8
To̱ꞌon yóꞌo káꞌa̱n ña xa̱ꞌa̱
ñii ñaꞌa̱ ñá ni̱ki̱ꞌvi kua̱chi xíꞌin ñii ta̱a
1 Ta ta̱Jesús kua̱ꞌa̱n ra, ta kua̱ꞌa̱n ndaa ra ñii xi̱ki̱ ña na̱ní Xi̱ki̱ tón Olivo.
2 Ta ni̱ti̱vi xita̱a̱n inka̱ ki̱vi̱, ta ndi̱kó ta̱Jesús, ki̱xaa̱ ra veꞌe ño̱ꞌo káꞌno ñoo Jerusalén. Ta saá ki̱xaa̱ ñii tiꞌvi káꞌno ni̱vi no̱o̱ ra, ta xi̱koo ra, ta ki̱xáꞌá ra sánáꞌa ra ni̱vi yóꞌo.
3 Ta saá sava nafariseo xíꞌin nata̱a na sánáꞌa nda̱yí Ndios ña ni̱taa ta̱Moisés kui̱ya̱ xi̱na̱ꞌá, va̱xi na no̱o̱ ta̱Jesús. Ta ki̱xaa̱ na no̱o̱ ra xíꞌin ñii ñaꞌa̱, ñá ti̱in na, chi na̱níꞌi na ñá táꞌan mi̱i kíꞌvi ñá kua̱chi xíꞌin ñii ta̱a ta̱ o̱n si̱ví yii̱ ñá kúu, káchí na. Ta ka̱ni ndichi na ñáñaꞌa̱ yóꞌo ma̱ꞌñó no̱o̱ ndóo kua̱ꞌa̱ ní ni̱vi, yatin no̱o̱ yóo ta̱Jesús.
4 Ta saá nafariseo xíꞌin nata̱a na sánáꞌa nda̱yí ni̱ka̱ꞌa̱n na xíꞌin ta̱Jesús, káchí na saá:
―Tata maestro, na̱níꞌi ndi̱ ñáñaꞌa̱ yóꞌo táꞌan mi̱i kíꞌvi ñá kua̱chi xíꞌin ñii ta̱a ta̱ o̱n si̱ví yii̱ ñá kúu.
5 Ta nda̱yí Ndios ña ni̱taa ta̱Moisés xi̱na̱ꞌá xáꞌnda chiño ña ndí xíni̱ ñóꞌó koon yó yu̱u̱ ndiꞌi náñaꞌa̱ ná kéꞌé saá, a̱nda̱ kivi̱ ná. Ta yóꞌó, ¿yukía̱ káchí ún xa̱ꞌa̱ ñayóꞌo? ―káchí na xíꞌin ra.
6 Saá ni̱nda̱ka̱ to̱ꞌon na ta̱Jesús chi ndúkú na ña nakava ra kua̱chi, ña̱kán kuchiño na taxi na kua̱chi xa̱ꞌa̱ ra no̱o̱ nachiño. Ta ta̱Jesús o̱n vása ní‑ndakuii̱n ra yuꞌu̱ na, ta chi̱ndee ra no̱o̱ ra, ta xíꞌin nduku ndaꞌa̱ ra, ki̱xáꞌá ra táa ra no̱o̱ ñoꞌo̱.
7 Ta tuku tuku ndáka̱ to̱ꞌon na yu kúu ña keꞌé na xíꞌin ñáñaꞌa̱ yóꞌo. Ta saá ta̱Jesús nda̱níꞌi ra no̱o̱ ra, ta ni̱ka̱ꞌa̱n ra xíꞌin na, káchí ra saá:
―Yukú ndóꞌó na o̱n ko̱ó nda̱ ñii kua̱chi kómí, ta vitin kuu ndó nano̱ó sakana yu̱u̱ sa̱ta̱ ñáñaꞌa̱ yóꞌo ―káchí ta̱Jesús xíꞌin na.
8 Ta tuku chi̱ndee ra no̱o̱ ra, ta ta̱a ra xíꞌin nduku ndaꞌa̱ ra no̱o̱ ñoꞌo̱.
9 Ta ni̱vi yóꞌo xi̱ni̱ so̱ꞌo na ña ni̱ka̱ꞌa̱n ra xíꞌin na, ta saá ñii ñii na ke̱e na kua̱ꞌa̱n na. Siꞌna ke̱e na xi̱kua̱ꞌa̱ ní ka̱, ta saá xi̱kundiko̱n ndiꞌi inka̱ na, kua̱ꞌa̱n na. Ta saá si̱ín la̱á kuiti ñáñaꞌa̱ yóꞌo ni̱ndo̱o ñíndichi no̱o̱ ta̱Jesús.
10 Ta ta̱Jesús nda̱níꞌi ra no̱o̱ ra, ta ni̱nda̱ka̱ to̱ꞌon ra ñáñaꞌa̱ yóꞌo, káchí ra xíꞌin ñá:
―Nana, ¿míchí kua̱ꞌa̱n ni̱vi na chi̱kaa̱ kua̱chi sa̱ta̱ ún? ¿Án o̱n ko̱ó nda̱ ñii nayóꞌo yíta na káꞌa̱n na ndí xíni̱ ñóꞌó kivi̱ ún? ―káchí ra xíꞌin ñá.
11 Ta nda̱kuii̱n ñá, ni̱ka̱ꞌa̱n ñá:
―O̱n ko̱ó ka̱ nda̱ ñii ni̱vi na káꞌa̱n xíni̱ ñóꞌó kivi̱ i̱ yíta yóꞌo, Tata.
Ta nda̱kuii̱n ta̱Jesús, ni̱ka̱ꞌa̱n ra saá:
―Ta ni yi̱ꞌi̱, o̱n ka̱ꞌa̱n i̱ ndí xíni̱ ñóꞌó kivi̱ ún, nana. Ta vitin kua̱noꞌo̱ ún, ta o̱n ki̱ꞌvi ka̱ ún kua̱chi ―káchí ta̱Jesús xíꞌin ñá.
To̱ꞌon yóꞌo káꞌa̱n ña ta̱Jesús kúu ñoꞌo̱ ndinoꞌo yéꞌe
12 Ta saá ta̱Jesús tuku ni̱ka̱ꞌa̱n ra xíꞌin ni̱vi na ndóo veꞌe ño̱ꞌo yóꞌo:
―Yi̱ꞌi̱ kúu ñoꞌo̱ ndinoꞌo yéꞌe no̱o̱ ni̱vi ñoyívi. Ta ndiꞌi ni̱vi na kundiko̱n yi̱ꞌi̱, o̱n ko̱ꞌo̱n ka̱ na yichi̱ naa ní ña o̱n váꞌa, chi kukomí na ñoꞌo̱ ndinoꞌo ña taxi kutaku̱ ndinoꞌo na ―káchí ta̱Jesús.
13 Ta nafariseo ni̱ka̱ꞌa̱n na xíꞌin ra, káchí na saá:
―Ndasaá kuiti mi̱i ún káꞌa̱n ún ndákuii̱n ún xa̱ꞌa̱ ún, ta o̱n ko̱ó inka̱ ni̱vi ndákuii̱n xa̱ꞌa̱ ún. Ta saá ña káꞌa̱n ún xa̱ꞌa̱ mi̱i ún, o̱n vása ndáya̱ꞌví ña no̱o̱ ndi̱ ―káchí na xíꞌin ta̱Jesús.
14 Ta nda̱kuii̱n ta̱Jesús, ni̱ka̱ꞌa̱n ra xíꞌin na:
―Vará ndákuii̱n i̱ xa̱ꞌa̱ mi̱i i̱, ta saá ni, ña ndáya̱ꞌví kúu to̱ꞌon ña káꞌa̱n i̱, chi xíni̱ va̱ꞌa i̱ míchí ki̱xi i̱, ta xíni̱ va̱ꞌa i̱ míchí ko̱ꞌo̱n i̱. Ta ndóꞌó, o̱n vása xíni̱ ndó míchí ki̱xi i̱, ta ni o̱n vása xíni̱ ndó míchí ko̱ꞌo̱n i̱.
15 Ta ndóꞌó, ndasaá kuiti xíꞌin ñandíchí si̱ni̱ ni̱vi kísa nani ndó xa̱ꞌa̱ kua̱chi inka̱ ni̱vi. Ta yi̱ꞌi̱, o̱n vása kísa nani i̱ xa̱ꞌa̱ kua̱chi nda̱ ñii ni̱vi vitin.
16 Ta saá ni, táná kasa nani i̱ xa̱ꞌa̱ kua̱chi ni̱vi, ta xíꞌin ña ndixa nda̱a̱ keꞌé i̱ saá. Chi o̱n si̱ví ñii la̱á mi̱i i̱ kasa nani i̱ xa̱ꞌa̱ kua̱chi ni̱vi, ta Yivá i̱ Ndios, ta̱a ta̱ ti̱ꞌví yi̱ꞌi̱, ñii yóo ra xíꞌin i̱ ña kasa nani ndi̱ xa̱ꞌa̱ kua̱chi ni̱vi.
17 Yóo nda̱yí ña kísa ndivi ndó ña káchí ndí xíni̱ ñóꞌó koo o̱vi̱ ni̱vi, tá ñii koo yuꞌú to̱ꞌon ña ndakuii̱n na o̱vi̱ yóꞌo, ta saá va̱ꞌa kandixa yó ña káꞌa̱n na, chi saá kísa nda̱a̱ na xa̱ꞌa̱ kua̱chi, káchí nda̱yí ña kísa ndivi ndó.
18 Ta yi̱ꞌi̱ kúu ñii ta̱a ta̱ ndákuii̱n xa̱ꞌa̱ mi̱i i̱, ta Yivá i̱, ta̱a ta̱ ti̱ꞌví yi̱ꞌi̱, kúu inka̱ ta̱ ndákuii̱n xa̱ꞌa̱ i̱ ―káchí ta̱Jesús xíꞌin na.
19 Ta saá ni̱nda̱ka̱ to̱ꞌon na ra, káchí na saá xíꞌin ra:
―¿Míkía̱ yóo Yivá ún? ―káchí na.
Ta nda̱kuii̱n ta̱Jesús, ni̱ka̱ꞌa̱n ra xíꞌin na:
―O̱n vása xíni̱ ndó yi̱ꞌi̱, ni o̱n vása xíni̱ ndó Yivá i̱. Tá kunda̱a̱ ini ndó yu kúu i̱, níkúu, ta saá ndixa kunda̱a̱ ini ndó yu kúu Yivá i̱ ―káchí ta̱Jesús xíꞌin na.
20 Ndiꞌi to̱ꞌon yóꞌo ni̱ka̱ꞌa̱n ta̱Jesús xíꞌin na ki̱vi̱ yóo ra veꞌe ño̱ꞌo káꞌno ñoo Jerusalén, chi yóo ra sánáꞌa ra ni̱vi na ndóo yatin no̱o̱ yíta caja no̱o̱ táan na si̱ꞌún ña sóko̱ ni̱vi no̱o̱ Ndios. Ta nda̱ ñii ni̱vi ni̱‑tiin na ra ña nataxi na ra ndaꞌa̱ nachiño, chi o̱n ta̱ꞌán to̱nda̱a ki̱vi̱ chitóni̱ Ndios saá keꞌé na xíꞌin ra.
To̱ꞌon yóꞌo káꞌa̱n ña
ndí ta̱Jesús o̱n si̱ví ta̱a ta̱ ñoyívi yóꞌo kúu ra
21 Ta saá ni̱ka̱ꞌa̱n ta̱Jesús xíꞌin na:
―Ya̱chi̱ ní kee i̱ ko̱ꞌo̱n i̱, ta ndóꞌó nandukú ndó yi̱ꞌi̱, ta o̱n kuchiño ndó naníꞌi ndó yi̱ꞌi̱. Saá chi o̱n xi̱in ndó ndikó ini ndó xa̱ꞌa̱ kua̱chi ndíso ndó, ta ndixa kivi̱ ndó xíꞌin kua̱chi ndíso ndó. Ta saá o̱n ki̱ví ko̱ꞌo̱n ndó ta xaa̱ ndó no̱o̱ ko̱ꞌo̱n i̱ ―káchí ra.
22 Ta nanáꞌno no̱o̱ najudío káꞌa̱n na xíꞌin táꞌan na, káchí na saá:
―O̱n ki̱ví ko̱ꞌo̱n yó no̱o̱ ko̱ꞌo̱n ra, káchí ra. ¿Án xáni si̱ni̱ ra kaꞌni xíꞌin mi̱i ra, ña̱kán ni̱ka̱ꞌa̱n ra saá? ―káchí na káꞌa̱n na xíꞌin táꞌan na.
23 Ta ni̱ka̱ꞌa̱n ta̱Jesús xíꞌin na, káchí ra saá:
―Ndiꞌi ndóꞌó kúu ndó ni̱vi ñoyívi yóꞌo, ta ndasaá kuiti ndíko̱n ndó yichi̱ ñoyívi yóꞌo. Ta yi̱ꞌi̱, ta̱a ta̱ ke̱e ñoyívi ni̱no kúu i̱, ta o̱n vása ndíko̱n i̱ yichi̱ ñoyívi yóꞌo.
24 Xa nda̱to̱ꞌon i̱ xíꞌin ndó ndixa kivi̱ ndó xíꞌin kua̱chi ndíso ndó. Saá chi tá o̱n vása kándixa ndó to̱ꞌon ña nda̱to̱ꞌon i̱ xa̱ꞌa̱ i̱ xíꞌin ndó yu kúu yi̱ꞌi̱, ta ndixa kivi̱ ndó xíꞌin kua̱chi ndíso ndó ―káchí ta̱Jesús xíꞌin na.
25 Ta saá ni̱ka̱ꞌa̱n na xíꞌin ra:
―Ta yóꞌó, ¿yu kúu ún? ―káchí na xíꞌin ra.
Ta nda̱kuii̱n ra, ni̱ka̱ꞌa̱n ra xíꞌin na:
―Ta̱nda̱ ki̱vi̱ ki̱xáꞌá i̱ káꞌa̱n i̱ xíꞌin ndó, xa ndáto̱ꞌon i̱ xíꞌin ndó yu kúu i̱.
26 Yóo kua̱ꞌa̱ ní ña kúchiño ka̱ꞌa̱n i̱ xíꞌin ndó xa̱ꞌa̱ ña o̱n váꞌa kéꞌé ndó. Saá chi ta̱a ta̱ ti̱ꞌví yi̱ꞌi̱ va̱xi i̱ kúu ta̱nda̱a̱ ndinoꞌo, ta ñii ki̱ꞌva saá nda̱tán yóo to̱ꞌon ña xíni̱ so̱ꞌo i̱ káꞌa̱n ra, saá yóo ña káꞌa̱n i̱ xíꞌin ni̱vi ñoyívi yóꞌo ―káchí ta̱Jesús xíꞌin na.
27 Ta ni̱vi yóꞌo o̱n vása ní‑kunda̱a̱ ini na ndí ta̱Jesús káꞌa̱n ra xa̱ꞌa̱ Yivá ra Ndios.
28 Ta saá ni̱ka̱ꞌa̱n ka̱ ta̱Jesús xíꞌin na, káchí ra:
―Ta ñii ki̱vi̱ tiin ndó yi̱ꞌi̱ ta ndaníꞌi ndó yi̱ꞌi̱, ta̱a ta̱ ki̱xi no̱o̱ Ndios, ta katakaa̱ ndaa ndó yi̱ꞌi̱ ñii no̱o̱ síkón. Ta saá kunda̱a̱ ini ndó yu kúu i̱. Ta ki̱vi̱ yóꞌo ndixa kunda̱a̱ ini ndó ndí nda̱ ñii chiño o̱n vása kísa ndivi matóꞌón i̱ ña, ta ni o̱n vása káꞌa̱n i̱ to̱ꞌon ña va̱xi kuiti si̱ni̱ mi̱i i̱. Ndasaá kuiti to̱ꞌon ña káꞌa̱n Yivá i̱ xíꞌin i̱, ñayóꞌo kúu ña káꞌa̱n i̱ xíꞌin ni̱vi.
29 Ta̱a ta̱ ti̱ꞌví yi̱ꞌi̱ va̱xi i̱, yóo ra xíꞌin i̱ ndiꞌi saá ki̱vi̱, ta nda̱ ñii ki̱vi̱ o̱n vása sándakoo matóꞌón ra yi̱ꞌi̱, chi ndiꞌi saá ki̱vi̱ kísa ndivi i̱ chiño ña kúsii̱ ini ra xíni ra ―káchí ta̱Jesús xíꞌin na.
30 Tá xíni̱ so̱ꞌo na ña ni̱ka̱ꞌa̱n ra, ta kua̱ꞌa̱ ní ni̱vi na ndóo yóꞌo ka̱ndixa na ra.
To̱ꞌon yóꞌo káꞌa̱n ña ndí ña ndixa nda̱a̱ ndinoꞌo kúu ña sáña ni̱vi ko̱ꞌo̱n ndíka̱ na no̱o̱ ña o̱n váꞌa
31 Ta saá ni̱ka̱ꞌa̱n ta̱Jesús xíꞌin najudío na xa ka̱ndixa ñaꞌá:
―Ta ndóꞌó, tá ñii ñii ki̱vi̱ va̱xi chikaa̱ so̱ꞌo ndó to̱ꞌon i̱, ta kasa ndivi ndó to̱ꞌon ña sánáꞌa i̱ ndóꞌó, ta saá kuu ndó ni̱vi na ndinoꞌo ini ndíko̱n ndó yi̱ꞌi̱.
32 Ta saá koni̱ va̱ꞌa ndó yu kúu ña ndixa nda̱a̱ ndinoꞌo, ta ñanda̱a̱ ndinoꞌo yóꞌo kúu ña saña ndó ña kuchiño ko̱ꞌo̱n ndíka̱ ndó ―káchí ta̱Jesús xíꞌin na.
33 Ta nda̱kuii̱n na, ni̱ka̱ꞌa̱n na, káchí na saá:
―Ndi̱ꞌi̱ kúu ndi̱ sa̱ꞌya ñani síkuá ta̱Abraham, ta nda̱ ñii ki̱vi̱ o̱n vása ní‑xikuu ndi̱ namozo na o̱n vása kómí nda̱yí sandakoo na chiño ña kísa chiño na no̱o̱ napatrón na. ¿Nda̱chun káꞌa̱n ún xíꞌin ndi̱ ñii ki̱vi̱ va̱xi sa̱ña̱ ndi̱ ko̱ꞌo̱n ndíka̱ ndi̱?
34 Ta nda̱kuii̱n ta̱Jesús, ni̱ka̱ꞌa̱n ra xíꞌin na:
―Ña ndixa nda̱a̱ kúu to̱ꞌon káꞌa̱n i̱ xíꞌin ndó: Ndiꞌi ni̱vi na kéꞌé ña o̱n váꞌa, nayóꞌo yóo na nda̱tán yóo namozo na kísa chiño no̱o̱ ña o̱n váꞌa, chi ña o̱n váꞌa yóꞌo kúu ña xáꞌnda chiño no̱o̱ na.
35 Nda̱ ñii ni̱vi na ndasaá kuiti kísa chiño no̱o̱ ta̱káꞌno, o̱n vása kómí nayóꞌo nda̱yí kutaku̱ na veꞌe ta̱káꞌno ndiꞌi saá ki̱vi̱ ña va̱xi. Ta ta̱a ta̱ kúu sa̱ꞌya mi̱i ta̱káꞌno xíꞌin veꞌe, ndixa kómí ta̱yóꞌo nda̱yí kutaku̱ ra veꞌe yivá ra ndiꞌi saá ki̱vi̱.
36 Ta saá ndixa tá Sa̱ꞌya mi̱i Ta̱a ta̱Káꞌno kúu ta̱a ta̱ saña ndóꞌó ko̱ꞌo̱n ndíka̱ ndó no̱o̱ ña o̱n váꞌa, ta mi̱i ña ndixa nda̱a̱ ko̱ꞌo̱n ndíka̱ ndó, ta ña o̱n váꞌa o̱n kukomí ka̱ ña nda̱yí kaꞌnda chiño ña no̱o̱ ndó.
37 Xíni̱ va̱ꞌa i̱ ndóꞌó kúu ndó sa̱ꞌya ñani síkuá ta̱Abraham. Ta saá ni, kóni ndó kaꞌni ndó yi̱ꞌi̱, chi o̱n xi̱in ndó nakiꞌin va̱ꞌa ndó to̱ꞌon i̱ ña kutaku̱ ña ini ndó.
38 Yi̱ꞌi̱ káꞌa̱n i̱ xíꞌin ndó ndasaá kuiti ña xi̱ni i̱ ta xi̱ni̱ so̱ꞌo i̱ no̱o̱ ni̱xi̱yo i̱ xíꞌin Yivá i̱. Ta ndóꞌó, kéꞌé ndó ndasaá kuiti ña xíni̱ so̱ꞌo ndó káꞌa̱n yivá ndó xíꞌin ndó ―káchí ta̱Jesús xíꞌin na.
To̱ꞌon yóꞌo káꞌa̱n yu kúu yivá ni̱vi na o̱n xi̱in nakiꞌin ñanda̱a̱
39 Ta nda̱kuii̱n na, ni̱ka̱ꞌa̱n na xíꞌin ta̱Jesús:
―Ta̱Abraham kúu yivá ndi̱ ―káchí na xíꞌin ra.
Ta ni̱ka̱ꞌa̱n ta̱Jesús xíꞌin na:
―Tá sa̱ꞌya ndinoꞌo ta̱Abraham kúu ndó, ta saá ko̱ꞌo̱n ndó kundiko̱n ndó yichi̱ ra, níkúu.
40 Ta ndóꞌó, o̱n vása ndíko̱n ndó yichi̱ ta̱Abraham, chi kóni ndó kaꞌni ndó yi̱ꞌi̱, ta yi̱ꞌi̱ kúu ta̱a ta̱ káꞌa̱n to̱ꞌon ña nda̱a̱, ña kúu to̱ꞌon ña xi̱ni̱ so̱ꞌo i̱ ni̱ka̱ꞌa̱n Ndios xíꞌin i̱. Ta ta̱Abraham, o̱n vása ní‑keꞌé ra nda̱tán kéꞌé ndó vitin.
41 Ta ndóꞌó, kéꞌé ndó nda̱tán yóo ña kéꞌé mi̱i yivá ndó ―káchí ra xíꞌin na.
―O̱n si̱ví sa̱ꞌya sáká kúu ndi̱. Chi xíni̱ ndi̱ ñii la̱á kúu yivá ndi̱, ta̱ kúu Ndios ―káchí na xíꞌin ra.
42 Ta ni̱ka̱ꞌa̱n ta̱Jesús xíꞌin na:
―Tá ndixa Ndios kúu yivá ndó, ta saá kukiꞌvi ini ndó koni ndó yi̱ꞌi̱, chi yi̱ꞌi̱ ke̱e i̱ no̱o̱ Ndios, ta ki̱xaa̱ i̱ yóo i̱ yóꞌo vitin. Ta o̱n vása ní‑kixaa̱ i̱ xíꞌin nda̱yí mi̱i i̱, ta xíꞌin nda̱yí Ndios ki̱xaa̱ i̱, chi Ndios kúu ta̱a ta̱ ti̱ꞌví yi̱ꞌi̱ va̱xi i̱.
43 ¿Nda̱chun o̱n vása kúnda̱a̱ ini ndó to̱ꞌon ña káꞌa̱n i̱ xíꞌin ndó? O̱n vása kúchiño ndó kunda̱a̱ ini ndó chi o̱n xi̱in ndó chikaa̱ so̱ꞌo ndó to̱ꞌon i̱.
44 Saá chi yivá ndó kúu ñaníma̱ ndiva̱ꞌa káꞌno, ta ndóꞌó kóni ndó kasa ndivi ndó ña o̱n váꞌa ña sakusii̱ ndó ini yivá ndó. Ta̱nda̱ ki̱xáꞌá ki̱vi̱ no̱ó ta̱nda̱ vitin ñaníma̱ ndiva̱ꞌa káꞌno yóꞌo kúu ña xáꞌni ni̱vi. Ta ñandiva̱ꞌa káꞌno yóꞌo, nda̱ loꞌo o̱n vása ndíko̱n ña yichi̱ nda̱a̱, saá chi nda̱ loꞌo o̱n vása yóo ña ndixa nda̱a̱ ini ña. To̱ꞌon ña vatá káꞌa̱n ña kúu to̱ꞌon ña káku ini mi̱i ña, chi ndixa nina ñavatá kuiti kúu ñaníma̱ ndiva̱ꞌa káꞌno, ta kúu ña yivá ndiꞌi ñavatá.
45 Ta yi̱ꞌi̱, káꞌa̱n i̱ ñanda̱a̱ xíꞌin ndó, ta xa̱ꞌa̱ ñayóꞌo, o̱n xi̱in ndó kandixa ndó yi̱ꞌi̱.
46 ¿Án yóo ñii ndóꞌó na kúchiño naníꞌi ndó ta kasa nda̱a̱ ndó xa̱ꞌa̱ ñii ña o̱n váꞌa ke̱ꞌé i̱? Tá to̱ꞌon ña ndixa nda̱a̱ kúu ña káꞌa̱n i̱ xíꞌin ndó, ta saá, ¿nda̱chun o̱n xi̱in ndó kandixa ndó to̱ꞌon káꞌa̱n i̱?
47 Ndiꞌi ni̱vi na kúu sa̱ꞌya ndinoꞌo Ndios chíkaa̱ so̱ꞌo na to̱ꞌon ña káꞌa̱n ra. Ta ndóꞌó, o̱n si̱ví sa̱ꞌya Ndios kúu ndó, ña̱kán o̱n vása chíkaa̱ so̱ꞌo ndó to̱ꞌon ña káꞌa̱n Ndios ―káchí ta̱Jesús xíꞌin na.
To̱ꞌon yóꞌo káꞌa̱n ña ndí o̱n ta̱ꞌán ka̱ kaku ta̱Abraham
ta xa yóo ta̱Jesús
48 Ta nda̱kuii̱n sava najudío, ni̱ka̱ꞌa̱n na xíꞌin ta̱Jesús, káchí na saá:
―¿Án o̱n si̱ví ndixa yóꞌó kúu ún ta̱ñoo Samaria? ¿Án o̱n si̱ví ndixa kúu ún ta̱a ta̱ kómí ñii ñaníma̱ ndiva̱ꞌa ña sáka ní si̱ni̱ ún?
49 Ta nda̱kuii̱n ta̱Jesús, ni̱ka̱ꞌa̱n ra xíꞌin na:
―O̱n ko̱ó níma̱ ndiva̱ꞌa kómí i̱, ta ndixa kísa to̱ꞌó i̱ Yivá i̱ Ndios. Ta ndóꞌó, nda̱ loꞌo o̱n vása kísa to̱ꞌó ndó yi̱ꞌi̱.
50 Ta o̱n vása ndúkú i̱ ña kasa káꞌno ni̱vi yi̱ꞌi̱. Ta saá ni, yóo inka̱ Ta̱a ta̱Káꞌno, ta ta̱yóꞌo kúu ta̱ ndúkú ña kasa káꞌno ni̱vi yi̱ꞌi̱, ta mi̱i ra kúu ta̱ kísa nani xa̱ꞌa̱ kua̱chi xíꞌin ñanda̱a̱.
51 Ña ndixa nda̱a̱ káꞌa̱n i̱ ndí ndiꞌi ni̱vi na chíkaa̱ so̱ꞌo to̱ꞌon ña sánáꞌa i̱, o̱n kivi̱ nayóꞌo, ta kutaku̱ na ndiꞌi saá ki̱vi̱ va̱xi ―káchí ta̱Jesús xíꞌin na.
52 Ta saá najudío ni̱ka̱ꞌa̱n na xíꞌin ra, káchí na saá:
―Vitin xíni̱ va̱ꞌa ndi̱ ndí ndixa kómí ún níma̱ ndiva̱ꞌa, chi nina to̱ꞌon sána káꞌa̱n ún. Saá chi mi̱i ta̱xi̱i̱ síkuá yó ta̱Abraham xíꞌin ndiꞌi inka̱ naprofeta na ni̱ka̱ꞌa̱n to̱ꞌon Ndios xi̱na̱ꞌá, nayóꞌo ni̱xiꞌi̱ ndiꞌi na. Ta yóꞌó, káchí ún ña táná chikaa̱ so̱ꞌo ni̱vi to̱ꞌon ña sánáꞌa ún, ta nda̱ ñii ki̱vi̱ o̱n kivi̱ na.
53 ¿Án xáni si̱ni̱ ún kúu ún ta̱ káꞌno ka̱ no̱o̱ ta̱Abraham, xi̱i̱ síkuá yó? ¿Án xáni si̱ni̱ ún kúu ún ta̱ káꞌno ka̱ no̱o̱ inka̱ naprofeta? Ndiꞌi nayóꞌo, xa ni̱xiꞌi̱ na. ¿Yu kúu yóꞌó, ña̱kán kísa káꞌno xíꞌin mi̱i ún? ―káchí na xíꞌin ra.
54 Ta nda̱kuii̱n ta̱Jesús, ni̱ka̱ꞌa̱n ra xíꞌin na:
―Ta yi̱ꞌi̱, táná kasa káꞌno xíꞌin mi̱i i̱, ta o̱n vása ndáya̱ꞌví ña kéꞌé i̱ saá. Ta Yivá i̱ kúu ta̱a ta̱ kísa káꞌno yi̱ꞌi̱, ta Yivá i̱ yóꞌo kúu Ndios ta̱a ta̱ kísa káꞌno ndó, káchí ndó.
55 Ta ndóꞌó, o̱n vása xíni̱ ndó Yivá i̱ Ndios, ta yi̱ꞌi̱ xíni̱ va̱ꞌa i̱ ra. Chi tá yi̱ꞌi̱ ná ka̱ꞌa̱n i̱ o̱n vása xíni̱ i̱ ra, ta kuu i̱ ñii ta̱a ta̱ káꞌa̱n to̱ꞌon vatá kuiti, ñii ki̱ꞌva nda̱tán yóo mi̱i ndó káꞌa̱n ndó nina to̱ꞌon vatá. Ta ña ndixa nda̱a̱ kúu ña xíni̱ va̱ꞌa i̱ Yivá i̱ Ndios ta chíkaa̱ so̱ꞌo i̱ to̱ꞌon káꞌa̱n ra.
56 Kui̱ya̱ xi̱na̱ꞌá ta̱xi̱i̱ síkuá ndó ta̱Abraham kúsii̱ ní ini ra xa̱ꞌa̱ ña ni̱ka̱ꞌa̱n Ndios xíꞌin ra ndí koto ra ña kixaa̱ i̱ ñoyívi yóꞌo. Ta saá ndixa xi̱ni ta̱Abraham ki̱xaa̱ i̱ ñoyívi yóꞌo, ta ku̱sii̱ ní ini ra xi̱ni ra ñayóꞌo ―káchí ta̱Jesús xíꞌin na.
57 Ta ni̱ka̱ꞌa̱n najudío xíꞌin ta̱Jesús, káchí na saá:
―Ni o̱n ta̱ꞌán kukomí ún o̱vi̱ si̱ko̱ u̱xu̱ kui̱ya̱, ta káꞌa̱n ún xa xi̱ni ún ta̱Abraham. ¿Ndasaá kuchiño kandixa ndi̱ ña káꞌa̱n ún? ―káchí na xíꞌin ra.
58 Ta nda̱kuii̱n ta̱Jesús, ni̱ka̱ꞌa̱n ra xíꞌin na:
―Ña ndixa nda̱a̱ káꞌa̱n i̱ xíꞌin ndó ndí ki̱vi̱ o̱n ta̱ꞌán ka̱ kaku ta̱Abraham, xa yóo i̱ ta xa táku̱ i̱ ―káchí ra.
59 Tá ndi̱ꞌi xi̱ni̱ so̱ꞌo na to̱ꞌon yóꞌo, ta ni̱saa̱ ní ka̱ ini na xi̱ni na ta̱Jesús, ta ki̱xáꞌá na tíin na yu̱u̱, ña kóni na koon na yu̱u̱ ra ña kaꞌni na ra. Ta ta̱Jesús ni̱ki̱ꞌvi ra ma̱ꞌñó ni̱vi, ta ni̱‑kuchiño na koni ka̱ na ra, ta ke̱e ra veꞌe ño̱ꞌo káꞌno kua̱ꞌa̱n ra.