O̠pu̠r A̠d̠ire Wa̠ Apo̠l Age̠ Agi̠o̠m Bho̠
A̠nwunom Ate̠salonia̠
Bho̠
Otighom
Apo̠l a̠mutiom aso̠si̠ bho̠ d̠a̠ A̠te̠saloni̠ka̠ d̠a̠ obhel bha̠ i̠na od̠i d̠a̠ wa̠leghemeni i̠wal e̠gi̠ o̠gba Ib̠eb̠i Asu̠gbagba ta̠ A̠zib̠a̠ bho̠. I̠na age̠ ma̠ a̠duom onon d̠a̠ okperekper obhel ma̠ o̠ghu̠ame̠ni̠ ikubh ogbo ya̠ na̠ ema̠ra̠ ma̠ Akrai̠st ya̠ od̠i ma̠ i̠se̠ bho̠. Umutiom aso̠si̠ bho̠ d̠a̠ a̠bin i̠wal bo̠d̠o̠ i̠sar ala kisa̠ u̠ge̠ ma̠ a̠duom onon.
A̠sora̠n a̠nwunom Ate̠saloni̠ka̠ ya̠ na̠ ema̠ra̠ ma̠ Akrai̠st bho̠ ma̠ o̠ghu̠a d̠a̠ ologi imara d̠awa. D̠a̠ o̠lo̠gho̠m i̠se̠, bha̠ awa i̠mar d̠o̠ ma̠ o̠mu̠gho̠nyan wa̠leghemeni i̠wal eruoma̠ ta̠ Akrai̠st. Idi awa i̠ru̠ru̠an ma̠a̠ Akrai̠st ta̠ a̠mula̠ a̠ru ma̠ onyen, d̠a̠ ebula̠ o̠ku̠a sa̠ awa na̠ e̠su̠su̠ghu̠d̠i̠an d̠a̠ obhel ola̠ a̠nwunom ya̠ ilei abar d̠a̠ a̠ruzu d̠awa imugh, ezin bho̠ awa i̠ru̠ru̠an ma̠a̠ Akrai̠st ta̠ a̠mula̠ a̠ru ma̠ egbo.
I̠yar uma̠ra̠ ma̠ A̠zizo̠s Akrai̠st a̠mugh, sa̠ a̠puta̠ a̠b̠etina̠. D̠a̠ ebula̠ o̠ku̠a, i̠yar uma̠ra̠ ma̠a̠ A̠zib̠a̠ ta̠ a̠bhin ogbo ya̠ na̠ emel ekod̠u d̠a̠ A̠zizo̠s a̠ru d̠o̠yo̠ 4:14. Obha̠ onin agu̠o̠ ta̠ aro̠ a̠nigha̠ ma̠ ogbo ya̠ ima̠ra̠ sa̠ egbika̠ na̠ a̠ponoma̠ bho̠.
Apo̠l age̠ ma̠ a̠duom onon ma̠ oleriom etula̠n d̠o̠yo̠, na̠ o̠se̠bh awa d̠a̠ ima̠ra̠ ologi d̠awa d̠a̠ obhel ola̠ egbika̠ a̠ponoma̠ awa, na̠ onimeta̠n awa ma̠ ya̠ igboloma̠ ma̠ eb̠em ologi d̠awa d̠a̠ omula̠ oru ta̠ Wa̠nwuna̠ na̠ Witenemeni d̠awa.
Aru̠mu̠ i̠di̠ar ya̠ u̠ge̠ bho̠
Apo̠l a̠bhin d̠a̠ ekud̠um ologi d̠o̠yo̠ ase̠bh a̠nwunom Ate̠saloni̠ka (1:1-10)
O̠nu̠o̠kpe̠ ta̠ Apo̠l na̠ agu̠o̠ (2:1-16)
O̠gba i̠di̠ar omutiom ka̠ obhel i̠na ad̠u̠a d̠a̠ Atesaloni̠ka (2:17—3:13)
Etu̠o̠ma na̠ o̠kpe̠re̠ni̠ agu̠o̠ orugh a̠ghud̠um ta̠ A̠zib̠a̠ (4:1-12)
Eruoma̠ ta̠ Akrai̠st (4:13—5:11)
Ekunuguma̠ a̠kikiom bho̠ (5:12-28)
1
1 Ami̠ Apo̠l na̠ Asai̠las na̠ A̠timoti, na̠ o̠ge̠ na̠ oruom inyin ogbo ya̠ na̠ e̠gi̠ ma̠ aso̠si̠ d̠a̠ Ate̠saloni̠ka bho̠, ya̠ i̠ro̠ ma̠ a̠nwunom ta̠ A̠zib̠a̠ O̠we̠de̠ bho̠ na̠ Wa̠nwuna̠ A̠zizo̠s Akrai̠st ma̠a̠: “E̠no̠gho̠man na̠ ekima̠ e̠ro̠ na̠ inyin.”
A̠ma̠rugh na̠ Ologi Ima̠ra̠ A̠nwunom Ate̠saloni̠ka
2 I̠yar na̠ o̠se̠bh A̠zib̠a̠ na̠ ogboloma̠ inyin kigiel kigiel, sa̠ i̠yar na̠ osenegi inyin d̠a̠ ra̠siseiny d̠i̠yar.
3 I̠yar na̠ o̠ru̠ru̠an na̠ ogboloma̠ inyin d̠a̠ a̠siseiny, ma̠ agu̠o̠ inyin na̠ obhin ologi ima̠ra̠ na̠ ogir ogir bho̠, na̠ agu̠o̠ etula̠n d̠inyin na̠ a̠nu inyin ogir ogir bho̠, na̠ agu̠o̠ inyin na̠ o̠kparame̠ni̠ ma̠ eb̠em ologi d̠inyin d̠a̠ Wa̠nwuna̠ i̠yar A̠zizo̠s Akrai̠st bho̠.
4 A̠rumor na̠ aru̠marani̠ ed̠ighologi d̠i̠yar ya̠ ima̠ra̠ ma̠ A̠zib̠a̠ bho̠, i̠yar ologhom ma̠a̠ A̠zib̠a̠ a̠tula̠n inyin, sa̠ aso̠n inyin o̠ro̠ a̠nwunom d̠o̠yo̠.
5 Ezin bho̠, i̠yar ubhin d̠o̠ ma̠ Ib̠eb̠i Asu̠gbagba bho̠ d̠a̠ o̠nu̠ ku̠ku̠m oruom inyin, ya̠a̠ u̠b̠aram na̠ a̠limon na̠ E̠mu̠gh E̠tu̠tu̠ bho̠ na̠ a̠ga̠i amu̠gho̠nyan. Inyin ologhom ado̠l d̠i̠yar igiel bho̠ i̠yar u̠ro̠ na̠ inyin bho̠, na̠ o̠lo̠gh agu̠o̠ d̠i̠yar d̠a̠ ebula̠ inyin.
6 Sa̠ inyin u̠ta ma̠ od̠ighi i̠di̠ar d̠i̠yar na̠ ita̠ Wa̠nwuna̠, ma̠ ola̠ d̠a̠ esa̠d̠io ibom ali̠gam a̠ruzu eka̠, bha̠ inyin u̠da ma̠ asu̠gbagba bho̠ obhin na̠ a̠libhon ologi wa̠ na̠ ad̠u̠a d̠a̠ E̠mu̠gh E̠tu̠tu̠ bho̠ na̠ a̠ru bho̠.
7 Ebula̠ o̠ku̠a, inyin na̠ oten a̠nwunom ya̠ ogbo ya̠ na̠ ema̠ra̠ ma̠ asu̠gbagba bho̠ d̠a̠ Ame̠sidonia̠ na̠ Akai̠ya ta̠ e̠ta ma̠ ado̠l bho̠ erugh.
8 Ebula̠ inyin, o̠nu̠o̠kpe̠ ta̠ A̠zib̠a̠ na̠ o̠sasaragi̠an d̠o̠ d̠a̠ Ame̠sidonia̠ na̠ Akai̠ya ku̠ku̠m, ya̠a̠ na̠ o̠mu̠gho̠n o̠du̠ ologi ima̠ra̠ d̠inyin a̠d̠izo a̠risisi. O̠ku̠a a̠d̠ighi be̠le̠ni̠, i̠yar unwuna̠ d̠o̠ ma̠ abar ola̠ omula̠ ofugh.
9 Ezin bho̠, a̠nwunom i̠ye̠ na̠ agu̠o̠ na̠ e̠gba ma̠ agu̠o̠ inyin u̠da i̠yar ubhin, na̠ agu̠o̠ inyin utiba̠ra̠ d̠a̠ o̠ko̠l ro̠ye̠bo̠ iru na̠ o̠ko̠l a̠ga̠i A̠zib̠a̠ wa̠ od̠i d̠a̠ a̠ghud̠um bho̠,
10 na̠ ogon O̠nyi̠ d̠o̠yo̠ ma̠ o̠d̠u̠a d̠a̠ ote̠nai̠ny oru, O̠nyi̠ d̠o̠yo̠ A̠zizo̠s wa̠ i̠na a̠b̠eton d̠a̠ omugh bho̠, wa̠ a̠tenemeni i̠yar d̠a̠ ibom i̠gam ta̠ A̠zib̠a̠ wa̠ na̠ a̠ru bho̠.