2
1 Pe shɨnɨɨsho, mʉwʉleshe uwubhiibhi wonti, ɨlenga, ishisa ɨshɨ lenga, ʉmwone, nu wulumanyi.
2 Anza she abhaana abheela bhakwanza izibha ɨlya bhanyina bhaabho, nɨɨmwe mʉbhe nɨ shʉʉmɨlwa ishi zibha ilyinza ilyi zwi lya Mʉlʉngʉ. Ɨnga mwamwela izwi lɨnɨɨlyo, mʉngakhola kʉkʉla mu wuposhi.
3 Ishi mulinjile, khabhɨlɨ mwandile kʉmanya kʉtɨ ʉMwene mwinza.
Abhasaabhʉlwa bha Mʉlʉngʉ
4 ɄMwene uYeesu we liwe ɨlya wuumi ɨlya kʉzenjela. Iwe lɨnɨɨlyo abhantʉ bhálikhaanile, lyoli ʉMʉlʉngʉ álɨsabhʉʉye, khabhɨlɨ lya lushindikho pamiiso gaakwe. Ishi mʉsejelelaje uYeesu,
5 pe nɨɨmwe ʉMʉlʉngʉ akʉbhabhombela anza mawe aga wuumi kʉzenga inyumba ɨya shifinjile. Ɨmwe mwe bhapuutili abhafinjile mwe mukufumwa imfinjile ɨzya shifinjile zye zɨkʉmʉkhondezya ʉMʉlʉngʉ kʉ makha ga Yeesu Kilisiti.
6 Kʉnongwa ye uWusimbe uWufinjile wʉkʉtɨ,
“Yeenyi, kʉnʉʉkwo mʉ nhaaya ɨya mu Sayuuni,
ɨnkʉbhɨɨkha iwe ɨpɨtɨ ɨlya lwalo,
khabhɨlɨ iwe ɨlya lushindikho lye ɨndɨsabhʉʉye.
Umuntu wowonti we akʉmwɨtɨkha
wʉnʉʉyo we liwe lɨnɨɨlyo,
te akhasʉʉpɨle naalumo!”
7 Iwe liniili lya lushindikho kukwinyu ɨmwe mwe mʉkʉmwɨtɨkha, ɨleelo kʉ bhaala bhe bhatakʉmwɨtɨkha,
“Iwe lye bhálikhaanile abhazenji,
lye lyabha liwe ɨlya pambalɨ
lye lilemile inyumba yonti.”
8 Khabhɨlɨ,
“Ili lye liwe lye abhantʉ bhatikuntilaje,
liwe lye lɨtɨbhazyaje abhantʉ kʉtɨ bhagwanje.”
Bhatikuntile kʉnongwa ye bhatakhatinikha izwi lya Mʉlʉngʉ, shɨnɨɨsho she bhabhatishiliilwe nʉ Mʉlʉngʉ kufuma khalɨ.
9 Ɨleelo ɨmwe ʉMʉlʉngʉ abhasabhʉʉye mʉbhe mwe bhantʉ bhaakwe. Ɨmwe mwe bhapuutili abha shɨmwene, khabhɨlɨ ɨnsɨ ye yɨkʉmʉbhombela ʉMʉlʉngʉ wʉʉyo mwene, khabhɨlɨ mwe bhafinjile. Mwásabhuliilwe kʉtɨ mʉbhe mwe bhalumbiilili bhɨ mbombo inyinza ɨzya Mʉlʉngʉ, we ábhabhɨlɨshɨɨye kʉtɨ mwepe mu khiisi ɨnga mʉbhe kʉkwakwe mʉ lʉkhozyo ulwinza.
10 Pawandɨlo mʉtáamɨle mwe bhantʉ bha Mʉlʉngʉ, ɨleelo ishi mwe bhantʉ bhaakwe. Khabhɨlɨ mʉtáposheleeye ishisa sha Mʉlʉngʉ, ɨleelo ishi mʉshɨposheleeye.
Kubhatinikha abhalongozi bhonti
11 Bhaganwa bhaanɨ, ɨnkʉbhalamba, kʉnongwa ye mwe bhajeni, khabhɨlɨ mukushizanya, zɨshɨmbɨlaje ɨnsʉngʉkho zyinyu ɨzya mʉbhɨlɨ zye zikulwa ʉwʉlʉgʉ na mooyo giinyu.
12 Mʉbhe nɨ njendo inyinza pɨlongolela pa bhe bhatakʉmwɨtɨkha ʉMʉlʉngʉ, ɨnga bhakʉbhandɨla amalenga kʉtɨ mʉkʉbhomba imbiibhi, bhazɨlolaje ɨmbombo zyinyu inyinza. Pe bhatɨmʉpaale ʉMʉlʉngʉ kʉnongwa yiinyu pi siku lye akhayɨnza kʉlonga.
13 Kʉnongwa ye mwe bhantʉ bhe bhakʉmʉlandata ʉMwene uYeesu muzitinikhaje ɨndajɨzyo ɨzyɨ nsɨ yiinyu. Mumutinikhaje ʉmʉpɨtɨ wiinyu ʉwɨ nsɨ, kʉnongwa ye ʉweene we mwamuli ʉmʉpɨtɨ ʉwa bhantʉ bhonti.
14 Khabhɨlɨ mubhatinikhaje abhalongozi abha mɨkoa bhe ʉmʉpɨtɨ ʉwɨ nsɨ abhasebhile. Mʉbhombaje shɨnɨɨsho kʉnongwa ye abheene bhabhishiilwe kʉtɨ bhabhapanje ulufundo abhantʉ bhe bhakʉbhomba imbiibhi na kʉbhapaala bhaala bhe bhakʉbhomba inyinza.
15 Ɨnkʉlonga shɨnɨɨsho kʉnongwa ye ʉMʉlʉngʉ akwanza mʉbhombaje inyinza ɨnga bhaala bhe bhatalɨ nu wumanyi bhatabhanje na lyolyonti ɨlya kʉlonga kubhabhuna ɨmwe.
16 She poope mwe bhasatʉlwe, mʉtabhombelaje ʉwʉsatʉlwe wiinyu kʉbha lɨdala lya kʉbhomba imbiibhi, lyoli mwɨkhalaje anza she abhabhombi bha Mʉlʉngʉ bhakwanzɨwa kwɨkhala.
17 Mubhashindikhaje abhantʉ bhonti, na kʉbhagana abhanholo bhiinyu mʉ lwɨtɨkho. Muyisyaje kwa Mʉlʉngʉ, na kumushindikha ʉmʉpɨtɨ wiinyu.
Mujimbililaje anzu Yeesu she ájimbiliiye
18 Ɨmwe bhatumwa, mubhatinikhaje abhapɨtɨ bhiinyu, khabhɨlɨ mubhashindikhaje, te kʉ bhaala bhe bhinza na bhatonsu bheene, lyoli na bhaala bhe bhakhali.
19 Uwu we winza nalyoli, ɨnga umuntu akujimbiilila amayɨmba ge atakhondeeye kʉnongwa ye amanyile kʉtɨ ʉMʉlʉngʉ she akwanza.
20 Mʉtangamʉkhondezya ʉMʉlʉngʉ kwɨ dala ɨlya kujimbiilila ɨnga bhakubhafunda kʉnongwa yi mbiibhi zyinyu. Ɨleelo ɨnga mukujimbiilila kʉyɨmba kʉnongwa ye mubhombile inyinza, pe ʉMʉlʉngʉ akʉbhaseshela.
21 Mʉkwanzɨwa kʉtɨ mujimbililaje shɨnɨɨsho, kʉnongwa ye uKilisiti wʉʉyo áyimbile kʉnongwa yiinyu. Khabhɨlɨ akhabhaleshela ɨshɨkholanyo, kʉtɨ mwenyezyaje kʉbhomba zye ábhombile.
22 “Ʉweene atábhombile imbiibhi,
awe kʉbha nɨ lenga naalimo.”
23 We bhakumuliga atágalusiizye izwi naalimo ɨlya kuliga, we bhakʉmʉyɨmvwa atálinjile kʉtabhʉlɨzya naalimo ɨlya kʉbhoogofwa, lyoli zyonti ámʉlesheeye ʉMʉlʉngʉ we akʉlonga abhantʉ ku wugolosu.
24 UKilisiti wʉʉyo ápimbile imbiibhi zyɨtʉ mʉ mʉbhɨlɨ waakwe pa shɨkhobhenhanyo. Ábhombile shɨnɨɨsho ɨnga ɨtwe tʉtatabhaalwe winza ni mbiibhi, lyoli tʉbhe nʉ wɨɨkhalo ʉwa wugolosu. Ʉweene bhámuvwalaziizye, ɨnga ɨmwe mʉpone.
25 Mwáteejile anzɨ ngoole zye zyáteejile, ɨleelo ishi mʉmʉgalʉshɨɨye ʉMwene uYeesu, uMudiimi wiinyu, khabhɨlɨ Mulindiilili wa mooyo giinyu.