44
Yusufu nawalawiha asunnawe
1 Yusufu ahonvaha nhooleli owapuwani wawe, nna nlamulo nna: Ncarihe mmirinttini mwaya ala atthu ala yoolya yo khula nkwaratati mpaka cinhalaya woorya ukusa ni nhele ipheeta iwannyawe khula ntthu omalakuni womirinttini cawe.
2 Wahoolo nhele ikoomisi aka, yopheeta, munrinttini mwa mwana eetthyako uyo, ni wamoca ni ipheeta inthumenlyawe tiriku. Ni uyo ahopanka cothene toko cahimeriyawe ni Yusufu.
3 Wasilyaya, yaholehaca atthu ale ni inama caya.
4 Yaari ahinayaca upwaha iparasa eyo, phu ukati Yusufu wamwiirenlyawe nhooleli owapuwani wawe: Wunwe ni watthimakele atthu ale ni waaphwanyaka weerele: Nnakakhaniherani itthu yooreera ni yoonanara.
5 Khinakhala ila ikoomisi immureryawe nkunya aka ni immwaserera awe ihako? Nyu nhopanka yoonanara.
6 Waaphwanyilyawe ahaakuleliha ala moolumo ala.
7 Nanso ayo yahomwiirelaca: Nlattuni nkunya wuulumacaka commo? Uttayi ni yeeyo itthu iyo mpankaca arumeyaa.
8 Wooneke nsurukhu ula, uphwanyileehu umalakuni wo mirupa cihu, nihooturuselani nikhumaka ilapo yo uKanaa, naahala winnyacerani inupa ya nkunyaa ipheeta ni iwooru.
9 Akhalaka wiira mmoca wa arumeyi aa naphwanyaninya, eeviye, ni hi akina va ninakhala ipottha ca nkunya ehu.
10 Uyo aheera: Kihokupali. Yooyo nohala uphwanyaninya uyo, phinhala ukhala ipottha aka, akina ayo anawoopwaa.
11 Khula ntthu ahokurusa mirintti cawe wowakuvyaa ni wanca utaphula.
12 Nhooleli uyo ahanca uphavelaca wo khula nrintti, apaceraka wa muulupale mpaka umalihera wa mwana eethyako uyo. Ni ikoomisi iyo yahophwanyinya munnrinttini wa Pencamii.
13 Wakhumelenlyaya commo, ayo yahaahulaca coowara caya. Wahoolo, othene yahopakhiraca mirintti caya nuuturuwela arwaaka uparasa.
14 Yutta na asunnawe waphiyacilyaya inupa ya Yusufu, ni ule ari wonwo. Vano ale yahoromaca wamiithoni waawe ula, mpaka uphiya vathi.
15 Yusufu ahaakohaca: Ikipankacilenyu iyo isiyani? Nyu khannocuwelaca wiira ntthu toko mi kinawoorya uwasera ihako?
16 Vano Yutta aheera: Ninhala uwaakhulani nkunya? Ninhala uhimyani? Ninhala upanka cani mwaavi wiira niphwanye isariya? Nluku hokumihera wonene unyali ihu. Nkunya hi nna va ipottha caa. Wamoca ni uyo phwanyaninye ikoomisi iyo.
17 Vano aheera Yusufu: Akimpanka mi commo. Yooyo ntthu mphwanyaninye ikoomisi iyo phinhala ukhala ipottha aka. Wiireke nyu akina vaa, nturuweleke ni nnema waathumwaninyu.
18 Vano Yutta ahonciserera yoole, ni aheera: Sontte nkunya ukihiye, kinawulepela, kihaana nuulumo noophela wuulumaca wamiithoni waa, nkunnya aka, ni nhikiviruwele, kontha nyu nri toko Farawoo.
19 Nkunya aka uhaakoha arumeyi aa wiiraka: Nhaanaca athumwaninyu atthuna nhimenyu?
20 Hi nihoohimyacera nkunya niiraka: Nihaana athumwanihu owuuluvala ni mmirawo mmoca nnyanryaya anooluvanle, nhimehu. Ahaawo munnaawe yooyo ooyaraninya nrukulu nimoca hookhwa. Anumwane ayo anhalanne yooyo, ni athumwane ananfenta venci.
21 Vano we nkunya uhonireela: Nkiwiihere komoone mmiithoni mwaka.
22 Ni hi nihowiirela: Nkunya, mmirawo uyo khanhala waahiya athumwane, kontha arimelaru uyo apapeehu anaakhwa.
23 Vano nyu nheerela karumeya enyu: Mwahinmwanaceke mwanhimenyu uyo, khannohala woonaca ikhove aka.
24 Weeraka coo: Hi karumeya aa, nihorwaa waathumwanihu nihattonkela moolumo yoolumacilyaa nkunya.
25 Athumwanihu wanirenlyaya tho wiira nturuwele mwathume yoolya.
26 Hi niheerela: Khanintthuna urwaa nwo veekhehu. Ninhala uturuwela tho nwo mwanhimehu eetthyako uyo nanrwaanaka, kontha khaninkela namoonaka nkunya uyo ikhove awe mwanhimehu ahirweke ni hi.
27 Vano honirela karumeya aa, athumwanihu, coo: Nyu nhocuwelaca wiira amwaaraka yayanre asaana eeli.
28 Mmoco uyo heetta ni mi kiinre, khweeli yooyo hokhuriya, ni akimmoona tho mpaka nna.
29 Vano mwankusaka ula waamiithoni waka, ni imwiirannyaka itthu phi itthu iyo, nnaahala uvitha irutthu aka mmahiye ni icuku.
30 Nna va mi karwaka waathumwanihu, karumeya aa, woohinrwana mmirawo uyo, athumwanihu cinryaaya wonvarecesa.
31 Anaahala ukhwa ucukula yakela yanoonaka uturuwa veekha wohi mmirawo ula. Ni hi ninaahala wavitha apaapehu ayo ni masukuli.
32 Phimaana mi kiceemesaka wamiithoni waa unsunka mmirawo uyo ni kiheerela: Aahituruwele tho uno ikikhalele mi ikhirini iyo mahuku othene.
33 Vano nna mi kikhale ipottha ya nkunya aka nipuro nahalawe ukhala mmirawo uyo. Vano uyo arweeke uwaani na asunnawe ayo.
34 Kinkohimya isiyani mi karwaka waathumwane wohinkusa mmirawo uyo? Akintthuna woona mi yoonanara inhala wakhuma apaapa ayo.