24
Mihn Jew kan Kadipoa Paul
1 Mwerin rehn limoau, Jamwrou Laplap Ananias inla Caesarea pwilihkihla koaun in mihn Jew pwi apel jounkawoahwoahn kojonned in wein Rome men adanki Tertullus. Irai pwiai indoa mwohn koapina Felix wia arai kadip kan ma uhwoang Paul.
2 Paul ken poangpoangdo; Tertullus sapda kadipoa Paul in doahroar me:
“Maing Felix, oamw koahiok in kaweid ma ne kioang kamai moaloailoai anjoau roairoai, apel joangoan okdekla pwi ma anahnpoa mine in doahroar kemwehuwihlahn amai weihe ne pel wiawi.
3 Kamai inenin kapingkalahngankihoang koawoa doahroar iroa pwiai anjoau ohroj apel wija ohroj.
4 Ngoah joah nimen kajohlapahkihla oamw anjoau. A ngoah poaki koawoa en lamlam mwehu apel rong amai sikesik in oarlap.
5 Kamai ne diarda pwa woal mene keper apel kadiroapw, ih ne sapkihda pingping pwi nehn pwungen mihn Jew kan nehn jampah pwon, ih ne pel wia jounkaweid in pwihn in mihn Nazareth kan.
6 Ih ne pel jongin kajaminihla Umw Joarwiho. A kamai ken joalihdi ih. Kamai nimen kadeikda ih in doahroar amai Kojonned.
7 [A koaun in jounpei Lysias indoa doapwoahjang ih ipamai.]
8 A Lysias pwehng iraihok ma kadipoa woal mene en indoa ipoamw. Ma koah kapeidek woal mene, pein koawoa nen diarda jang ih joang kan ma kamai kadpoahki ih.”
9 A mihn Jew-ok ma pel pwili wia kadip oauwe pel pwa mehpwi pwen mehlel.
En Paul Doaroa Pein Ih Mwohn Felix
10 Koapinahu wud jeioahllahng Paul en kadehdehda pein ih. Paul pwa:
“Ngoah woahwoahki pwa koah ne wia jounkoapwung in wei oauwe oaroain johnpar inenin dir pwi. Ioar kahrehda ngoah perenki ngoahi en doaroa pein ngoahi mwohn koawoa.
11 Koah kak en pein kidalda, pwa kahjik rehn eijek riau doaula pohn oai indahla Jerusalem pwa ngoah en wia oai joaroawi.
12 Mihn Jew-ok johpwa kapangda oai akmai oang emen nehn Umw Joarwiho. Irai pel johpwa kapangda oai kapkapingda armaj men nehn jinakoke kan ke pel wijahkij nehn kahnihmmwo.
13 Irai pel johkak wia kadehde in kadippok ma irai kadpoahki ngoahi.
14 Ngoah kajalehioang koawoa me: ngoah kin pwongi Koahs in jamamai koalikkok nehn oai kin kahkahkaujwe Allo ma irai pwa likamw. Ngoah pel kamehlele joang ohroj ma ne insingdi nehn kojonned in Moses apel nehn pukin joukohppok.
15 Ngoah koapwoarpwoarki Koahs, doahroar woal pwiai kin koapwoarpwoarki, pwa armaj ohroj ma pwung apel japwung, pirin iejda jang mehdi.
16 Ngoah kin wia uhwen oai kak anjoau ohroj ngoah en anki mohngiong mwakelkel oauwe mwohn Koahs apel armaj kan.
17 “A mwerin oai injang Jerusalem nehn oaroain johnpar pwi, ngoah pel pwurlahng wijahu wahlahng pein oai armaj kan mwani, pwa ngoah en pel wia oai meiroang kan.
18 Ioar anjoauwo ma ngoah wihwia mehpwiai irai kapangda ngoahi nehn Umw Joarwiho, mwerin oai ne kadoarihla kajarwihn kamwkel. Johpwa pokon oau ma pwili ngoahi apel johpwa pingping oau mine.
19 A mihn Jew pwi jang Asia pwili mine wijahu, pein irai en indoa mwohn koawoa apel wia arai kadip kan, ma mine mehkij uhwoang ngoahi.
20 Ke pel mweidoahng woal pwiai ma ne mine me irai en kajalehda dihp dahpwi ma irai kidal pwa ngoah ne dipkihda kahrehda ngoah uhkihda mwohn Sohn Mwoalen Koapwunngo.
21 A ioarroar mehwa ngoah wia nehn anjoauwo ma ngoah mine mwohrai; ngoah pwa, ‘Kamwai ne kadeikda ngoahi rehn oauwe pwa oai kamehlele pwa mehdi kan pirin iejdahng mour.’ ”
22 Doari, Felix ma ne woahwoahkihda mwehu doahroar Allo ken kadoarihdi koarongronngo. Ih pwehng irai, “Ngoah pirin koajoanehdi amwai iroahioauwe, nehn anjoauwo ma koaun in jounpei, Lysias, pirin leldo.”
23 Ih pel koajoanehdi laplap in jounpeiho ma jiloa Paul en jiljiloahr ih, a irai en mweidoahng ih ekij jaldek apel ah pirien kan en apwali apel kioang dahkij ih anahne.
Paul Mwohn Felix apel Drusilla
24 Mwerin rehn pwi Felix indoa, pwilihki pahioahu Drusilla, ma lihn Jew men. Ih iloaklahng Paul en indoa, pwa ih en rong ah siksikoa doahroar pwojon pwa Jesus ioar ma Messiah.
25 A nehn en Paul doaudoaulahr siksikoa doahroar mour mwakelkel, kalwehdi pein arai inoang nauna apel doahroar Rehn in Kadeik ma pirin wiawi, Felix majpwehk ih pwa, “Doari, koah ne kak alwe apkas. Ngoah kapwa pel pwuroahng pangin koawoa nehn oai pirin pijekla.”
26 Ih ken lemleme pwa Paul pirin kioang ih mwani, ioar ma ih kin kalap panginkihdo ih en sikesikkoang.
27 Mwerin johnpar riau, Porcius Festus wud wiliandi Felix apel wiahla koapina. Felix nimen oadoa en mwehu ipen mihn Jew-ok, kahrehda Paul minminehkioar nehn kalpwuhj.