5
Ucuulu wa Atamu mpaka Nowee.
1 Ila phi iliivuru yomayaranacelo o nloko na Atamu. Ukati Nluku waampankilyawe ntthu, eelattanihaka mwaneene,
2 ahaapanka nlopwana ni nthiyana. Ukati waapankilyawe, uyo ahaareeriha ni aheehana atthu.
3 Wapihenryawe Atamu myakha iminya nuuwa talaathini (130) ahonnyara mwana mmoca oolikana nuuyo ni oonlatta venci, ni ahonvaha ncina na Seeti.
4 Nannyanreene Seeti, Atamu ahokhala nkumi myakha iminya naane (800) ni ahaayara asaana akina asilopwana na asithiyana.
5 Mahuku othene ookumi awe Atamu yahophiyera myakha iminya khentta nuuwa talaathini (930) ni ahokhwa.
6 Seeti waapihenre awe myakha iminya nuuwa mithanu (105), ahonnyara Enosi.
7 Seeti nannyanreene Enosi ahokhala nkumi myakha iminya naane nuuwa saapa (807) ni ahaayara tho asaana akina asilopwana na asithiyana.
8 Mahuku othene ookumi awe, yaari myakha iminya khentta nuuwa khumi na miili (912) ni ahokhwa.
9 Wapihenryawe Enosi myakha miloko khentta (90) ahonnyara Kenani.
10 Enosi nannyanreene Kenani, ahokhala nkumi mpaka myakha iminya naane nuuwa khumi na mithanu (815) ni ahaayara asaana akina asilopwana na asithiyana.
11 Mahuku othene ookumi awe, yaari myakha iminya khentta nuuwa mithanu (905) ni ahokhwa.
12 Waapihenryawe Kenani myakha sapini (70) ahonnyara Malaleli.
13 Kenani nannyanreene Malaleli, ahokhala nkumi mpaka myakha iminya naane nuuwa arupayini (840) ni ahaayara asaana asilopwana na asithiyana.
14 Mahuku othene ookumi awe, yaari myakha iminya khentta nuuwa khumi (910) ni ahokhwa.
15 Wapihenryawe Malaleli myakha sitiini nuuwa mithanu (65) ahonnyara Yereti.
16 Nanyanreene Yereti Malaleli, ahokhala nkumi mpaka myakha iminya naane nuuwa talathini (830) ni ahaayara asaana asilopwana na asithiyana.
17 Mahuku othene okumi awe, yaari myakha iminya naane nuuwa miloko khentta na mithanu (895) ni ahokhwa.
18 Wapihenryawe Yereti myakha iminya wo sitiini na miili (162) ahonnyara Enoki.
19 Nannyanreene Enoki Yereti ahokhala nkumi mpaka myakha iminya naane 800 ni ahaayara asaana asilopwana na asithiyana.
20 Mahuku othene ookumi awe, yaari myakha iminya khentta nuuwa sitiini na miili (962) ni ahokhwa.
21 Wapihenryawe Enoki myakha sitiini na mithanu (65) ahonnyara Metusalemu.
22 Nannyanreene Metusalemu, Enoki aheetta ni Nluku myakha iminya ttharu (300) ni ahaayara asaana asilopwana na asithiyana.
23 Mahuku othene ookumi awe, yaari myakha iminya tthaaru wo sitiini nuuwa mithanu (365).
24 Enoki aheetta ni Nluku, ni ahorimyarimya kontha Nluku ahonkusa.
25 Wapihenryawe Metusamemu myakha iminya nuuwa miloko khentta na saapa (187) ahonnyara Lameke.
26 Nannyanreene Metusalemu Lameke ahokhala nkumi mpaka, myakha iminya saapa nuuwa miloko khentta na miili (782) ni ahaayara asaana asilopwana na asithiyana.
27 Mahuku othene okumi awe, yaari myakha iminya khentta wo sitiini nuuwa naane (969) ni ahokhwa.
28 Wapihenryawe Lameke myakha iminya nuuwa miloko khentta na miili (192), ahonnyara mwana mmoca.
29 Ahonvaha ncina na Nowee ni aheera: Ula naahala uniwukula miteko cihu ni uhuva wo mmatatani mwihu ommwaaninya ni itthaya ilaphiye ni Mwaneene Nluku.
30 Nannyanreene Lameke, Nowee ahokhala nkumi mpaka myakha iminya thanu nimiloko khentta nuuwa mithanu (595) ni ahaayara asaana akina asilopwana na asithiyana.
31 Mahuku othene ookumi awe, yaari myakha iminya saapa ni miloko saapa nuuwa saapa (777) ni ahokhwa.
32 Wapihenryawe Nowee myakha iminya thanu (500) ahaayara tho asaana akina yeehaninnya: Seemu, Kani ni Yafeti.