo éntok naa muksi éakam át guómtilatukay.
52 Bueïtukim ketune kaa jüneiyay, jáchin jume páanim bürusi yáahuakähui, bem námakak jiápsekä béchïbo.
Jesús Genesaretpo kökoreme tütek
(Mt. 14:34-36)
53 Huáytana bíchaa sákasukam Genesaret buiärau yájaka, mayoahuim yeu yájjak.
54 Huanäi bempörim canoapo yeu sájak, jü gente Jesústa tátäyak.
55 Huanärim huämi buiärapo sïmekut naa tenneka, jume kökoreme au nau toij táytek, bem ámet töyemmak chíkti, huam jak Jesústa aneï tíäpo.
56 Bueïtuk jak júne ä kibakeïpo, jum pueblompo entok ranchompo, jume kökoreme böo mayoat yeu totoijhuay jiokot jíaka, kia ä sánko mayoammet jálojti péaka. Huanäi sïme huame át jálojtekame türiak.