14
Ñayóꞌo káꞌa̱n xa̱ꞌa̱ ña káꞌa̱n táꞌan ni̱vi tiin na ta̱Jesús
(Mt. 26:1-5; Lc. 22:1-2; Jn. 11:45-53)
1 Ta kúma̱ni̱ o̱vi̱ ki̱vi̱ ña to̱nda̱a ki̱vi̱ kana viko̱ Pascua, xíꞌin inka̱ viko̱ no̱o̱ xíxi najudío si̱ta̱ va̱ꞌa ña o̱n ko̱ó levadura kómí. Ta na sánáꞌa nda̱yí Ndios xíꞌin nanáꞌno no̱o̱ nasu̱tu̱ ndúkú na ndasaá koo kasa va̱ꞌa na kua̱chi vatá xa̱ꞌa̱ ta̱Jesús, ta tiin na ra ña kaꞌni ñaꞌá na.
2 Ta ni̱ka̱ꞌa̱n na, káchí na saá:
―O̱n kuchiño tiin yó ra ki̱vi̱ viko̱, ko̱to̱ koni ndiꞌi nani̱vi ñoo yóꞌo, ta si̱so̱ na nda̱ꞌyi na, ta kani táꞌan na, ta koo ní kua̱chi ―káchí na.
Ñayóꞌo káꞌa̱n xa̱ꞌa̱ ñii ñaꞌa̱ ki̱vi̱ chi̱kaa̱ ñá
nduta̱ támi xáꞌan si̱ni̱ ta̱Jesús
(Mt. 26:6-13; Jn. 12:1-8)
3 Ta yóo ta̱Jesús ñoo Betania veꞌe ta̱Simón, ta̱ xi̱komí kue̱ꞌe̱ táꞌyí na̱ní ña lepra. Tá yóo ta̱Jesús xíxi ra no̱o̱ mesa, ta ki̱xaa̱ yatin ñii ñaꞌa̱ níꞌi ñá ñii yu̱yu̱ ña ku̱va̱ꞌa xíꞌin yu̱u̱ na̱ní alabastro, ti̱xin ña ñóꞌo nduta̱ tá xáꞌan támi ní, tá ku̱va̱ꞌa xíꞌin yu̱ku̱ nardo kúu rá, ta nduta̱ yóꞌo kúu tá yáꞌví ní. Ta ni̱xaꞌno ñá si̱ko̱n yu̱yu̱ yóꞌo ta chi̱kaa̱ ndiꞌi ñá rá si̱ni̱ ta̱Jesús.
4 Ta sava na ndóo ni̱saa̱ ní na xíni ñaꞌá na, ta ni̱ka̱ꞌa̱n na xíꞌin táꞌan na:
―¿Nda̱chun sa̱ndiꞌi ñaꞌa̱ yóꞌo xa̱ꞌa̱ nduta̱ yáꞌví ní?
5 Va̱ꞌa ka̱ ná si̱kó ñá nduta̱ yóꞌo ta u̱ni̱ ciento si̱ꞌún denario nakiꞌin ñá, níkúu, ta saá kuchiño chindeé ñá nandáꞌví ―káchí na, káꞌa̱n na.
Ta káꞌa̱n na to̱ꞌon o̱n váꞌa xíꞌin ñá.
6 Ta ta̱Jesús ni̱ka̱ꞌa̱n ra xíꞌin na:
―O̱n ka̱ꞌa̱n ndó to̱ꞌon kuáchí xíꞌin ñáñaꞌa̱ yóꞌo. ¿Nda̱chun sándiꞌi ndó ñá? Chi ñava̱ꞌa kúu ña ke̱ꞌé ñá xíꞌin i̱.
7 Ndiꞌi saá ki̱vi̱ yóo nandáꞌví xíꞌin ndó ta kúchiño chindeé ndó na. Ta yi̱ꞌi̱, saloꞌo ní ka̱ ki̱vi̱ yóo i̱ xíꞌin ndó.
8 Ñáñaꞌa̱ yóꞌo ke̱ꞌé ñá ñava̱ꞌa, chi̱kaa̱ ñá nduta̱ tá xáꞌan támi si̱ni̱ i̱ ña ki̱sa tiꞌva ñá yi̱kí ko̱ñu i̱ ña ndu̱xu̱n ña.
9 Ndixa káꞌa̱n i̱ xíꞌin ndó, ndiꞌi saá xiiña ñoyívi yóꞌo no̱o̱ ka̱ꞌa̱n ndoso na to̱ꞌon ñava̱ꞌa xa̱ꞌa̱ i̱, ndato̱ꞌon na xíꞌin ni̱vi yukía̱ ke̱ꞌé ñáyóꞌo. Ta saá nakáꞌán ni̱vi xa̱ꞌa̱ ñava̱ꞌa ke̱ꞌé ñá xíꞌin i̱ ―káchí ta̱Jesús xíꞌin na.
Ñayóꞌo káꞌa̱n xa̱ꞌa̱ ta̱Judas ndasaá ki̱ndo̱o ra xíꞌin nanáꞌno ña nataxi ra ta̱Jesús ndaꞌa̱ na
(Mt. 26:14-16; Lc. 22:3-6)
10 Ta saá ta̱Judas Iscariote, ta̱ kúu ñii ta̱a ta̱ u̱xu̱ o̱vi̱ xíka xíꞌin ta̱Jesús, ke̱e ra ni̱xa̱ꞌa̱n ra no̱o̱ nanáꞌno no̱o̱ nasu̱tu̱ ña nataxi ra ta̱Jesús ndaꞌa̱ na.
11 Ta ku̱sii̱ ní ini na xi̱ni̱ so̱ꞌo na ña ni̱ka̱ꞌa̱n ta̱Judas xíꞌin na, ta nayóꞌo ni̱ka̱ꞌa̱n na xíꞌin ra:
―Tá nataxi ún ra ndaꞌa̱ ndi̱, ta taxaꞌvi ndi̱ yóꞌó ―káchí na.
Ta saá ki̱xáꞌá ndúkú ta̱Judas ndasaá koo nataxi ra ta̱Jesús ndaꞌa̱ na.
Ñayóꞌo káꞌa̱n xa kua̱ꞌa̱n kuñoó
ta xi̱xi ta̱Jesús xíꞌin naxíka xíꞌin ra
(Mt. 26:17-29; Lc. 22:7-23; Jn. 13:21-30; 1 Co. 11:23-26)
12 Ta ni̱to̱nda̱a ki̱vi̱ ki̱xáꞌá viko̱ xíxi najudío si̱ta̱ va̱ꞌa ña o̱n ko̱ó levadura kómí, ta ñii ñii veꞌe na, xáꞌni na ndikachi loꞌo ña nákáꞌán na viko̱ Pascua. Ta naxíka xíꞌin ta̱Jesús ni̱nda̱ka̱ to̱ꞌon na ra:
―¿Míkía̱ kóni ún kasa ndivi ndi̱ ña kuxu yó viko̱ Pascua? ―káchí na.
13 Ta saá ti̱ꞌví ta̱Jesús o̱vi̱ naxíka xíꞌin ra, káchí ra saá xíꞌin na:
―Kua̱ꞌa̱n ndó, ta kua̱ꞌa̱n ki̱ꞌvi ndó ñoo Jerusalén, ta nakutáꞌan ndó xíꞌin ñii ta̱a ndíso ki̱si takuií, ta kundiko̱n ndó ko̱ꞌo̱n ndó sa̱ta̱ ra,
14 ta veꞌe no̱o̱ ki̱ꞌvi ra, ka̱ꞌa̱n ndó xíꞌin ta̱a ta̱ xíꞌin veꞌe yóꞌo: “Ta̱Maestro ti̱ꞌví ndi̱ꞌi̱ va̱xi ndi̱ nda̱ka̱ to̱ꞌon ndi̱ yóꞌó: ¿Míkía̱ yóo ñii cuarto veꞌe ún no̱o̱ kuxu ra viko̱ Pascua xíꞌin ndi̱ꞌi̱, naxíka xíꞌin ra?”, kachí ndó.
15 Ta saá ta̱a ta̱ xíꞌin veꞌe sanáꞌa ra ndóꞌó míkía̱ yóo ñii cuarto káꞌno veꞌe ra ña kánóo piso o̱vi̱, no̱o̱ yóo ndiꞌi ña xíni̱ ñóꞌó ndó. Ta veꞌe yóꞌo kasa ndivi ndó ña kuxu yó viko̱ Pascua ―káchí ta̱Jesús xíꞌin na.
16 Ta o̱vi̱ naxíka xíꞌin ra ke̱e na kua̱ꞌa̱n na, ta ni̱ki̱ꞌvi na ñoo Jerusalén, ta na̱níꞌi na nda̱tán yóo ña ni̱ka̱ꞌa̱n ta̱Jesús xíꞌin na, ta ki̱sa ndivi na ña kuxu na viko̱ Pascua.
17 Tá kua̱ꞌa̱n kuñoó, ki̱xaa̱ ta̱Jesús xíꞌin u̱xu̱ o̱vi̱ naxíka xíꞌin ra.
18 Ta ndóo na xíxi na no̱o̱ mesa, ta ni̱ka̱ꞌa̱n ta̱Jesús xíꞌin na:
―Ndixa káꞌa̱n i̱ xíꞌin ndó, ñii ndóꞌó na xíxi xíꞌin i̱ kúu ta̱a ta̱ si̱kó kuíꞌná yi̱ꞌi̱, ta nataxi ra yi̱ꞌi̱ ndaꞌa̱ ni̱vi na sáa̱ ini xíni yi̱ꞌi̱ ―káchí ra.
19 Ta ki̱xáꞌá nayóꞌo kúchuchú ní ini na, ta ñii ñii na ni̱nda̱ka̱ to̱ꞌon na ta̱Jesús:
―Tata, ¿án yi̱ꞌi̱ kúu ta̱ káꞌa̱n ún xa̱ꞌa̱?
Ta inka̱ na ni̱ka̱ꞌa̱n:
―¿Án yi̱ꞌi̱ kúu ra?
20 Ta nda̱kuii̱n ta̱Jesús, káchí ra xíꞌin na:
―Ñii ndóꞌó ta̱ u̱xu̱ o̱vi̱ kúu ra, ta̱ sáchii si̱ta̱ va̱ꞌa ini ko̱ꞌo̱ xíꞌin i̱, ta̱yóꞌo kúu ta̱ si̱kó kuíꞌná yi̱ꞌi̱ no̱o̱ na sáa̱ ini xíni yi̱ꞌi̱.
21 Ta yi̱ꞌi̱, ta̱a ta̱ ki̱xi no̱o̱ Ndios, ndixa xo̱ꞌvi̱ ní i̱ ta kivi̱ i̱, nda̱tán ni̱taa naprofeta xi̱na̱ꞌá. Ta, ¡ndáꞌví ní ta̱a ta̱ si̱kó kuíꞌná yi̱ꞌi̱ no̱o̱ na sáa̱ ini xíni yi̱ꞌi̱! Va̱ꞌa ka̱ níxi̱yo o̱n kaku ta̱yóꞌo, níkúu ―káchí ta̱Jesús xíꞌin na.
22 Tá ndóo ka̱ na xíxi na, ta̱Jesús ki̱ꞌin ra si̱ta̱ va̱ꞌa, ta ni̱ka̱ꞌa̱n ra xíꞌin Ndios:
―Tata Yivá yó, táxaꞌvi ún chi ta̱xi ún si̱ta̱ va̱ꞌa kuxu ndi̱ ―káchí ra.
Ta ta̱ꞌví ra si̱ta̱ va̱ꞌa, ta ta̱xi ra ña ndaꞌa̱ ñii ñii naxíka xíꞌin ra kuxu na. Ta ni̱ka̱ꞌa̱n ra xíꞌin na:
―Nakiꞌin ndó kuxu ndó si̱ta̱ va̱ꞌa yóꞌo, chi ñayóꞌo kúu yi̱kí ko̱ñu i̱.
23 Ta ki̱ꞌin ta̱Jesús ñii copa ña ñóꞌo nduta̱ vino, ta ni̱ka̱ꞌa̱n ra xíꞌin Ndios:
―Tata Yivá yó, táxaꞌvi ún chi ta̱xi ún nduta̱ koꞌo ndi̱ yóꞌo ―káchí ra.
Ta ta̱xi ra copa ñóꞌo nduta̱ vino yóꞌo ndaꞌa̱ na, ta ndiꞌi na xíꞌi na rá,
24 ta ni̱ka̱ꞌa̱n ra saá xíꞌin na:
―Nduta̱ yóꞌo kúu ni̱i̱ i̱ ña kui̱ta̱. Ta xíꞌin ñayóꞌo Ndios chindúꞌu̱ ra pacto xa̱á ña ka̱ꞌa̱n ndasaá kuchiño nakiꞌin ni̱vi ñava̱ꞌa Ndios.
25 Ndixa káꞌa̱n i̱ xíꞌin ndó, o̱n koꞌo ka̱ i̱ nduta̱ vino nda̱ ki̱xaa̱ ki̱vi̱ nakutáꞌan yó no̱o̱ xáꞌnda chiño Ndios. Ta saá koꞌo yó tánduta̱ vino xa̱á ―káchí ta̱Jesús xíꞌin na.
Ñayóꞌo káꞌa̱n xa̱ꞌa̱ ta̱Jesús, káꞌa̱n ra ndí ta̱Pedro ka̱ꞌa̱n ra
o̱n vása xíni̱ ñaꞌá ra
(Mt. 26:30-35; Lc. 22:31-34; Jn. 13:36-38)
26 Ta ndi̱ꞌi xi̱ta na ñii yaa ña káꞌa̱n xa̱ꞌa̱ Ndios, ta ke̱e na kua̱ꞌa̱n na xi̱ki̱ tón Olivo.
27 Ta ni̱ka̱ꞌa̱n ta̱Jesús xíꞌin na:
―Ñoó vitin ndiꞌi ndóꞌó sandakoo ndó yi̱ꞌi̱, chi saá kundivi to̱ꞌon Ndios ña ni̱taa na xi̱na̱ꞌá, ña káchí saá: “Satakuéꞌe̱ i̱ ta̱a ta̱ ndáa tíndikachi, ta tíndikachi yóꞌo kui̱ta̱ níꞌnó ndiꞌi rí”, ka̱chí Ndios.
28 Ta ki̱vi̱ nataku̱ i̱, ko̱ꞌo̱n siꞌna i̱ ña kundati i̱ ndóꞌó ñoo estado Galilea ―káchí ta̱Jesús xíꞌin na.
29 Ta ta̱Pedro ni̱ka̱ꞌa̱n ra xíꞌin ta̱Jesús:
―Tata, tá ndiꞌi ni̱vi sandakoo na yóꞌó, ta yi̱ꞌi̱ o̱n sandakoo i̱ yóꞌó.
30 Ta ni̱ka̱ꞌa̱n ta̱Jesús xíꞌin ra:
―Ndixa káꞌa̱n i̱ xíꞌin ún, ta̱ꞌán ka̱ kana nduxú chée o̱vi̱ yichi̱ ñoó vitin, ta xa u̱ni̱ yichi̱ ni̱ka̱ꞌa̱n ún xíꞌin ni̱vi ña o̱n vása xíni̱ ún yi̱ꞌi̱ ―káchí ta̱Jesús xíꞌin ra.
31 Ta xíꞌin ndiꞌi ndee̱ ra ni̱ka̱ꞌa̱n ta̱Pedro, káchí ra saá:
―Tata, ta̱nda̱ xíni̱ ñóꞌó kivi̱ i̱ xíꞌin ún, ta nda̱ ñii yichi̱ o̱n vása ka̱ꞌa̱n i̱ o̱n vása xíni̱ i̱ yóꞌó ―káchí ta̱Pedro.
Ta ñii káchí saá ni̱ka̱ꞌa̱n ndiꞌi ka̱ naxíka xíꞌin ta̱Jesús.
Ñayóꞌo káꞌa̱n xa̱ꞌa̱ ta̱Jesús ña kúchuchú ní ini ra
káꞌa̱n ra xíꞌin Ndios
(Mt. 26:36-46; Lc. 22:39-46)
32 Ta ni̱xaa̱ na ñii no̱o̱ na̱ní Getsemaní, ta ni̱ka̱ꞌa̱n ta̱Jesús xíꞌin naxíka xíꞌin ra:
―Kundo̱o ndó yóꞌo táná ko̱ꞌo̱n i̱ ka̱ꞌa̱n i̱ xíꞌin Ndios ―káchí ra.
33 Ta ni̱ka̱ꞌa̱n ra xíꞌin ta̱Pedro ta xíꞌin ta̱Jacobo xíꞌin ta̱Juan, kua̱ꞌa̱n na xíꞌin ra ta ni̱xaa̱ na, ta ki̱xáꞌá ta̱Jesús kúchuchú ní ini ra ta ndíꞌi ní ini ra.
34 Ta ni̱ka̱ꞌa̱n ra xíꞌin u̱ni̱ ta̱yóꞌo:
―Ndeé ní kúchuchú ini i̱ a̱nda̱ ñii kóni ña kivi̱ i̱. Kundati ndó yóꞌo ta kundito ndó, o̱n ku̱su̱n ndó ―káchí ta̱Jesús xíꞌin na.
35 Ta ta̱Jesús ke̱e ra kua̱ꞌa̱n ra ñii xiiña xíká ka̱ loꞌo, ta xi̱kuxítí ra ta xi̱kundee ra nda̱ no̱o̱ ñoꞌo̱, ndu̱kú ra no̱o̱ Ndios, tá kúchiño ví, ta o̱n taxi Ndios xo̱ꞌvi̱ ra.
36 Ta káchí ra xíꞌin Ndios saá:
―Tata Yivá mi̱i i̱, xíni̱ va̱ꞌa i̱ yóꞌó kúchiño kasa ndivi ún ndiꞌi saá ña̱ꞌa. Ta ña kóni i̱ kúu ña o̱n taxi ún ña xo̱ꞌvi̱ i̱. Ta saá ni, o̱n kundivi ña kóni mi̱i i̱, ta va̱ꞌa ka̱ ná kundivi ña kóni mi̱i ún ―káchí ta̱Jesús xíꞌin Ndios.
37 Ta saá na̱kundichi ra, ta ndi̱kó ra ki̱xaa̱ ra no̱o̱ ndóo u̱ni̱ naxíka xíꞌin ra. Ta ndiꞌi nayóꞌo kísi̱n na. Ta ta̱Jesús ni̱ka̱ꞌa̱n ra xíꞌin ta̱Pedro:
―¿Án kísi̱n ún? ¿Án o̱n vása kúchiño ún kundito ún vará ñii hora?
38 Ta ni̱ka̱ꞌa̱n ra xíꞌin u̱ni̱ naxíka xíꞌin ra:
―O̱n ku̱su̱n ka̱ ndó ta kundito ndó ka̱ꞌa̱n ndó xíꞌin Ndios ña o̱n nakava ndó kua̱chi. Ndóꞌó, yóo ini ndó keꞌé ndó ñava̱ꞌa, ta o̱n kúchiño ndó keꞌé ndó ñava̱ꞌa yóꞌo xíꞌin ndee̱ mi̱i ndó ―káchí ta̱Jesús xíꞌin na.
39 Ta tuku ndi̱kó ta̱Jesús kua̱ꞌa̱n ra, ta ni̱ka̱ꞌa̱n ra xíꞌin Ndios nda̱tán yóo to̱ꞌon ña siꞌna ni̱ka̱ꞌa̱n ra.
40 Ta ndi̱kó tuku ra ki̱xaa̱ ra no̱o̱ ndóo naxíka xíꞌin ra, ta na̱níꞌi ra na kísi̱n na, saá chi ndeé ní xíꞌi̱ na maꞌná. Ta nayóꞌo o̱n vása xíni̱ na yukía̱ ka̱ꞌa̱n na xíꞌin ra.
41 Ta yichi̱ u̱ni̱ ni̱xa̱ꞌa̱n ra ta ni̱ka̱ꞌa̱n ra xíꞌin Ndios, ta ndi̱kó ra ki̱xaa̱ tuku ra no̱o̱ ndóo naxíka xíꞌin ra, ta ni̱ka̱ꞌa̱n ra xíꞌin na:
―¿Án va̱ꞌa ku̱su̱n ka̱ ndó ta nakindée ka̱ ndó? Koto ndó, xa ni̱to̱nda̱a hora ña nataxi na yi̱ꞌi̱, ta̱a ta̱ ki̱xi no̱o̱ Ndios, ndaꞌa̱ ni̱vi na o̱n váꞌa.
42 Ndakoo ndó, ná koꞌyo̱. Ta koto ndó, yóꞌo va̱xi ta̱ nataxi yi̱ꞌi̱ ndaꞌa̱ nani̱vi na sáa̱ ini xíni yi̱ꞌi̱ ―káchí ta̱Jesús.
Ñayóꞌo káꞌa̱n xa̱ꞌa̱ ndasaá ti̱in na ta̱Jesús
(Mt. 26:47-56; Lc. 22:47-53; Jn. 18:2-11)
43 Tá ta̱ꞌán ka̱ ndiꞌi ka̱ꞌa̱n ta̱Jesús xíꞌin na, ta ki̱xaa̱ ta̱Judas ta̱ kúu ñii ta̱ u̱xu̱ o̱vi̱ xíka xíꞌin ta̱Jesús. Ta ki̱xaa̱ kua̱ꞌa̱ ní ni̱vi xíꞌin ra, ta níꞌi na espada xíꞌin yito̱n. Naxi̱kua̱ꞌa̱ no̱o̱ najudío xíꞌin na sánáꞌa nda̱yí Ndios xíꞌin nanáꞌno no̱o̱ nasu̱tu̱ xa ti̱ꞌví na ni̱vi yóꞌo ña tiin na ta̱Jesús.
44 Ta ta̱Judas xa siꞌna ni̱ka̱ꞌa̱n ra xíꞌin na ndasaá nakoni na ta̱Jesús, káchí ra siꞌa:
―Ta̱a ta̱ chindeé i̱ xíꞌin ña chi̱to i̱ no̱o̱ kúu ta̱Jesús. Ta tiin ndó ra katón ndó ra ta ko̱ꞌo̱n ra xíꞌin ndó no̱o̱ nanáꞌno ―káchí ra xíꞌin na.
45 Ta saá ki̱xaa̱ ra, ta ni̱to̱nda̱a yatin ra no̱o̱ ta̱Jesús, ta ni̱ka̱ꞌa̱n ra:
―Kuaꞌa, Tata Maestro.
Ta ni̱chi̱to ra no̱o̱ ta̱Jesús.
46 Ta saá ni̱vi na yóo xíꞌin ta̱Judas xa̱ndi̱ko̱n ti̱in na ta̱Jesús.
47 Ta ñii ta̱ ndíko̱n sa̱ta̱ ta̱Jesús ta̱va ra espada, ta ka̱ndoso va̱ꞌa ra ñii so̱ꞌo ta̱ kísa chiño no̱o̱ ta̱káꞌno no̱o̱ nasu̱tu̱.
48 Ta ni̱ka̱ꞌa̱n ta̱Jesús xíꞌin ni̱vi na ti̱in ñaꞌá:
―¿Án xáni si̱ni̱ ndó ta̱kuíꞌná kúu i̱? ¿Nda̱chun va̱xi ndó no̱o̱ i̱ níꞌi ndó espada xíꞌin yito̱n ña tiin ndó yi̱ꞌi̱?
49 Ta yi̱ꞌi̱, ndiꞌi saá ki̱vi̱ ni̱xi̱yo i̱ sánáꞌa i̱ ni̱vi veꞌe ño̱ꞌo káꞌno, ta ni̱‑tiin ndó yi̱ꞌi̱. Ta ndiꞌi ñayóꞌo kundoꞌo i̱ vitin, chi saá xíni̱ ñóꞌó kundivi to̱ꞌon Ndios ña ni̱taa naprofeta ―káchí ta̱Jesús.
50 Ta ndiꞌi naxíka xíꞌin ra sa̱ndakoo na ta̱Jesús, ta xi̱no na kua̱ꞌa̱n na.
Ñayóꞌo káꞌa̱n xa̱ꞌa̱ ñii ta̱loꞌo ta̱ kua̱ꞌa̱n sa̱ta̱ ta̱Jesús
51 Ta ñii ta̱loꞌo ndíko̱n ra kua̱ꞌa̱n ra sa̱ta̱ ta̱Jesús, ta níꞌno ra ñii la̱á tiko̱to̱ ndíka̱ no̱o̱, ta ni̱vi ti̱in na ra,
52 ta ta̱yóꞌo sa̱ndakoo ra tiko̱to̱ ndíka̱ no̱o̱ ndaꞌa̱ na, ta ke̱e ra yálá ra xi̱no ra kua̱ꞌa̱n ra.
Ñayóꞌo káꞌa̱n xa̱ꞌa̱ ta̱Jesús ki̱vi̱ ki̱xaa̱ ra no̱o̱ nachiño
(Mt. 26:57-68; Lc. 22:54-55, 63-71; Jn. 18:12-14, 19-24)
53 Ta saá ni̱vi na ti̱in ta̱Jesús, ni̱xaa̱ ra xíꞌin na no̱o̱ ta̱káꞌno no̱o̱ nasu̱tu̱. Ta na̱kutáꞌan ndiꞌi naxi̱kua̱ꞌa̱ no̱o̱ najudío xíꞌin na sánáꞌa nda̱yí Ndios xíꞌin nanáꞌno no̱o̱ nasu̱tu̱.
54 Ta ta̱Pedro ñii xíká ndíko̱n ra kua̱ꞌa̱n ra sa̱ta̱ ta̱Jesús a̱nda̱ ni̱xaa̱ ra veꞌe ta̱su̱tu̱ káꞌno. Ta xi̱koo ra xíꞌin napolicía nasaa̱ ra yatin no̱o̱ xíxi̱ ñoꞌo̱ ke̱ꞌe veꞌe yóꞌo.
55 Ta nanáꞌno no̱o̱ nasu̱tu̱ xíꞌin ndiꞌi inka̱ nachiño na̱ní na Junta Suprema nándukú na ni̱vi na ka̱ꞌa̱n to̱ꞌon vatá ña kuva̱ꞌa kua̱chi xa̱ꞌa̱ ta̱Jesús, ta saá kuchiño nataxi na ra ndaꞌa̱ ni̱vi ña kaꞌni na ra, ta ni̱‑kuchiño naníꞌi na kua̱chi ra.
56 Chi kua̱ꞌa̱ ní ni̱vi ni̱ka̱ꞌa̱n na to̱ꞌon vatá xa̱ꞌa̱ ra, ta ña ni̱ka̱ꞌa̱n na o̱n vása ní‑nakutáꞌan to̱ꞌon na.
57 Sava na na̱kuita na ni̱ka̱ꞌa̱n na ñavatá xa̱ꞌa̱ ra, káchí na saá:
58 ―Ndi̱ꞌi̱ xi̱ni̱ so̱ꞌo ndi̱ ni̱ka̱ꞌa̱n ra, ka̱chí ra: “Yi̱ꞌi̱ sandiꞌi i̱ xa̱ꞌa̱ veꞌe ño̱ꞌo káꞌno yóꞌo ña ki̱sa va̱ꞌa ni̱vi, ta ti̱xin ña u̱ni̱ ki̱vi̱ kasa va̱ꞌa i̱ inka̱ veꞌe ño̱ꞌo ña o̱n si̱ví kuva̱ꞌa xíꞌin ndaꞌa̱ ni̱vi kuu ña”, ka̱chí ta̱Jesús ―káchí na.
59 Ta ni̱‑kuchiño nakutáꞌan to̱ꞌon ña ni̱ka̱ꞌa̱n na.
60 Ta ta̱káꞌno no̱o̱ nasu̱tu̱ na̱kundichi ra ma̱ꞌñó ndiꞌi na ndóo yóꞌo, ta ni̱nda̱ka̱ to̱ꞌon ra ta̱Jesús:
―¿Án o̱n vása ndákuii̱n ún yuꞌu̱ na? ¿Yukía̱ kachí ún xa̱ꞌa̱ to̱ꞌon ña káꞌa̱n nayóꞌo xa̱ꞌa̱ ún?
61 Ta ta̱Jesús tási̱ín yóo ra, o̱n vása ní‑ndakuii̱n ra nda̱ ñii to̱ꞌon. Ta ta̱káꞌno no̱o̱ nasu̱tu̱ tuku ni̱nda̱ka̱ to̱ꞌon ñaꞌá ra:
―¿Án Cristo ta̱ ti̱ꞌví Ndios kúu ún? ¿Án ndixa Sa̱ꞌya Ndios kúu ún? ―káchí ra.
62 Ta nda̱kuii̱n ta̱Jesús:
―Oon, yi̱ꞌi̱ kúu i̱. Ta ki̱vi̱ ña va̱xi koto ndó yi̱ꞌi̱, ta̱a ta̱ ki̱xi no̱o̱ Ndios, xa yóo i̱ no̱o̱ táyi̱ tón yóo sii̱n kuaꞌá Ndios, ta̱a ta̱ kómí ndiꞌi ndee̱, ta koni ndó yi̱ꞌi̱ ndikó i̱ ñoyívi yóꞌo, ta va̱xi i̱ ma̱ꞌñó vi̱ko̱ ―káchí ta̱Jesús.
63 Ta ta̱káꞌno no̱o̱ nasu̱tu̱ ndi̱ꞌi xi̱ni̱ so̱ꞌo ra ñayóꞌo, ta ni̱saa̱ ní ra, ta nda̱ta ra tiko̱to̱ mi̱i ra, ta ni̱ka̱ꞌa̱n ra:
―O̱n vása xíni̱ ñóꞌó ka̱ yó inka̱ ni̱vi taxi na kua̱chi xa̱ꞌa̱ ra.
64 Ndóꞌó xi̱ni̱ so̱ꞌo ndó ndí ni̱ka̱ꞌa̱n ra ñii kúu ra xíꞌin Ndios, ta ñii kua̱chi káꞌno ní no̱o̱ Ndios kúu ña ni̱ka̱ꞌa̱n ra saá. ¿Yukía̱ xáni ini ndó keꞌé yó xíꞌin ta̱yóꞌo? ―káchí ra xíꞌin nanáꞌno na kúu nachiño.
Ta ndiꞌi nayóꞌo ni̱ka̱ꞌa̱n na ndí yóo kua̱chi ra, ta xíni̱ ñóꞌó kivi̱ ra.
65 Ta sava na ki̱xáꞌá na kúndaa na tási̱i yuꞌu̱ na no̱o̱ ra, ta na̱kasi na no̱o̱ ra ta káni na ra xíꞌin yi̱kí ndaꞌa̱ na, ta káchí na saá:
―Tá ta̱profeta ta̱ xíni̱ va̱ꞌa kúu ún, ta saá ka̱ꞌa̱n ún xíꞌin ndi̱, ¿yukú ndi̱ ka̱ni yóꞌó? ―káchí na xíꞌin ra.
Ta napolicía xíꞌin xa̱ꞌnda̱ ndaꞌa̱ na ka̱ni na no̱o̱ ra.
Ñayóꞌo káꞌa̱n xa̱ꞌa̱ ta̱Pedro ki̱vi̱ ni̱ka̱ꞌa̱n ra u̱ni̱ yichi̱
o̱n vása xíni̱ ra ta̱Jesús
(Mt. 26:69-75; Lc. 22:56-62; Jn. 18:15-18, 25-27)
66 Ta yóo ta̱Pedro ke̱ꞌe veꞌe ta̱káꞌno no̱o̱ nasu̱tu̱, ta ki̱xaa̱ ñii ñaꞌa̱ ñá kísa chiño no̱o̱ naveꞌe yóꞌo.
67 Ta xi̱ni ñá ta̱Pedro yóo ra násaa̱ ra yatin no̱o̱ xíxi̱ ñoꞌo̱, ta xi̱to káxín ñá no̱o̱ ra, ta ni̱ka̱ꞌa̱n ñá xíꞌin ra:
―Saá tuku yóꞌó kúu ún ñii ta̱ ni̱xika xíꞌin ta̱Jesús, ta̱ ki̱xi ñoo Nazaret ―káchí ñá.
68 Ta ta̱Pedro ni̱ka̱ꞌa̱n ra, káchí ra saá:
―O̱n vása xíni̱ i̱ ta̱kaa̱, ni o̱n vása kúnda̱a̱ ini i̱ yukía̱ káꞌa̱n ún xíꞌin i̱.
Ta saá ke̱e ra yéꞌé ke̱ꞌe veꞌe yóꞌo. Ta ka̱na ñii nduxú chée.
69 Ta ñáñaꞌa̱ kísa chiño yóꞌo xi̱ni tuku ñá ra, ta ni̱ka̱ꞌa̱n ñá xíꞌin nani̱vi, káchí ña saá:
―Ta̱yóꞌo kúu ñii ta̱táꞌan ta̱Jesús ―káchí ñá.
70 Ta ta̱Pedro tuku ni̱ka̱ꞌa̱n ra:
―O̱n vása xíni̱ i̱ ta̱kaa̱ ―káchí ra.
Ta ni̱yaꞌa ñii káni̱ loꞌo, ta nani̱vi yíta yatin no̱o̱ ta̱Pedro, ta ni̱ka̱ꞌa̱n tuku na xíꞌin ra saá:
―Ndixa yóꞌó kúu ún ñii ta̱táꞌan ta̱Jesús, chi ki̱xi ún estado Galilea, saá chi nda̱tán káꞌa̱n nakán saá káꞌa̱n ún ―káchí na.
71 Ta ki̱xáꞌá ta̱Pedro xíꞌin ndiꞌi ndee̱ ra ni̱ka̱ꞌa̱n ra, káchí ra saá:
―Xa ni̱ka̱ꞌa̱n i̱ xíꞌin ndó, o̱n vása xíni̱ i̱ ta̱kaa̱. ¡Ndios ná saxo̱ꞌvi̱ ra yi̱ꞌi̱ tá ñavatá káꞌa̱n i̱! ―káchí ra.
72 Ta xa̱ndi̱ko̱n ka̱na nduxú chée yichi̱ o̱vi̱. Ta saá na̱káꞌán ta̱Pedro to̱ꞌon ña ni̱ka̱ꞌa̱n ta̱Jesús xíꞌin ra: “Ta̱ꞌán ka̱ kana nduxú chée o̱vi̱ yichi̱ ñoó vitin, ta xa u̱ni̱ yichi̱ ni̱ka̱ꞌa̱n ún xíꞌin ni̱vi ndí o̱n vása xíni̱ ún yi̱ꞌi̱.” Ta kúchuchú ní ini ta̱Pedro, ta ki̱xáꞌá ra ndeé ní xáku ra ña nákáꞌán ra to̱ꞌon yóꞌo.