3
1-3 Coo højts jaduhṉ nmädoyhajty coog hajxy hijty mjaanc̈h tehm̱ chaac̈hpøcy, mänítøch njaanc̈h tehm̱ jiootmayhajpøjcy jeꞌeguiøxp cooc̈h hänajty ngaꞌa najuøꞌøy pø mjøjtänaabiä møjcuꞌugong hajxy hänajty. Páadyhøc̈hä njoot hänajty jiaanc̈h tehm̱ chocy cooc̈h jim̱ nnǿcxät maa mijtsän, nmäyajtøwáam̱biøch mijts hänajty pø hoy hajxy hänajty mmeeꞌxtucy. Pero cab hänajty ñäbaadøꞌøwaꞌañ cooc̈h jim̱ nnǿcxät. Mänítøch jaduhṉ nwiinmahñdyhajty cooc̈hä hermano Timoteo jim̱ nguéxät nidiuhm̱, y cooc̈h jiiby nidiuhm̱ nmähmǿꞌøwät Atenas. Näguipxy højtsä hermano Timoteo xmiøødtuṉ̃ Diosmoonsä maa højtsä Diosmädiaꞌagy nyajwaꞌxiän jaꞌa Jesucristocøxpä. Páadyhøc̈hä hermano Timoteo jim̱ nguejxy maa mijtsän coo mijts jaduhṉ xjiootcapxmøcpǿgät maa hajxy hänajty mdsaac̈hpøquiän, weenä Diosmädiaꞌagy hajxy hänajty jaduhṉ maas hoy mmäbøcy hamuumduꞌjoot, møød ween hajxy hänajty jaduhṉ mgaꞌa jootmayhaty. Hix̱, jaꞌa Dios hajxy jaduhṉ tøø xyajnähdíjjäm coo hajxy jaduhṉ ndsaac̈hpǿjcämät jaꞌa Jesucristocøxpä. Tøyhajt jaduhṉ, túhm̱äts. Haa caꞌa, mänaa højts jim̱ nhoyyän maa mijtsän, mänit hajxy nhawáaṉäm coo hajxy hänajty tsipcøxp ndsaac̈hpøgáaṉäm. Jaduhṉ hajxy tøø njaanc̈h jajt tøø njaanc̈h habéjtäm, túhm̱äts. Hoorä, cooc̈h hänajty ngaꞌa najuøꞌøy pø hoyyä møjcuꞌugong hänajty mjøjtänaꞌay maa hajxy hänajty xjia wiꞌi jiøjcapxøꞌøyän, mänítøch jaduhṉ nja mänaaṉ̃ cooc̈h jim̱ nnǿcxät maa mijtsän. Pero coo hänajty quiaꞌa näbaadøꞌøwaꞌañ cooc̈h jim̱ nnǿcxät høøc̈h, páadyhøc̈hä hermano Timoteo jim̱ nguejxy, ween mijts jaduhṉ xmiäyajtøy pø hoyyä møjcuꞌugong hajxy hänajty tøø mjøjtänaꞌay, pø hoyyä Diosmädiaꞌagy hajxy hänajty mbanøcxyñä. Hix̱, ndsähgǿøbiøch hänajty coo jaꞌa møjcuꞌugong hajxy hänajty tøø xjiøjcapxøꞌøy. Coo hajxy häxøpy tøø mgaꞌa meeꞌxtucy, xiøøbä højts mijtsä Diosmädiaꞌagy häxøpy hoy tøø nyajwiingapxøꞌøy.
Coo jaꞌa Timoteo jim̱ jiaanc̈h hooyy maa mijtsän, mänit wyiimbíjcumbä. Hoy yaa miejtstägach maa højtsän. Mänit højts xyhawaaṉä coogä Diosmädiaꞌagy hajxy tehṉgajnä mmäbøcy hamuumduꞌjoot, møød coog hajxy hamiṉ̃ haxøpy mnic̈hogyii. Hoxiooṉdaacnä jaduhṉ. Jaduhṉä Timoteo miänaam̱bä cóogøch mijts hoy miänaajä xjiahmiejtstaꞌagy, møød cóogøch mijts xchocy xpiaꞌhäyoy. Jadúhṉägøch mijts xjia wiꞌi yhixaꞌañ nébiøch mijts nja wiꞌi yhixaꞌañän.
Mäguꞌughajpädøjc, coo højts jaduhṉ nmädoyhajty coogä Diosmädiaꞌagy hajxy hänajty tehṉgajnä mmäbøcy hamuumduꞌjoot, mänit højts njootcugøøyy, hoy højts hänajty hanax̱iä nja tsaac̈hpøcy, hoy højts hänajty møj may nyajmaajiaty. Paady højts jootcujc nnijiäwǿøyyänä coo mijtsä Diosmädiaꞌagy tehṉgajnä mbanøcxy hamuumduꞌjoot jaꞌa Jesucristocøxpä. Coo mijts jaduhṉ mmäbøcy tehṉgajnä, paady højts njaanc̈h tehm̱ xiooṉdaꞌagy Dioswiinduum, paady højtsä Dios hoy miänaajä nnämaꞌay “Dioscujúꞌuyäp.”
10-11 Xøømdsuhm̱ højtsä Diosteedy mbaꞌyaꞌaxy møødä Wiindsǿṉ Jesucristo. Jaduhṉ højts nmänuuꞌxtaꞌagy hamuumduꞌjoot coo hajxy ween yajnäbaadøꞌøy coo højts jim̱ nnøcxtägátsät maa mijtsän, jaduhṉ højts mijtsä Diosmädiaꞌagy njaac yajnähixǿꞌøwät nebiaty hajxy pedyii mgaꞌa mäbøcyñä, 12 møød weenä Jesucristo hajxy xjiaac puhbety coo hajxy hamuumduꞌjoot mjaac nic̈hogǿøjät hamiṉ̃ haxøpy neby højts mijts ndsoquiän, møød coo jäyaꞌay hajxy jaduhṉ nägøx̱iä mdsoc mbaꞌhäyówät, 13 møød weenä Jesucristo hajxy xjiaac puhbety coo jaꞌa Diosmädiaꞌagy hajxy hamuumduꞌjoot mbanǿcxät, møød coo hajxy mgaꞌa najtshixǿꞌøwät, møød coo hajxy mgaꞌa wädítät haxøøg, jaduhṉ hajxy mhídät hawaꞌadstuum, jaduhṉ hajxy pøṉ xquiaꞌa nähwaam̱bédät maa jaꞌa Diosteedy wyiinduumän coo jaꞌa Wiindsǿṉ Jesucristo hänajty yaa tøø quiädaactägach hädaa yaabä naax̱wiin. Näguipxiä Jesucristo jaꞌa mioonsä hänajty nägøx̱iä miøødcädaꞌagaꞌañ møød pønjatiä Diosmädiaꞌagy hänajty tøø miäbøcy.