3
Se'sus me' espe'g je mu Mowiso'q
1 Nigmatut, ta'n getlams'tasultioq Se'suseg, gis wigumugsioq Gjinisgam Gisiteget ugjit sape'ultinew. Angitelmug Se'sus. Gisiteget petgimapnn ugjit mawi espe'n patlia'suin. Apoqonmugsi'gw ta'n te's'g goqweieg ta'n tlei ta'n teli gtlams'tasulti'gw aq agnutmugsi'gw Gjinisgaml.
2 Westaulg tela'teget 'ms't goqwei Gjinisgaml telimt'pnn, Gjinisgam ta'n megnapnn ugjit lugwatmn ula lgowaqan. Pa na wijei aq Mowis tela'tegep 'ms't goqwei ta'n Gjinisgaml telimt'pnn ta'n teli ilgwenaj Gjinisgam ugtmimajuinumg.
3 Gatu Westaulg me' espe'g aq Mowiso'q aq tepawgtig me' gepmitelmugsin. Pa na wijei aq ta'n wen etlitoq wen'ji'guom me' gepmite'tasit je mu wen'ji'guom ta'n etlitoq.
4 Te's wenji'guom na eig newgte'jit ta'n 'ms't goqwei iganpugutg. Gjinisgam na negm ta'n 'ms't iganpugutg.
5 Mowis, na Gjinisgam uglugowinu'jml, gigwajielitl. Tela'tegep ta'n Gjinisgaml telimj. Ilgwennaji Gjinisgam ugtmimajuinumg Isle'laq, aq wesgutg'p ta'n goqwei Gjinisgam tlimugsitesnu me' enmiaq.
6 Gatu awna Se'suguli na Gjinisgam uggwisl. Na gi'gwajiet aq tela'teget ta'n Gjinisgaml telimj. Mu negm pas'g lugowinu, gatu awna negm na Gjinisgam uggwisl, Se'sus ta'n 'ms't goqwei mawn'g aq iganpugutg. We'gaw iganpugu'tuaji 'ms't Gjinisgam un'jang. Ginu na Gjinisgam un'jang. Amujpa na siaw melgo'tmug, ta'n tl majulgwalatesnu glapis ugtejgewei. Siaw lita'sua'latesnu Se'sus aq tlimatesnu igtigig ugjit negm. Mu jiglapasualawg Gjinisgam aq ma liamulug.
Gjinisgam ugtmimajuinumg atlasmultitaq
7 Na glaman ma liaptmug muta Wejuli Nisgam teluet,
“Ta'n tujiw nutat ta'n goqwei
Gjinisgam telimugsioq nige' gisgug,
8 jigs'tmug. Mut ml'gatpa'tinew, pa wijei aq gujjua'qi'g,
ta'n elistua'titeg Gjinisgaml
na na'gwegl ta'n eimu'ti'titeg paqtaqamigtug.
Melgatpa'tipnig uggamlamunuaq
aq wet nu'gwala'tipnn Gjinisgaml.”
9 Gjinisgam teluet,
“Gilew gujjuaqi'g wet nu'gwalipnig aq elistuipnig.
We'gaw gisi apoqonmaqig aq gegnuimgig ne'wisgegipunqeg.
10 Etna na ugjit wegaiugtaqapnig mimajuinu'g aq telueiap,
‘Mo tetapua'taqati'gw ta'n teli angita'sulti'tij
aq mo getu jigs'tmui'tigul nt'tplutaqanml.’
11 Wegaiap aq ml'g'pugueiap aq ni'n teplumg'pnig,
‘Mo eigtnug gisi pisgwita'new na maqamigew
ta'n tli atlasumultinew maw ni'n.’ ”
Na teluet Gjinisgam.
12 Nigmatut, ango'tmug, mo wen te'sioq 'ggamlamung tel winjigtn, na puni gtlams'tmn aq jigla'sin Gjinisgamewigtug. Gjinisgam ta'n apji mimajit gisa'laji mimajuinu'g mimajultinew.
13 Gatu awna apoqonmatulti'gw ala wen ap igtig te'sigisg'g, glaman ma wen te'sioq gisgugsin pata'tegen aq gisa'lugsin mlg'sin. Na tla'taqati'gw ta'n teli pgije'g Gjinisgam me' siaw wigumugsioq ugjit ugsita'tinew.
14 Pa na musga'tuoq ta'n tel gegnu mimajultioq na wijei siaw melgi gtlams'tasultioq 'st'ge' ta'n amgweseweieg, aq glapis enmigiaspiaq. Na tujiw maw mimajultitoqs'p wa'so'q maw Se'sugulial.
15 Na ula Gjinisgam ugtwi'gatiqn telueg,
“Ta'n tujiw nutuoq ta'n goqwei Gjinisgam telimugsioq
nige' gisgug na jigs'tmug.
Mut ml'gatpa'tinew 'st'ge'
ta'n gujjuaqi'g tel listua'tipnn Gjinisgaml,
na na'gwegl ta'n eimu'ti'titeg paqtaqamigtug.
Melgatpa'tipnig uggamlamunuaq
aq wet nu'gwala'tipnn Gjinisgaml.”
16 Wen ta'nig nutua'tipnn Gjinisgaml ugglusuaqanml aq mo jigs'tua'tigupnn? 'Ms't ta'n te'sijig mimajuinu'g ta'n Mowis tewa'la'tipni Ijiptg.
17 Wen negla ta'n Gjinisgam wegaiugtuapni ne'wisgegipunqeg? Na wijei mimajuinu'g ta'nig pata'taqatipnig aq etli 'npu'tipnig paqtaqamigtug.
18 Wenig wesguma'sni ta'n tujiw Gjinisgam teplumsiteg, “Mo eigtnug pisgweta'new na maqamigew ta'n tli atlasmultinew maw ni'n”? Etna na negmow ta'n mo jigs'tmu'tigupnig. Ta'nig mo getu majulgwala'tigupnn.
19 Na nige' gisi ns'tasulti'gw, mo gisi lta'gupnig muta elistmu'tijig aq megtua'titl Gjinisgaml aq mo getlams'tasultigupnig.