26
Paul doaroa Pein Ih Mwohn Agrippa
1 Agrippa pwehng Paul, “Koah ne mweimweioang sikoa doahr pein koawoa.”
Paul kailwe poah ken doaroa pein ih in doahr me.
2 “Maing Nahmwarki Agrippa, ngoah inenin paimwehu rehn oauwe, pwa oai kak en doaroa ngoahi mwohn koawoa jang me ohroj ma mihn Jew kan kadpoahki ngoahi.
3 Ma uhdahn mehlel pwa koah inenin woahwoahki mwehu doahroar siahk in mihn Jew kan apel mehkan ma irai kin akmaikihpene. Ngoah poaki koawoa en kanangmah apel rong ngoahi.
4 “Mihn Jew kan ohroj kin kidal mwomwen oai mour jang in oai pwulopwul. Irai pel woahwoahki oai mour jang mijkoalkoalwa, pwa ngoah kin koaukoaujoan nehn oai weiho, a mwuhr nehn Jerusalem.
5 Irai pel woahwoahki jang in sapdahu, ma irai nimen kadehde, pwa jang mijkoalkoalwa ngoah emen kijehn pwihn in Pharisee ma keiou poadidi oang amai loapin joarwiho.
6 Apkas ngoah ne kadeik pwa jang in oai koapwoarpwoarki inoauwo ma Koahs ne wiahng jamasai koalikkok.
7 Me ioar inoauwahr ma amai kadaudok eijek riauwo ohroj kin koapwoarpwoarki en oaloa, nehn arai joarwihoang Koahs inrehn apel inpwong. Koapwoarpwoar oauwe, maing nahmwarki ioar ngoahi dipkihda ipen mihn Jew kan.
8 A da kahrehda kamwai johkak kamehlelehki pwa Koahs kin kamourda ihr kan ma ne mehdi?
9 “Pein ngoah lemleme pwa ngoah kak wia joang ohroj en uhwoang Jesus mihn Nazareth.
10 Me ngoah ne wia nehn Jerusalem. Ngoah ne oaloa manman jang ipen jamwrou laplap kan apel joalihdi Nihn Koahs armaj dir kan; a nehn arai pangpanglahng kojkojdi, ngoah pel inenin pwili pwungki mehlel.
11 Pehn dir ngoah kin koalkoa irai nehn jinakoke kan, jongin wia irai en kahmahmkihla arai pwojon. Ngoah inenin lioassoang irai, kahrehda ngoah inla nehn kahnihmw in mihn likin kan pwa ngoah en koalkoa irai.
Paul Sikoahda doahr Ah Wikla
(Wihwia 9:1-19; 22:6-16)
12 “Ioar kahrpoa oauwe ma ngoah pel inlahki Damascus jang in manman apel koahkoahlik jang ipen jamwrou laplap kan.
13 Pohn allo injauwaj, maing nahmwarki, ngoah kapangda maram oau ma maram jang maram in joauwo indihdohjang nehnloannge pidekihpene ngoah apel woallok ma pwili ngoahi.
14 Kamai ohroj kipdi nehn pwirej, a ngoah rongda ngil oau ma indoahng ngoahi in lal in Hebrew, ‘Saul, Saul, amwda koah ke kin koalkoalkoa ngoahi? Nehn oamw wihwia men koah pein koauwehkihla koawoa, doahroar kahu mwein men ma kin pahd suhkoa ingkoang kij ma minno nainki kin pokihki.’
15 Ngoah idoak, ‘Inje Koah, maing?’ Koaunno japoang, ‘Ngoah Jesus ma koah kin koalkoa.
16 Pwohrda uhda, pwa ngoah pwokdohng koawoa pwa ngoah en pilda koawoa pwa koah en wiahla noai jounkadehde. Koah pirin sikoahng armaj kan dahkij koah kapangda ipoai rehnnoauwe, apel dahkij ma ngoah pirin kajalehioang koawoa nehn anjoau kan allaluhdo.
17 Ngoah pirin doaroa koawoa jang ipen armaj in Israel kan apel jang ipen mihn likin kan ma ngoah pirin kadarwe koawoa iparai.
18 Koah pirin kapoahdpijoang mijarai kan apel ukdo irai jang nehn ros oang nehn maram, apel jang nehn manman in Jehsen oang Koahs, pwa nehn arai pwojon Ngoah, diparai kan pirin lapwda apel irai pirin dilda nehn dohiarai ipen nihn Koahs pilpilda kan.’ ”
Paul Sikoahda Ah Doadoahk
19 “Maing Nahmwarki Agrippa, ngoah johkin japeik oang kaudiahl ma ngoah oaloahdihjang nehnloannge.
20 Keiou nehn Damascus apel nehn Jerusalem apel nehn wein Judea pwon, apel nehn pwungen mihn likin kan, ngoah kapkapahrakkihoang irai en koaluhla apel wiliakapwla; irai en wiklahng Koahs apel wia joang kan ma pirin kajalehda pwa irai ne wiliakapwla.
21 Ioar kahrpoa oauwe ma mihn Jew kan kolkihdi ngoahi nehn Umw Joarwiho apel jongin kojukdi ngoahi.
22 A lel rehnnoauwe Koahs jeuweje ngoahi, apkas ngoah mine wijahkije wia oai kadehde oang kamwai ohroj, armaj siksik apel laplap kan. Dahkij ngoah pwa pwen ioar joanngohr ma joukohppok apel Moses ne pel pwa ma pirin wiawi:
23 Pwa Messiah uhdahn loklok apel Ih ma pirin sapin iejda jang mehdi, pwa en kajalehda maram in koamoaurro oang mihn Jew kan apel oang mihn likin kan.”
24 A nehn en Paul doaddoaroa pein ih nehn irair oau, Festus wering pwa, “Paul, koah ne iahkla! Oamw sukuhl koalik kahrehioang oamw pweipweila!”
25 Paul japoang, “Ngoah johpwa iahk, maing Festus. Sikesik pwiai ma ngoah sikoa pwen mehlel apel pwung.
26 Maing Nahmwarki Agrippa! Ngoah kak eimah sikesikkoang koawoa pwa koah kidal mehpwiai. Ngoah koapwoarpwoarki pwa koah ne inenin kidal iroa pwiai ohroj, pwa mehpwiai johpwa wiawi in rir nehn koaimw oau.
27 Maing Nahmwarki Agrippa, a koah kamehlele joukohppok? Ngoah kidal pwa koah kamehlele!”
28 Agrippa pwehng Paul, “Nehn anjoau mwosmwos kije koah lemleme pwa koah en kahrehioang ngoah en joauloangla?”
29 A Paul pwa, “Mihnda ma anjoau mwosmwos ke roairoai, ioar oai kapkap oang Koahs pwa koah apel irai ohroj ma rongrongrong ngoahi rehnnoauwe en doahroar ngoahi, a jaudi in joal pahrang pwiai.”
30 Doari, nahmwarkiho, koapinahu, Bernice apel ohroj ken uhda;
31 mwerin arai aluhpijoang irai pwahpene nehn pwungarai, “Woal mene johpwa wiahda mehkij ma pirin kahrehioang en kojkojdi ke joaldi.”
32 Agrippa pwehng Festus, “Woal mene kakkoar lapwda, ma ih pwen johpwa poaki koapwung japahl ipen Caesar.”