Ib̠eb̠i Asu̠gbagba Ma̠ Agu̠o̠
Amatiu
Age̠ Bho̠
Otighom
A̠d̠ire onon bha̠ Amatiu wa̠ ezin a̠d̠ien bho̠ a̠ma̠ra̠ ma̠ Enigha̠ ta̠ Wa̠nwuna̠ bho̠ age̠. I̠na ogun ma̠ otua̠ ebhugh ola̠ ukpon ugurumeni ola̠ awe̠le̠man ogir d̠o̠yo̠ ka̠ a̠ten odi o̠ni̠ ogbo ogir ta̠ A̠zizo̠s. D̠a̠ Ib̠eb̠i Asu̠gbagba ta̠ Amaki̠ na̠ A̠luk, uloghom i̠na d̠a̠ opa̠n a̠d̠ien ola̠ ubhelegi ma̠ A̠livai̠.
D̠a̠ rala ya̠ na̠ eten, A̠zib̠a̠ a̠gua̠n d̠a̠ aru̠nu̠ a̠riwil d̠o̠yo̠ a̠nigha̠ ma̠ a̠nwunom A̠zu bho̠ ma̠a̠, i̠na ta̠ a̠ruom Akrai̠st, o̠nyi̠ itenemeni wa̠ na̠ odoni bho̠, wa̠ ta̠ a̠ru ra̠ aro̠ ma̠ o̠ni̠ wa̠ ta̠ a̠rileghom omom irileghom bho̠. Amatiu age̠ ma̠ Ib̠eb̠i Asu̠gbagba bho̠ a̠nigha̠ ma̠ a̠nwunom A̠zu d̠o̠yo̠ ma̠ aguo̠ ola̠ awa ta̠ eloghom A̠zizo̠s wa̠ Anaze̠re̠t bho̠ bha̠ Akrai̠st, o̠ni̠ itenemeni sa̠ ta̠ agba a̠mutiom ma̠ agu̠o̠ irileghom ote̠nai̠ny od̠i. I̠na a̠bhin obhel a̠leriom agu̠o̠ Azizo̠s a̠muzughod̠iom ra̠d̠ire d̠a̠ ugba̠iny i̠zo̠ bho̠ ya̠ u̠ge̠ ugboloma̠ ma̠ Akrai̠st, wa̠ ta̠ a̠rileghom ma̠ irileghom bho̠. O̠ku̠a a̠d̠ighi be̠le̠ni̠, Ib̠eb̠i A̠su̠gbagba i̠nye̠n na̠ ebhin ugba̠iny na̠ omom i̠zo̠ bho̠ na̠ a̠biniguma̠, ma̠ agu̠o̠ amar agba ma̠ omuzughod̠iom iwowa̠ bho̠.
Agu̠o̠ anwa na̠ a̠sen Ib̠eb̠i Asu̠gbagba i̠nye̠n bho̠, mare̠ ma̠ anagha ma̠ a̠duom ta̠ Amatiu, ma̠a̠, “A̠zizo̠s bha̠ Akrai̠st, O̠li̠le̠ma ta̠ Aru̠li̠le̠ma na̠ Wa̠nwuna̠ ta̠ ogbo ya̠ inwuna̠.” D̠a̠ ebula̠ eleleguma̠ i̠nye̠n bha̠ A̠zizo̠s O̠nyi̠ ta̠ A̠zib̠a̠, i̠yar eka̠ o̠da i̠na obhin, o̠ko̠l i̠na ma̠ agu̠o̠ Wa̠nwuna̠ na̠ Witenemeni bho̠.
Aru̠mu̠ i̠di̠ar ya̠ u̠ge̠ bho̠
O̠pu̠r ob̠eton a̠ghud̠um na̠ ogir agu̠o̠ ta̠ A̠zizo̠s (1:1—4:25)
Asu̠gbagba d̠a̠ anyu̠ igu bho̠. (5:1—7:29)
A̠d̠ien kere kere atu̠ghu̠me̠ni̠, a̠sidogh na̠ i̠b̠e̠re̠gi̠an (8:1—18:35)
E̠gi̠ A̠zeruse̠le̠m na̠ i̠kparakpar a̠kikiom ekunuguma̠ (19:1—23:39)
Iwowa̠ ya̠ igboloma̠ ma̠ i̠di̠ar ya̠ ta̠ emite (24:1—25:46)
Omugh na̠ ob̠etina̠ d̠a̠ omugh ta̠ A̠zizo̠s (26:1—28:20)
1
Od̠ud̠ul O̠la ta̠ A̠zizo̠s Akrai̠st
(A̠luk 3:23-38)
1 Od̠ud̠ul wa̠ u̠ge̠ ugboloma̠ ma̠ eghun wa̠ A̠zizo̠s Akrai̠st, o̠nyi̠ ta̠ A̠devidi, o̠nyi̠ ta̠ Ebraham a̠mite bho̠:
2 Ebraham amar Azi̠ki̠; sa̠ Azi̠ki̠ amar A̠zeko̠pu̠; sa̠ A̠zeko̠pu̠ amar A̠zuda̠ na̠ a̠rumor d̠o̠yo̠;
3 sa̠ A̠zuda̠ amar Ape̠re̠z na̠ Aze̠ra, wa̠ onweni d̠awa aro̠ ma̠ Atama bho̠; sa̠ Ape̠re̠z amar E̠zro̠n; sa̠ E̠zro̠n amar Aram;
4 sa̠ Aram amar Ami̠nadab; sa̠ Ami̠nadab amar Anaso̠n; sa̠ Anaso̠n amar Asalmo̠n;
5 sa̠ Asalmo̠n amar A̠boa̠z wa̠ onweni bho̠ aro̠ ma̠ A̠rehab bho̠; sa̠ A̠boa̠z amar Obe̠di̠, wa̠ onweni bho̠ aro̠ ma̠ A̠rufu bho̠; sa̠ Obe̠di̠ amar Aze̠si̠;
6 sa̠ Aze̠si̠ amar O̠li̠le̠ma A̠devidi; sa̠ A̠devidi amar Aso̠lo̠mo̠n, wa̠ onweni bho̠ aro̠ ma̠ ani̠ ta̠ A̠yuraya bho̠;
7 sa̠ Aso̠lo̠mo̠n amar A̠rihoboa̠m; sa̠ A̠rihoboa̠m amar Abi̠za; sa̠ Abi̠za amar Asaf;
8 sa̠ Asaf amar A̠zehosafat; sa̠ A̠zehosafat amar A̠zoram; sa̠ A̠zoram amar Uzaya;
9 sa̠ Uzaya amar A̠zotam; sa̠ A̠zotam amar Ahaz; sa̠ Ahaz amar E̠zi̠kaya;
10 sa̠ E̠zi̠kaya amar Amanase̠; sa̠ Amanase̠ amar Amo̠n; sa̠ Amo̠n amar A̠zosaya;
11 sa̠ A̠zosaya amar A̠zekonaya na̠ a̠rumor d̠o̠yo̠ d̠a̠ igiel wa̠ ub̠ol awa ka̠ id̠ighom d̠a̠ Ababi̠lo̠n bho̠.
12 Igiel wa̠ na̠ ed̠ighom awa d̠a̠ Ababi̠lo̠n bho̠, sa̠ A̠zekonaya amar A̠seti̠e̠l; sa̠ A̠seti̠e̠l amar A̠zerubabe̠l;
13 sa̠ A̠zerubabe̠l amar Abihud; sa̠ Abihud amar E̠li̠aki̠m; sa̠ E̠li̠aki̠m amar Azo̠;
14 sa̠ Azo̠ amar Azado̠k; sa̠ Azado̠k amar Aki̠m; sa̠ Aki̠m amar E̠li̠ud;
15 sa̠ E̠li̠ud amar E̠li̠aza; sa̠ E̠li̠aza amar Amatan; sa̠ Amatan amar A̠zeko̠pu̠;
16 sa̠ A̠zeko̠pu̠ amar A̠zose̠fu̠ owolom ta̠ A̠meri, wa̠ amar A̠zizo̠s wa̠ ubhelegi ma̠ Akrai̠st bho̠.
17 O̠ku̠a bha̠ eb̠la̠ ramu̠m bho̠, obeton d̠a̠ Ebraham ka̠ o̠te̠i̠ d̠a̠ A̠devidi, bha̠ d̠iobh na̠ inya̠ amu̠m; ya̠a̠ obeton d̠a̠ A̠devidi ka̠ o̠te̠i̠ d̠a̠ igiel e̠d̠u̠a Ababi̠lo̠n bho̠, bha̠ d̠iobh na̠ inya̠ amu̠m; ya̠a̠ ob̠eton igiel e̠d̠u̠a Ababi̠lo̠n bho̠ ka̠ o̠te̠i̠ igiel ta̠ Akrai̠st, bha̠ d̠iobh na̠ inya̠ amu̠m.
I̠mara ta̠ A̠zizo̠s Akrai̠st bho̠
(A̠luk 2:1-7)
18 Onon agu̠o̠ ubhin u̠mar A̠zizo̠s Akrai̠st bho̠. A̠zose̠fu̠ a̠sibh A̠meri, onweni D̠o̠yo̠ ma̠ obhin ani̠, ya̠a̠ kisa̠ awa ta̠ eten otu bha̠ A̠meri na̠ a̠mumor o̠nyi̠ ola̠ awo̠l d̠a̠ E̠mu̠gh E̠tu̠tu̠ bho̠ a̠ru.
19 Agu̠o̠ A̠zose̠fu̠ owolom d̠o̠yo̠ aro̠ ma̠ a̠ga̠i o̠ni̠ bho̠, ya̠a̠ o̠bho̠ro̠ghan d̠o̠ ma̠ a̠nwunom o̠ko̠ro̠ A̠meri bho̠, sa̠ aru̠ru̠an ogbogina̠ o̠yo̠ d̠a̠ e̠nwo̠ngi̠na.
20 Agu̠o̠ i̠na a̠bhin a̠d̠ighom d̠a̠ i̠ru̠an bho̠, sa̠ otileduom ta̠ Wa̠nwuna̠ a̠mutuma̠ i̠na d̠a̠ amala, a̠fugh ma̠a̠, “A̠zose̠fu̠ o̠nyi̠ ta̠ A̠devidi, ka̠ oghil obhin A̠meri ma̠ o̠ro̠ ani̠ d̠oyom, ezin bho̠ eghun wa̠ i̠na a̠mumor bho̠ awo̠l d̠a̠ E̠mu̠gh E̠tu̠tu̠ bho̠ a̠ru.
21 I̠na ta̠ amar olobhiri o̠nyi̠, sa̠ anwa ta̠ a̠ghol a̠d̠ien d̠o̠yo̠ ma̠ A̠zizo̠s, ezin bho̠ i̠na ta̠ a̠tenemeni ma̠ a̠nwunom d̠o̠yo̠ d̠a̠ i̠karabh d̠awa.”
22 Eb̠la̠ i̠nye̠n imite ma̠ agu̠o̠ ola̠ omuzoghod̠iom i̠di̠ar ya̠ Wa̠nwuna̠ bho̠ awo̠l d̠a̠ owil bho̠ a̠fugh ma̠a̠:
23 “I̠bi̠ghe̠! E̠kar o̠nyani̠ ta̠ a̠mumor amar olobhiri o̠nyi̠, sa̠ ta̠ oghol I̠na ma̠ I̠manu̠e̠l” (a̠ma̠ra̠ ma̠a̠, “A̠zib̠a̠ od̠i na̠ i̠yar”).
24 Igiel wa̠ A̠zose̠fu̠ asu̠ma bho̠, sa̠ a̠gir agu̠o̠ otileduom ta̠ Wa̠nwuna̠ a̠ruom i̠na bho̠ sa̠ a̠bhin ani̠ d̠o̠yo̠ a̠yel.
25 Ya̠a̠ i̠na na̠ okod̠uom d̠o̠ ma̠ A̠meri tu̠tu̠n amar o̠nyi̠ bho̠, sa̠ a̠ghol a̠d̠ien D̠o̠yo̠ ma̠ A̠zizo̠s.