Iburu
Otighom
O̠ni̠ wa̠ age̠ ma̠ A̠d̠ire a̠lebh onon na̠ omutiom d̠o̠ ma̠ ozu d̠o̠yo̠, ya̠a̠ i̠pu̠r a̠nwunom ya̠ i̠na age̠ agi̠o̠m bho̠ e̠mar eloghom i̠na. A̠lebh onon bha̠ u̠ge̠ u̠gi̠om ogbo ibha̠ra̠nom ta̠ Akrai̠st, a̠nwunom A̠zu ya̠ na̠ e̠to̠ ma̠ omula̠ o̠gi̠ d̠a̠ igba̠iny i̠ko̠lo̠gi̠ ogbo A̠zu bho̠. Ka̠din, ebula̠ agu̠o̠ bho̠ awa ta̠ o̠ghu̠a d̠o̠ d̠a̠ amu̠gho̠nyan a̠gia̠ga̠i A̠d̠ire E̠tu̠tu̠ bho̠. Ebula̠ o̠ku̠a, a̠lebh onon a̠nwuna̠ nyen i̠kparakpar ibom a̠b̠utu a̠kikiom ya̠ igboloma̠ ma̠ omel o̠d̠u̠a (o̠we̠le̠man obha̠ra̠nom Akrai̠st o̠gi̠ d̠a̠ oloko ta̠ A̠mozizi). U̠ge̠ unigha̠ nyen ogbo ya̠ na̠ ebha̠ra̠nom Akrai̠st. Ibha̠ra̠nom ma̠ A̠krai̠st ogbo A̠zu i̠nye̠n bho̠, kokpona̠ d̠o̠ na̠ e̠te̠i̠ i̠kparakpar ali̠gam a̠ruzu d̠a̠ esa̠d̠io a̠nwunom, sekina̠ d̠a̠ ozu d̠a̠ agu̠o̠ a̠nwunom A̠zu, na̠ a̠nwunom A̠rom. Akrai̠st ta̠ omula̠ d̠a̠ a̠ru ra̠ a̠soroni ma̠ irileghom d̠o̠yo̠, sa̠ a̠sora̠n od̠ighi agu̠o̠ ola̠ a̠nwunom bho̠ ta̠ eloghom ma̠a̠ obha̠ra̠nom Akrai̠st ma̠a̠ ya̠ga̠i, sa̠ A̠zizo̠s aro̠ ma̠ Witenemeni bho̠ na̠ agu̠o̠. A̠d̠ire a̠lebh onon na̠ a̠leriom ma̠a̠ obha̠ra̠nom A̠krai̠st a̠bhon a̠pu ma̠ igba̠iny i̠ko̠lo̠gi̠ ogbo A̠zu. D̠a̠ kere kere e̠kal, bha̠ na̠ oleriom ma̠a̠ Akrai̠st a̠bhon a̠pu. A̠zizo̠s Akrai̠st na̠ akpo̠ ma̠ e̠la omom i̠zo̠ bho̠, wa̠ a̠bhon a̠pu ma̠ ugba̠i̠ny i̠zo̠ wa̠ ogbo A̠zu bho̠. Agu̠o̠ A̠zib̠a̠ od̠i bho̠, bha̠ i̠na a̠pu ma̠ itileduom ta̠ A̠zib̠a̠, na̠ A̠mozizi, sekina̠ rokur Ugba̠iny I̠zo̠ bho̠. D̠a̠ ebula̠ o̠ku̠a, sa̠ i̠na a̠rue ma̠ olelegi i̠di̠ar ya̠ o̠nyi̠o̠mo̠ro̠ni̠ na̠ adamaghan bho̠, na̠ o̠kparame̠ni̠ ogbo id̠umom ta̠ Akrai̠st, ma̠ obha̠ra̠nom ibom a̠b̠utu releleguma̠ ra̠ anwani̠ na̠ ilobhiri ya̠ id̠umom ologi d̠a̠ obhel ola̠ na̠ a̠ten, ya̠ isibhom id̠umom ologi d̠awa d̠a̠ esa̠d̠io ali̠gam a̠ruzu.
Aru̠mu̠ i̠di̠ar ya̠ u̠ge̠ bho̠
Agu̠o̠ Akrai̠st abu̠gh a̠pu bho̠ 4:1-16 Ib̠eb̠i a̠ghud̠um ogbo id̠umom ta̠ Akrai̠st (1:1—3:19)
Agu̠o̠ Akrai̠st abu̠gh a̠pu bho̠ (4:1-16)
Ib̠eb̠i a̠ghud̠um ogbo id̠umom ta̠ Akrai̠st (5:1—8:13)
Ogir okur ta̠ Akrai̠st wa̠ a̠peleni bho̠ (9:1—10:39)
I̠zo̠ wa̠ a̠bhon a̠pu bho̠ (11:1-40)
Ibom id̠umom ta̠ A̠zib̠a ya̠ od̠ud̠ul (12:1—13:19)
Ra̠kikiom ogbo id̠umom Akrai̠st ta̠ esibh ogir (13:20-25)
Ikpo a̠fugh ya̠ obhin okunigiom
1
1 D̠a̠ obhel ola̠ na̠ a̠ten, A̠zib̠a̠ awo̠l d̠a̠ aru̠nu̠ a̠riwil bho̠ agba ma̠ a̠d̠izo i̠di̠ar a̠nigha̠ ma̠ ibom ro̠we̠de̠ d̠i̠yar ma̠ a̠d̠izo igiel,
2 ya̠a̠ i̠se̠n d̠a̠ ra̠d̠a̠ma̠ ekunuguma̠ i̠nye̠n, i̠na na̠ a̠bhin O̠nyi̠ d̠o̠yo̠ na̠ agba ma̠ i̠di̠ar na̠ a̠nigha̠ i̠yar. A̠zib̠a̠ awo̠l d̠a̠ o̠nu̠ O̠nyi̠ d̠o̠yo̠, wa̠ i̠na a̠b̠eton eb̠la̠ i̠di̠ar a̠nigha̠ bho̠, ale̠m eb̠la̠ i̠di̠ar d̠a̠ a̠de na̠ e̠nai̠ny.
3 O̠nyi̠ bho̠ na̠ a̠mutioghom e̠b̠alab̠al isosorogia̠n ta̠ A̠zib̠a̠ na̠ o̠le̠m d̠o̠yo̠, sa̠ na̠ a̠bhin ibom a̠limon o̠nu̠ o̠kpe̠ d̠o̠yo̠ na̠ a̠sibh eb̠la̠ i̠di̠ar ya̠ od̠i d̠a̠ e̠ma ra̠ a̠nwunom bho̠ na̠ a̠guri. Igiel bho̠ i̠na na̠ ab̠ab̠alame̠ni̠ i̠yar d̠a̠ i̠karabh bho̠, sa̠ i̠na agi̠ ka̠ aro̠ ma̠ a̠dila̠de d̠a̠ od̠iom agu̠o̠ ta̠ A̠zib̠a̠ wa̠ a̠nwuna̠ ma̠ a̠limon a̠pu bho̠.
4 O̠nyi̠ bho̠ abu̠gh a̠pu ma̠ itileduom ta̠ A̠zib̠a̠, ma̠ agu̠o̠ a̠d̠ien wa̠ A̠zib̠a̠ a̠ghol i̠na bho̠ a̠lei abar a̠pu ma̠ ita̠ awa bho̠.
5 D̠a̠ itileduom ta̠ A̠zib̠a̠ bho̠, ka̠ oken wa̠ I̠na a̠fugh a̠nigha̠ ma̠a̠: “Anwa O̠nyi̠ d̠ami̠; anwa na̠ a̠ten O̠nyi̠ d̠ami̠ ma̠ a̠didon.” Bo̠d̠o̠ sa̠ a̠fugh ma̠a̠, “Ami̠ ta̠ aro̠ ma̠ O̠we̠de̠ d̠o̠yo̠, sa̠ i̠na ta̠ a̠ten O̠nyi̠ d̠ami̠”?
6 Ya̠a̠, igiel bho̠ A̠zib̠a̠ a̠bhin o̠kpana o̠nyi̠ d̠o̠yo̠ a̠ru d̠a̠ e̠ma ra̠ a̠nwunom bho̠, sa̠ agba ma̠a̠, “Eb̠la̠ itileduom ta̠ A̠zib̠a̠ e̠ko̠l i̠na.”
7 I̠na agba a̠gboloma̠ ma̠ itileduom ta̠ A̠zib̠a̠ bho̠ ma̠a̠, “I̠na na̠ a̠tenemeni awa ma̠ itileduom d̠o̠yo̠ ma̠ aru̠mu̠gh, sa̠ rob̠a̠ra̠motu d̠o̠yo̠ i̠ro̠ ma̠ re̠ba anya.”
8 Ya̠a̠, d̠a̠ O̠nyi̠ bho̠ sa̠ I̠na agba ma̠a̠, “E A̠zib̠a̠, a̠dila̠de irileghom d̠oyom ta̠ ad̠u̠a ma̠ id̠ud̠ul a̠ten id̠ud̠ul, sa̠ anwa ta̠ a̠rileghom a̠nwunom d̠oyom d̠a̠ igielake̠.
9 Anwa a̠ba̠ra̠ ma̠ e̠b̠ab̠ala sa̠ i̠karabh na̠ eghir anwa ma̠ ologi. Ebula̠ o̠ku̠a, sa̠ A̠zib̠a̠ wa̠ aro̠ ma̠ A̠zib̠a̠ d̠oyom bho̠, aso̠n anwa a̠doni, a̠nigha̠ ma̠ a̠libhon ologi ya̠ id̠igh edim ipu ma̠ ita̠ ipa̠n ogbo.”
10 I̠na ab̠aram agba a̠nigha̠ ma̠ O̠nyi̠ bho̠ ma̠a̠, “Anwa, Wa̠nwuna̠ bho̠, i̠le̠m a̠de bho̠ d̠a̠ o̠pu̠r ob̠eton bho̠, sa̠ ro̠b̠u̠ghu̠b̠u̠gh bho̠ i̠ro̠ ma̠ ogir a̠limon d̠oyom.
11 Awa ta̠ ekun, ya̠a̠ anwa ta̠ aro̠ kid̠ud̠ul. Awa ta̠ e̠ghu̠r eten igba̠iny ka̠ a̠rukpe ibura̠.
12 Anwa ta̠ a̠kporokpor awa ma̠ agu̠o̠ akapa, sa̠ ta̠ obhin awa onwegina̠ ka̠ a̠rukpe ibura̠ nyen. Ya̠a̠, anwa ta̠ aro̠ ma̠ onin agu̠o̠ bho̠, sa̠ ekunuguma ko o̠ro̠ d̠o̠ d̠a̠ rala d̠oyom.
13 Orileduom ta̠ A̠zib̠a̠ aro̠ nyen ke̠re̠, ma̠ ola̠ i̠na agba a̠nigha̠ ma̠a̠, “Ro̠ ma̠ a̠dila̠de d̠a̠ od̠iom agu̠o̠ d̠ami̠ tu̠tu̠n ami̠ ta̠ a̠tenemeni ma̠ ogbo o̠lo̠gi̠an a̠d̠ien d̠oyom okpokpolom o̠gbam a̠sike d̠inyin.”
14 O̠ku̠a ka̠ itileduom ta̠ A̠zib̠a̠ ka̠ ogbo ya̠ i̠ro̠ eka̠? Awa aru̠mu̠gh, sa̠ i̠ro̠ ma̠ rob̠a̠ra̠motu ya̠ na̠ egir na̠ enigha̠ ma̠ ogbo ya̠ ta̠ e̠te̠i̠ itenemeni bho̠.