A̠d̠ire Ta̠
A̠zemsi̠
Otighom
O̠ni̠ wa̠ age̠ ma̠ a̠d̠ire onon bho̠ bha̠ A̠zemsi, umor onin onweni ta̠ A̠zizo̠s na̠ odi o̠ni̠ irileghom d̠a̠ Aso̠si̠ wa̠ d̠a̠ A̠zeruse̠le̠m bho̠. I̠na age̠ agi̠o̠m i̠pu̠r ogbo A̠zu ya̠ ima̠ra̠ ma̠ Akrai̠st ya̠ na̠ e̠ro̠ d̠a̠ re̠ma ya̠ o̠ro̠ d̠o̠ ma̠ A̠zu bho̠, sekina̠ ogbo ya̠ na̠ ema̠ra̠ ma̠ Akrai̠st kesikesi bho̠. Ezin a̠d̠ire onon, bha̠ oselegi ima̠ra̠ igunugha̠, ma̠a̠ o̠ni̠ ta̠ a̠rue a̠nwuna̠ ma̠ ima̠ra̠ ologi, ya̠a̠ a̠ma̠rugh d̠o̠yo̠ ko onwegia̠n d̠o̠ d̠a̠ a̠kikiom ya̠ igboloma̠ ma̠ orugh a̠ma̠rugh ta̠ Akrai̠st. A̠d̠ire onon amara a̠wia̠n amu̠gho̠nyan wa̠ u̠gba ma̠a̠, o̠ni̠ ma̠ o̠da Akrai̠st obhin ma̠ a̠ma̠ra̠ ma̠ ologhom i̠ki̠kara a̠ga̠i i̠di̠ar e̠mu̠gh, sa̠ ko o̠bi̠gh d̠o̠ ma̠ a̠ga̠i a̠nwegia̠n d̠a̠ od̠ighi i̠di̠ar na̠ i̠ru̠ru̠an. A̠nwuna̠ ma̠ ikperekper a̠sidogh ya̠ ib̠uiy sa̠ i̠gu̠b̠an atu̠ghu̠me̠ni̠ ta̠ Azizo̠s ya̠ i̠na aro̠ d̠a̠ anyu̠ igu atu̠ghu̠me̠ni̠ bho̠. A̠zemsi agba a̠gboloma̠ ma̠ a̠d̠izo i̠di̠ar ya̠ ado̠l a̠nwunom ya̠ na̠ e̠da ma̠ Akrai̠st ebhin ta̠ e̠gu̠b̠an a̠ma̠rugh ima̠ra̠ ologi d̠a̠ o̠tu̠o̠no̠m Akrai̠st. I̠na agba a̠gboloma̠ ma̠ ifa̠ga̠, okpon o̠ni̠ o̠do̠ti̠me̠ni̠, oguru, asi̠matan, ipoiny, o̠kpo̠ e̠mara̠nwunom, na̠ i̠gho̠r. A̠zemsi a̠bhin a̠d̠izo re̠kal a̠leriom agu̠o̠ a̠ga̠i ima̠ra̠ ologi ta̠ a̠mutiom ib̠eb̠i rogir. Opa̠n agu̠o̠ o̠gba bha̠, a̠ga̠i ima̠ra̠ ologi ta̠ amar ib̠eb̠i ogir a̠mutiom. I̠na agba ma̠a̠, ofugh ima̠ra̠ ologi d̠a̠ o̠nu̠ ku̠ku̠m na̠ olei d̠o̠, ma̠a̠ i̠yar ta̠ orugh o̠gu̠b̠e̠ni̠ (2:14). Elilegima̠ ta̠ a̠ga̠i ima̠ra̠ ologi d̠i̠yar bha̠ od̠i ka̠ a̠ghud̠um na̠ a̠nwegia̠n. I̠na a̠bhin ogbo ya̠ na̠ ema̠ra̠ atu̠o̠m agu̠o̠ iriren na̠ emum itu ya̠ i̠gu̠b̠an awa bho̠. D̠a̠ ebula̠ agu̠o̠ a̠d̠ire bho̠ amar agba a̠gboloma̠ ma̠ ib̠eb̠i ogir bho̠, amar a̠bhon obhin o̠tu̠ghan ogboloma̠ a̠ma̠rugh ta̠ o̠ni̠ ola̠ na̠ a̠ma̠ra̠ ma̠ Akrai̠st. Sene ma̠ a̠d̠ire ta̠ A̠zemsi ma̠ aro̠ ma̠ o̠ni̠ ola̠ amu̠gho̠n ikpo a̠fugh bho̠, sa̠ ta̠ a̠gir nyen (1:22-25).
Aru̠mu̠ i̠di̠ar ya̠ u̠ge̠ bho̠
A̠ga̠i a̠ghud̠um ima̠ra̠ ologi (1:1-27)
A̠ma̠rugh na̠ i̠di̠ar ya̠ na̠ ewia̠n ima̠ra̠ ologi (2:1-13)
Ima̠ra̠ ologi na̠ ogir (2:14-26)
Agu̠o̠ obhin okpoghoriom a̠nem bho̠ (3:1-18)
Ib̠eb̠i a̠kikiom (4:11-17)
U̠ghaghana ma̠ o̠li̠la bho̠ (5:1-6)
A̠kikiom egunuguma̠ (5:7-20)
1
Ibheleguma̠
1 Ami̠ A̠zemsi̠ ob̠a̠ra̠motu ta̠ A̠zib̠a̠ na̠ ta̠ Wa̠nwuna̠ A̠zizo̠s Akrai̠st na̠ age̠ na̠ a̠ruom inyin ra̠ d̠iobh na̠ i̠wal (12) roghol ya̠ na̠ e̠sasaragi̠an d̠a̠ rebhugh e̠mara̠nwunom bho̠. Ami̠ na̠ a̠bheleguma̠ inyin.
Ro̠d̠aokpon na̠ Rad̠agi̠an
2 A̠rumor na̠ aru̠marani̠ d̠ami̠, ibhone ma̠ ologi ma̠ igiel a̠d̠ien kere kere ro̠d̠aokpon na̠ e̠te̠i̠ inyin.
3 Iloghome ma̠a̠, ro̠d̠aokpon i̠ye̠ na̠ e̠d̠a ma̠ ologi ima̠ra̠ d̠inyin na̠ ekpon, sa̠ na̠ ed̠ighi ma̠ ola̠ inyin ta̠ orue one ma̠ a̠ma̠ne.
4 Ya̠a̠, iwia̠ne ma̠ agu̠o̠ ola̠ inyin ta̠ one kabar kabar obhin ka̠ okunugiom, b̠o̠ka̠ inyin od̠ikighu ma̠ aru̠mu̠, o̠ghu̠a oleghemeni, sa̠ abar ko o̠kparama d̠o̠ inyin.
5 Ya̠a̠, ku̠gba ma̠a̠ na̠ ebhir o̠ni̠ inyin o̠te̠i̠ eloghomabar, bha̠ o̠ni̠ bho̠ a̠puru ma̠ A̠zib̠a̠ wa̠ na̠ a̠bhin onyen ologi na̠ a̠nigha̠ ko̠ni̠ko̠ni̠ bho̠, sa̠ ta̠ a̠nigha̠ i̠na. A̠zib̠a̠ na̠ o̠gam d̠o̠ a̠nigha ma̠ o̠ni̠ ola̠ a̠puru i̠na ma̠ abar.
6 Ya̠a̠, ogiel ola̠ anwa na̠ a̠puru ma̠ abar, bhine d̠a̠ ologi ima̠ra̠ ma̠ a̠puru. Ologi d̠oyom o̠gba d̠o̠ i̠wal i̠wal, ezin bho̠ o̠ni̠ ola̠ ologi na̠ agba i̠wal i̠wal od̠i ka̠ opoka̠na̠n amu̠m d̠a̠ abadi̠ wa̠ okukugh na̠ a̠pughe na̠ a̠nuom na̠ agi̠, na̠ a̠nuom a̠ru bho̠.
7 O̠ni̠ ola̠ o̠ku̠a o̠ru̠ru̠an d̠o̠ ma̠a̠ i̠na ta̠ a̠rue ate̠i̠ abar d̠a̠ agu̠o̠ ta̠ Wa̠nwuna̠ bho̠.
8 O̠ni̠ ola̠ o̠ku̠a, bha̠ ologi na̠ agba i̠wal i̠wal, sa̠ na̠ a̠kpokolo d̠a̠ eb̠la̠ od̠ighi i̠di̠ar d̠o̠yo̠.
Igoiny na̠ E̠li̠la
9 Ya̠a̠, o̠ni̠ ola̠ od̠i d̠a̠ onin id̠umom ta̠ Akrai̠st, ola̠ a̠goiny d̠a̠ e̠kal abar, bha̠ a̠bhon ologi ma̠ igiel A̠zib̠a̠ na̠ a̠b̠eton i̠na.
10 Ya̠a̠, o̠li̠la o̠ni̠ ola̠ od̠i d̠a̠ onin id̠umom ta̠ Akrai̠st, a̠bhon ologi ma̠ igiel A̠zib̠a̠ na̠ a̠guri i̠na d̠a̠ a̠dila̠de o̠ki̠ri̠me̠ni̠ ozu. Ezin bho̠, o̠li̠la o̠ni̠ ta̠ a̠ru sa̠ ta̠ a̠ten ad̠u̠a, ma̠ agu̠o̠ ra̠lele i̠gho̠gho̠ ologi ed̠um na̠ e̠nyu̠n na̠ emugughu bho̠.
11 Ra̠lele bho̠ na̠ e̠nyu̠n d̠a̠ ebula̠ e̠si̠so̠ ogogo bho̠. Obom e̠si̠so̠ bho̠ na̠ api̠e̠ ma̠ i̠mu̠nu̠mu̠n na̠ a̠libhon ra̠lele bho̠. Obha̠ onin agu̠o̠ od̠ighi i̠di̠ar o̠li̠la bho̠ ta̠ eten emunia̠n.
12 Itutumeni ta̠ e̠ro̠ enigha̠ ma̠ i̠na o̠ni̠ wa̠ a̠ne amara gigiribh d̠a̠ ad̠agi̠an bho̠, ezin bho̠ ta̠ ozuom i̠na ma̠ eghoiy a̠ghud̠um wa̠ Wa̠nwuna̠ bho̠ a̠gua̠n onigha̠ ogbo ya̠ itula̠n i̠na bho̠.
13 O̠ni̠ ola̠ ad̠agi̠an i̠te̠i̠ o̠gba d̠o̠ ma̠a̠, “A̠zib̠a na̠ ad̠agi̠an ami̠.” Ezin bho̠, ko orue d̠o̠ o̠d̠agi̠an A̠zib̠a ma̠ ogir i̠karabh, sa̠ i̠na na̠ agu̠o̠ eka̠ o̠d̠agi̠an d̠o̠ ma̠ o̠ni̠ nyen.
14 Ya̠a̠, i̠karabh ebhiroma̠ o̠ni̠ na̠ agu̠o̠, na̠ e̠le̠ge̠ ma̠ o̠ni̠, na̠ e̠nyagh o̠ni̠ bho̠ na̠ ed̠ighom d̠a̠ i̠karabh.
15 Sa̠, igiel o̠ni̠ a̠guri ma̠ i̠karabh ebhiroma̠ d̠a̠ ologi, sa̠ na̠ e̠mar i̠karabh na̠ emutiom, sa̠ igiel i̠karabh bho̠ na̠ e̠te̠i̠ d̠a̠ ekunuguma̠ bho̠, sa̠ na̠ eruom omugh.
16 A̠rumor na̠ aru̠marani̠ ed̠ighologi d̠ami̠, o̠ni̠ ogelemeni d̠o̠ inyin.
17 Kerekere ob̠eb̠i abar na̠ ob̠eb̠i e̠ne̠ghe̠ na̠ ad̠u̠a d̠a̠ ote̠nai̠ny na̠ a̠ru, d̠a̠ agu̠o̠ O̠we̠de̠ wa̠ ale̠m re̠b̠alab̠al ya̠ od̠i d̠a̠ e̠nai̠ny bho̠. I̠na na̠ onwegia̠n d̠o̠, i̠na na̠ od̠ura̠n d̠o̠ a̠mutiom okokogh azi̠m nyen.
18 D̠a̠ i̠to̠ d̠o̠yo̠, sa̠ i̠na a̠bhin o̠nu̠o̠kpe̠ a̠gia̠ga̠i d̠o̠yo̠ a̠nwe amar i̠yar, a̠tenemeni ma̠ i̠pu̠r imuma̠ d̠a̠ i̠di̠ar ya̠ i̠na ale̠m bho̠.
O̠nagha o̠nu̠o̠kpe̠ ta̠ A̠zib̠a̠
na̠ ogir iya̠ na̠ agba bho̠
19 A̠rumor na̠ aru̠marani̠ ed̠ighologi d̠ami̠, i̠mu̠gho̠nyane̠ ma̠a̠: a̠bhon ko̠ni̠ko̠ni̠ ma̠ obhin d̠a̠ onyen o̠nagha abar, na̠ okimeni ozu kisa̠ ofugh abar. I̠na o̠nu̠r d̠o̠ agam i̠gam,
20 ezin bho̠ i̠gam o̠nyi̠o̠mo̠ro̠ni̠ ko orue d̠o̠ emutiom a̠ma̠rugh igielake̠ ya̠ A̠zib̠a̠ na̠ abho̠ro̠gh o̠bi̠gh bho̠.
21 O̠ku̠a a̠d̠ighi be̠le̠ni̠, i̠we̠le̠mane̠ kerekere ado̠l i̠b̠i̠si̠ghe̠ni̠an na̠ i̠karabh ya̠ na̠ e̠ro̠ ma̠ omite omite bho̠. Kpe̠le̠me̠ni̠, i̠ki̠ri̠me̠ni̠ ma̠ a̠ruzu ma̠ e̠da ma̠ o̠nu̠o̠kpe̠ wa̠ i̠na a̠gbebh d̠a̠ rologi d̠inyin bho̠, wa̠ ta̠ a̠rue a̠tenemeni inyin bho̠.
22 O̠ni̠ ko o̠gaga ma̠ e̠nagha ma̠ o̠nu̠o̠kpe̠ bho̠ ku̠ku̠m, ma̠ egelemeni ma̠ a̠ruzu d̠inyin, ya̠a̠ igire ma̠ i̠di̠ar ya̠ o̠nu̠o̠kpe̠ bho̠ na̠ agba bho̠.
23 O̠ni̠ ola̠ amu̠gho̠n o̠nu̠o̠kpe̠ bho̠, sa̠ awe̠le̠man ogir agu̠o̠ agba bho̠, bha̠ agu̠b̠an o̠ni̠ ola̠ a̠bha̠gha̠ ma̠ a̠misigh d̠o̠yo̠ d̠a̠ obha̠gha̠ma̠,
24 sa̠ a̠ten ad̠u̠a, sa̠ a̠weleta̠n agu̠o̠ ozu d̠o̠yo̠ od̠i, ma̠ i̠se̠ onin obhel bho̠.
25 Ya̠a̠, o̠ni̠ ola̠ amar a̠kimeni a̠kpon eb̠la̠ oloko wa̠ na̠ a̠tenemeni ma̠ a̠nwunom bho̠, sa̠ aro̠ ma̠ ogir ogir o̠ku̠a, sa̠ oweleta̠n d̠o̠ ma̠ i̠di̠ar ya̠ i̠na amu̠gho̠n bho̠, bha̠ A̠zib̠a ta̠ a̠tutumeni ma̠ ogir o̠ni̠ bho̠.
26 O̠ni̠ ola̠ na̠ aru̠ru̠an ma̠a̠ i̠na na̠ a̠loghom A̠zib̠a̠, ya̠a̠ na̠ orue d̠o̠ ma̠ osibhom a̠nem d̠o̠yo̠, bha̠ na̠ a̠gelemeni ma̠ ozu d̠o̠yo̠, sa̠ ologhom A̠zib̠a̠ d̠o̠yo̠ aro̠ ma̠ obhobho i̠kpo̠.
27 Ologhom A̠zib̠a̠ d̠a̠ a̠gi̠a̠ga̠i̠ sa̠ abar o̠li̠o̠m o̠ro̠ d̠o̠ d̠a̠ a̠misigh ta̠ A̠zib̠a̠ O̠we̠de̠ bho̠, bha̠ o̠lo̠gh agu̠o̠ onigha̠ anwi̠i̠ny ya̠ onweni na̠ o̠we̠de̠ o̠to̠, na̠ rekpukele anwani̠ d̠a̠ ali̠gam a̠ruzu d̠awa, na̠ oghel i̠karabh ado̠l e̠mara̠nwunom.