8
Nige' Se'sus mawi espe'g patlia's ugjit ginu
1 Ula na giasgiwewei ta'n goqwei wesgutm. Ginu geggunug mawi espe'g patlia's ta'n pemgopit ugtinaqanmg Gisitegelitl, Gisiteget ta'n maw gepmitelmut wa'so'q.
2 Se'sus, na mawi espe'g patlia's, etl lugwatg ugtlgowaqan na'te'l. Patlia'suit wa'so'qewei a'sutuo'guomg ta'n maw gepme'g. Etl lugwet na'te'l wiguow ta'n Gjinisgam Gisiteget gisito'q, ta'n ji'nm mu gisitug.
3 Ta'n te'sit espe'g patlia's telgitasit iga'tun ignmatimgewei gisna wi'sisg ta'n ne'potg patgulmesigaqanigtug aq nugwa'lut ugjit Gjinisgam. Etna na ugjit megenut. Aq nige' Se'sus ginuewei mawi espe'g patlia's amujpa na geggung nat goqwei ta'n ignmuan Gjinisgaml.
4 Lpa na ugs'tqamug eig's, mu eigtnug gis patlia'suin. Muta patlia'sg eigig ta'n ignmuetu'tij ignmatimgewei ta'n telgitas'g Lesui'peweiei 'tplutaqan.
5 Gatu na 'lgowaqan ta'n ala patlia'sg tela'tu'titl pas'g napgeta's'gl aq 'st'ge' gjijaqamiju'aqal ta'n goqwei teliaq wa'so'q. Pa na wije't'p ugjit Mowiso'q. Ta'n tujiw, Gjinisgam telimapnn Mowisal 'ltu'tinew sape'wig wi'g teplumtimgeweiei teluet, “Ango'te'n ta'n teli'tun 'ms't goqwei menaqqajewei st'ge' ta'n tel gnu'tmulap aq musga'tulap gm'tnigtug.”
6 Glapis gatu nige' Se'sus ignmut 'lgowaqan ta'n mawi espe'g je mu ala igtigig patlia'sg. Negm na nuji glutmelsewet ugjit me' aji gelu'lg gis agnutmamgewei ugjit Gjinisgaml aq maw mimajuinu'g aq tetpaqa'toq. Me' aji gelu'lg muta Gjinisgam teplumaji mimajuinu'g me' ma'muni ulapetmnew.
7 Pa na mo goqwei amsaltenugusn amgwesewei gisagnutmamgewe'l, mu nugu 'l'ta's'gtnuisoq tapuewei. Gatu mimajuinu'g mu gis gugunmi'tigup amgwesewei gisagnutmamgewe'l. Etna na ugjit Gjinisgam weji el'toqop igtig gisagnutmamgewe'l.
8 Ilsutg na amgwesewei gisagnutmamgewe'l mo elugwenug. Gjinisgam teluet,
“Tetaputesg iga'q
ta'n tujiw 'ltutes pilei gisagnutmamgewei
ugjit na 'Nnu'g telui'tmi'tij Lesui'paq
ta'n wigultijig Isle'lewa'gig aq Jutiaewa'gig.
9 Ma wije'nug aq na mawagnutmamgewei
ta'n ni'n eltaqapnig gujjuaqi'g.
Na na'gweg ta'n wesua'tugupnig ugpitnuaq
aq tewa'lg'pni na maqamigew, teluisig Ijipteg.
Mo siaw gugunmi'tigup teplumtimgewe'l
ta'n gis agnutma'tieg'p, etna na ugjit eliamgupni.
10 Gatu nige' na ula pilei mawagnutmamgewei
ltua's 'ntmimajuinumg Isle'laq.
Tliatew me' enmiaq. Teplumgig,
‘Ni'n 'nt'tplutaqanml iga'tua's
ugtangita'suaqanmuaq
aq guguntaq uggamlamunuaq.
Emtoqwalitaq ni'n Gjinisgam
aq negmow na 'ntmimajuinumitaq.’
11 Ma nugu wen gina'muagwi aq tlimaqwi,
‘Gji'jiatoqs'p ta'n wen Gjinisgam.’
Muta 'ms't 'gji'jitaq ni'n,
ms't ta'n maw maljewe'jg aq ta'n maw gisigu'tijig.
12 Ewlitelma's ta'nig opla'taqati'tij
aq apigsigtua's ta'n teli pata'taqati'tij
aq ma nugu migwite'tmuaqul ugtlue'utiwaq.”
Na teluet Gjinisgam.
13 Ta'n tujiw wesgutg'pneg pilei teplumtimgewei ta'n 'ltutew Gjinisgam musga'toq na amgwesewei mu elugwenug. Mo gi's gisa'lagwi mimajuinu'g gigjita'new Gjinisgamewigtug muta mimajuinu'g mo gi's gaqi majulgwalagwi. Na glaman apugjig ma e'wa's't'nug.