37
Yusufu
1 Yakopi ahokhala ilapo yo Kanaa wonwo athumwane warwelyaya weettakaca.
2 Ila phi yookhumelela ya nloko na Yakopi.
Yusufu warinawe myakha khumi na saapa aahakhela inama na asunnawe. Anawaakavihera asaana a Pila na asaana a Silpa asaara athumwane ni anawaahimerya athumwane coonanara caapankaya asunnawe.
3 Vano, Israel aananfenta venci Yusufu woopwaha asaana akina ayo kontha ayareele athumwane anooluvanle, phimaana yahonttotthihera ihancu yoorekama.
4 Ni wacuwenlyaya asunnawe wiira phinfentiya venci na athumwane woopwaha mwana phi mwana, yahonramaca ni khayamulumana wo nnema.
5 Vano aaholoha Yusufu nttora ni wahimenryawe asunnawe ale yahanca onrama wootepa.
6 Ni aheerela: Nviriyane nttora olohilyaka:
7 Natthukaca ihayi co tiriku omattani. Vano ihayi aka yahonwa ni weemela ni ihayi cinyu nnyo cahorukurerya ni wooromela ihayi aka.
8 Ni asunnawe yahomwiirelaca: Vano, weva onoona wiira unaahala unilamula? Ni yahonrama tho woopwaha nlattu wo nttora ni itthu yahimilyawe.
9 Wahoolo aaholoha tho nttora ni wahimerya asunnawe eeraka: Kiholoha tho nttora nkina. Ila ikwaha ila ncuwa, mweri ni itthoottwa khumi ni imoca cahokikhoromela.
10 Wahimenryawe athumwane na asunnawe, athumwane ayo yahoncaceraca yiiraka: Nttorani yooyo olohilyaa uyo? Maanaya wiira mi, anumwana na asunnaa ninwoworomela weva mpaka vathi?
11 Phimaana asunnawe othene Yanaanramaca. Nanso athumwane yeera yuupuwelaka itthu iyo.
Yusufu nathumihiya na asunnawe
12 Asunnawe Yusufu yahorwaa uhakhela inama ca athumwanaya vakhiviru nuuSikeni,
13 ni Isirayeli ahomwiirela Yusufu: Toko cincuwelaa asunnaa anhakela inama vakhiviru ni nuuSikeni. Kimphela wuruma urwee wonwo. Yusufu ahaakhula eeraka: Aye. Kiheewa.
14 Athumwane yahomwiirela: Urwee wonwo woone unari ukhaliyaka ratta, ukhuma asunnaa ni inama ciyo ni ukiwiihere ihapari. Yakopi anrumile nari nikuwa no Heporoni, ni Yusufu ahophiya uSikeni.
15 Vano nlopwana mmoca ahomphwanya akomankomacaka muthakoni ni ahonkoha eeraka: We, unaavyani?
16 Yusufu ahaakhula: Kinaavya asunnaka. Nkihimerye nipuro ninhakhelaya inama nnyo.
17 Nlopwana ule ahaakhula: Ayo ahokhumaca va. Mi kiheewa yiiracaka nrwee uTotaani.
Vano Yusufu ahaatthara asunnawe. Ni ahaaphwanya anari vakhiviru ni uTotaani.
18 Nanso ale yahomoonaca nttayi nttayi, ni hinaphiya Yusufu, yahovanela umwiiva.
19 Ni yahohimeryana yiiraka: Hophiya nanttora uyo.
20 Vano nrwee nimwiive nunrihela nluusi, ni neereke hokhuriya ni nsene noone vano cinhalaya wiira ittora cawe nnyo.
21 Vano, wiiwa wawe Rupeni ahomananiha umwaakiha eeraka: Nihimwiive!
22 Ni aheera tho: Nhivuvihe iphome. Munrihele nluusi iri muthakoni mu, yooyo uyo nhinvaravare. Rupeni olumacenre coommo aavyaka mananna omwaakiha ni wiira anturusele wathumwane.
23 Uphiya wawe Yusufu, asunnawe yahonrulaca ihancu awe, yoorekama eyo,
24 nunvaraca nunrihela nluusi moohimasi.
25 Wookomacilyaya wiira alye yahoona nttayi nttayi mphwinko wa Annasumayili wakhuma uKiliyati. Ikamelo caya capakhinre ikaruma coonukhela, makhura o nrette ni makhura oonukhela caarwanaya Wiciipitu.
26 Yutta aheerela asunnawe: Ninhala uphwanyani namwiivaka nhimeehu uyo, nimaalanaka ukhwa wawe nwo.
27 Nrwee naathumihere Annasumayili. Nihinhasare ula nhimeehu iphula ni niitho. Ni asunnawe Yutta yahokupali.
28 Wattamenryaya anamarontta Annasumayili o Mitiyani, asunnawe Yusufu yahonkumiha Yusufu nluusi ni yahathumihera Annasumayili ni ncurukhu siriini nunkusa Wiciipitu.
29 Rupeni warwelyawe unweha nluusi mmo, khaamphwanyile. Woona wawe wiira Yusufu khaawo ahaahula coowara cawe,
30 aturuwelaka waasunnawe ni aheera: Mmirawo uyo mmwe khaawo! Kinhala wiira cani?
31 Vano yahomwiivaca napinkula nuruwyaa mphomeni ihancu ya Yusufu.
32 Ni yahorwaca waathonyera athumwanaya yiiracaka: Nihottotta ihancu ila kahiki khinakhala ihancu ya mwaninyu Yusufu?
33 Ni Yakopi ahoona wiira phi yeeyo ni aheera: Ila ihancu ila ya mwanaka! Nsene nihonhasara. Yusufu hokhuriya!
34 Vano Yakopi ahaahula coowara cawe nuwara icakho ni ahomunlela mwanawe mahuku menci.
35 Asaanawe othene, asilopwana na asithiyana yanawa ummaaliha, nanso aanakhotta umaalihiya nwo eeraka: Mena! Kinaahala wunla mpaka mmahiye nryawe mwanaka. Ni ahopwaherera umunlela.
36 Yooyo ukati uyo uWiciipitu, Annamitiyani yahontumiha Yusufu waPutifari, nhooleli a mayoorontta inupa ya Farawoo, mwene o Wiciipitu.