8
Jesuú ne, kade kúꞌvē ña iña túꞌūn é xēé san
1 Váꞌa ō ve. Dií ka ntio ko é kūtuni nto sáꞌā: Īó dutu ñá odo nūu iña ko é vāꞌá kueꞌen ña, tsi tuví ña e dukún kān ne, kadē kûꞌvé dadɨɨ ña ni Xuva kō, ña dóo ntii inī í san.
2 Kade ña dutu ódo nūu má viꞌī kuikó ntiꞌxe san é tuví e dukún kān. Mii Xuva kō xntítsī ñá viꞌi sāꞌá; ña te ñáꞌa ni xntitsī ña.
3 Un ntɨɨ́ ntɨ̄ɨ́ dutu ñá odo nūú san ne, dɨvi tsīñu ña é kuēꞌé ña doméni ntaꞌa Xuva kō, é kāꞌmi ña kɨtɨ san iña Xuva ko, kɨtɨ e ntaxéꞌe ñaꞌa san iña kuétsi ñā. Dukuān ne, kantio é kōo é kuēꞌé Jesuu ntaꞌa Xúva kō dɨ.
4 Tē dɨ́ katuvi dukuan ña ñuxiví a ne, ñá viī ñá dutu, tsi dóo īó dutu táta Levii e ntaxéꞌe ña doméni vatā ó kakaꞌán lei Muísee.
5 Ntá tsi da mii tsī da ntántaváꞌa naa ña nuu i é īó e dukún kan, vatā o dé Muisee da xntítsī ñá viꞌi Xuva kō ne, kakaꞌan Xúva ko ni ñā: “Kuenta vií nto é ntāváꞌa naa nto vatā o nañéꞌe ú nto rkɨ uku Sínaií kān”, kaꞌan ña.
6 Ntá tsi Cristú ne, níꞌi ña tsīñu e dií ka kaꞌnu é nīꞌi dútu, ñá tsīkan, tsí kade kúꞌvē ñá iña túꞌūn e dií ka vaꞌá san. Dií ka vaꞌa túꞌūn san tsi táꞌxi Xuva ko xuꞌu ña ni ko uun nuu i e dií ka vaꞌa.
7 Tē dɨ́ ni īdiáꞌvi kueꞌen túꞌūn é ītúvi diꞌna ne, ñā dɨ́ ni ntīo é kōo tuku túꞌun vē.
8 Ntá tsi ña ni xkúntee iní Xuva kō nté ō dé ñaꞌa san kuenta iña túꞌun āta sán ne, uve naꞌa mí kakāꞌan ñá ni ñā:
Xuꞌu é Xuva ntō ne, kakaꞌán u ni ntō:
Koto nto tsí xee ntúvi ve
dá kāꞌan xtúku ú nī ña Israeé nī ña Judaa nté koo vií ña.
9 É tūku kakaꞌán u ni ña vatā ó kakaꞌán u ni ñata ña
ntūvi dá irkáa ú ntaꞌa ña e nátāvá u ña ñuú Egítō;
tsi ñá ni de ntāa ña é kākaꞌán u ni ñā.
Dukuān ne, ña ni íde ú ña kuenta,
kaꞌan Xúva kō.
10 Kakaꞌan xtúku Xuva kō:
Túꞌūn saꞌá kaꞌán u nī ña Israee dá xee ntúvi tsīkan.
Tsuꞌun u túꞌūn ko ini dɨkɨ ña.
Xnteé naꞌá u túꞌūn kó nima ña.
Kidáā ne, vií u Xuva ñā ne,
vií ña ñaꞌa ko.
11 Ñá kantīo é xe un xé un ña nakuāꞌa ña
taꞌan ña ni ñaviꞌi ña xoo e Xuva ña,
tsí un ntɨɨ́ ntɨɨ̄ ñá ne, é īni ñá ko,
nté īꞌxá e dií ka lúꞌntī un tsi nté ñatā, ña e dií ka atā.
12 Kada kaꞌnu iní u ni ña kuētsí ña ne,
nté uun ito ká ña nakáꞌān ko nuu i é kīni kaa é idé ña,
kaꞌan Xúva kō.
13 Dá kakāꞌan Xúva ko īña túꞌūn xeé san ne, ncho kaꞌan ñá tsi e kuáta tūꞌun é tuví diꞌna. Da nēé ka nuu i é kuatā, é ña kaidiáꞌvi ká i ne, ña náꞌā ká kutūvi.